مۇنايدىڭ باعاسى 1 باررەلى 52 دوللاردان بولۋى الىپساتارلىق سيپاتقا يە بولۋى مۇمكىن - ق ر ۇلتتىق بانكىنىڭ ءتوراعاسى
بۇل تۋرالى بۇگىن الماتىدا وتكەن باسپا ءسوز ءماسليحاتىندا ق ر ۇلتتىق بانكىنىڭ ءتوراعاسى دانيار اقىشەۆ ءمالىم ەتتى.
«2016 -جىلدىڭ العاشقى جارتىجىلدىعىندا مۇناي باعاسى ءبىر باررەل ءۇشىن 28 دوللاردان 52 دوللارعا دەيىن كوتەرىلدى.
بۇل ءوسىم الەمدىك ەكونوميكاعا قاتىستى جاعىمسىز بولجامدار اياسىندا ءبىزدىڭ ويىمىزشا تۇراقسىز سيپاتقا يە بولدى جانە ءتىپتى الىپساتارلىق سيپاتقا دا يە بولعان بولۋى مۇمكىن.
2016 -جىلدىڭ شىلدە ايىندا جاعداي وزگەردى. مۇناي باعاسى ءبىر باررەل ءۇشىن 52 دوللاردان 42 دوللارعا دەيىن تۇراقتى تۇردە تومەندەي بەردى. ءبىر اي ىشىندە 19 پايىزعا، ال سوڭعى ەكى اپتادا 15 پايىزعا ارزاندادى»، - دەدى د. اقىشەۆ.
سونىمەن قاتار، ونىڭ ايتۋىنشا، تەڭگەنىڭ قازىرگى ايىرباس باعامى ىشكى جانە سىرتقى ەكونوميكالىق فاكتورلارعا بايلانىستى قالىپتاسقان.
«تەڭگەنىڭ باعامى 2016 -جىلدىڭ اقپان ايىنان باستاپ، كۇنى بۇگىنگە دەيىن - 15 پايىزعا، ياعني 1 رۋبل ءۇشىن 4,6 تەڭگەدەن 5,3 تەڭگەگە دەيىن السىرەدى. ال ەندى، ءبىزدىڭ ويىمىزشا، قازىرگى تاڭدا تەڭگەنىڭ رەسەي رۋبلىنە قاتىستى نىعايۋ الەۋەتى جوعارى. ەگەر ىشكى جانە سىرتقى ەكونوميكالىق فاكتورلار ساقتالاتىن بولسا، تەڭگەنىڭ قازىرگى ايىرباس باعامى ساقتالادى. الايدا، ەگەر، مۇناي باعاسى ءبىر باررەل ءۇشىن 35 دوللاردان تومەن تۇسەتىن بولسا، ال رەسەي ءرۋبلىنىڭ باعامى 1 ا ق ش دوللارى ءۇشىن 70 رۋبلدەن اساتىن بولسا، وندا تەڭگە باعامىندا دا وزگەرىستەر ورىن الۋى مۇمكىن»، - دەدى د. اقىشەۆ.
اۆتور: ايبوتا جاپپاربەرگەن
