قازاقستان بويىنشا يادرولىق سىناقتاردان 1,5 ميلليون ادام زارداپ شەكتى - سەنات سپيكەرى
بۇگىن استانادا ءوتىپ جاتقان «يادرولىق قارۋسىز الەم قۇرۋ» اتتى حالىقارالىق كونفەرەنتسيا اشىپ، ءسوز سويلەگەن ق ر پارلامەنتى سەناتىنىڭ ءتوراعاسى قاسىم-جومارت توقايەۆ وسىلاي مالىمدەدى.
سپيكەر جيىندى اشا وتىرىپ، كونفەرەنتسيانىڭ تاقىرىبى اسا وزەكتى ەكەنىن اتاپ ءوتتى. «تەك قازاقستان بويىنشا عانا 1,5 ميلليون ادام زارداپ شەكتى. ال دۇنيەجۇزى بويىنشا قۇرباندار سانى جۇزدەگەن ميلليونداپ ەسەپتەلەدى. سىناقتارعا جاپپاي تىيىم سالۋ جانە يادرولىق قارۋدى زاڭسىز دەپ تانۋ - بۇل بۇكىل اسكەري اتوم قارۋىنان قۇربان بولعانداردىڭ الدىنداعى ءبىزدىڭ ادامگەرشىلىك پارىزىمىز جانە ساياسي بورىشىمىز. وسىدان شيرەك عاسىر بۇرىن قازاقستان پرەزيدەنتى ن. نازاربايەۆ ءوزىنىڭ جارلىعىمەن سەمەي پوليگونىن ماڭگىلىككە جاپتى. بۇدان كەيىن قازاقستان يادرولىق قارۋدى تاراتپاۋ جونىندە شارتقا جانە يادرولىق سىناقتارعا جانجاقتى تىيىم سالۋ تۋرالى شارتقا قوسىلدى. سوندىقتان دا، قازاقستان پرەزيدەنتىنىڭ قادامدارىن شىن مانىندە تاريحي قادام دەپ ايتۋعا نەگىز بار. بۇل يادرولىق قارۋسىز الەم تاريحىندا العاشقى جانە سوڭعى وقيعا بولدى»، - دەدى سەنات ءتوراعاسى.
سپيكەر ءسوز اراسىندا بۇگىنگى زاماندا يادرولىق قارۋسىزدانۋ ماسەلەسىنىڭ الەم ءۇشىن ماڭىزى ودان سايىن ارتىپ وتىرعانىن اتاپ ءوتتى. «بىرەگەي قۇجات «الەم ХХІ عاسىر» مانيفەسىندە مەملەكەت باسشىسى نۇرسۇلتان نازاربايەۆ يادرولىق قارۋدىڭ باقىلاۋسىز تارالۋى جانە ونىڭ قاۋپى ادامزات ءۇشىن ەڭ قاۋىپتى سىن-قاتەر ەكەنىن اتاپ كورسەتتى. پرەزيدەنت ن. نازاربايەۆ الەم تاريحىندا جاھاندىق يادرولىق قاۋىپتى باسەڭدەتۋ سالاسىندا ناقتى ءىس-قيمىل جاساعان العاشقى مەملەكەت باسشىسى. قىرىپ جوياتىن قارۋدان ازات الەمگە قول جەتكىزۋدىڭ مورالدىق جانە ساياسي قۇقىعىنا يە بولا وتىرىپ، ەلباسى جاھاندىق يادرولىق قارۋعا قارسى قوزعالىستىڭ كوشباسشىسى ميسسياسىن لايىقتى ورىنداۋدا»، - دەدى ق. توقايەۆ.
وسى رەتتە سەنات سپيكەرى بۇگىنگى فورۋمعا قاتىسقانى ءۇشىن ق ر پرەزيدەنتىنە العىسىن جەتكىزدى.
اۆتور: قانات مامەتقازى ۇلى
