قازاقستاندا 1,5 مىڭ شەتەلدىك جازاسىن وتەۋدە

استانا. قازاقپارات - قازاقستاندا 1,5 مىڭ شەتەلدىك جازاسىن وتەۋدە.

بۇل تۋرالى ق ر باس پروكۋرورىنىڭ ءبىرىنشى ورىنباسارى يوگان مەركەل ءمالىم ەتتى.

«قازىرگى ۋاقىتتا قازاقستاندا 1,5 مىڭنان (1509) استام شەتەلدىك جازاسىن وتەۋدە. ولاردىڭ باسىم بولىگى وزبەكستان (643) جانە قىرعىزستان (320) ازاماتتارى. بىزگە بۇل مەملەكەتتىڭ ازاماتتارىنان ولاردى وتاندارىنا اۋىستىرۋ تۋرالى وتىنىشتەر كوپ تۇسەدى. بۇل بىزگە عانا ەمەس، ەڭ ءبىرىنشى كەزەكتە قابىلداۋشى تاراپقا دا بايلانىستى جايت»، - دەدى ول.

ي. مەركەلدىڭ اتاپ وتۋىنشە، بارلىق وتىنىشتەرگە بايلانىستى ەلىمىزدىڭ باس پروكۋراتۋراسى سول ەلدەگى ارىپتەستەرىنە ازاماتتارىن وتاندارىنا قايتارۋعا دايىن ەكەندىگى تۋرالى حات جىبەرىلەدى. ءبىراق، ول تاراپتان وڭ جاۋاپ الۋ وتە سيرەك.

«سوڭعى جىلدارى قىرعىزستانعا جازاسىن وتەپ جاتقان 318 سوتتالۋشىنىڭ تەك 26 سى عانا اۋىستىرىلسا، ال وزبەكستانعا ءتىپتى بىردە- ءبىر ازاماتى قايتارىلمادى»، - دەدى ق ر باس پروكۋرورىنىڭ ءبىرىنشى ورىنباسارى.

 اۆتور: مارلان جيەمباي