09:31, 01 - قاراشا 2021 | GMT +6
ەلوردادا جول- كولىك اپاتىنان 1 ادام مەرت بولىپ، 4 ەۋى زارداپ شەكتى
نۇر- سۇلتان. قازاقپارات - ەلورداداعى «استانالىق» بازارىنىڭ ماڭىندا 22 جاستاعى جۇرگىزۋشى 60 جاستاعى جاياۋ جۇرگىنشىنى قاعىپ ءولتىردى، دەپ حابارلايدى قازاقپارات نۇر- سۇلتان قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
31-قازان كۇنى ساعات 13:33 تە «Kia» ماركالى اۆتوكولىكتىڭ 22 جاستاعى جۇرگىزۋشىسى ءۋاليحانوۆ كوشەسىنىڭ بويىمەن كەلە جاتىپ، قارسى باعىتقا شىعىپ كەتكەن. وندا جولدان ءوتىپ بارا جاتقان ەكى جاياۋ جۇرگىنشىنى قاققان. كەيىن ينەرتسيامەن «لادا» كولىگىمەن سوقتىعىسقان. جول- كولىك وقيعاسى سالدارىنان 60 جاستاعى جاياۋ جۇرگىنشى العان جاراقاتىنان وقيعا ورنىندا كوز جۇمدى. ەكىنشى جاياۋ جۇرگىنشى، «لادا» اۆتوكولىگىنىڭ ەكى جولاۋشىسى جانە «Kia» جۇرگىزۋشىسى اۋرۋحاناعا جەتكىزىلدى، كەيىننەن دارىگەرلەردىڭ تەكسەرىسىنەن سوڭ ۇيلەرىنە جىبەرىلدى. اتالعان فاكتى بويىنشا سوتقا دەيىنگى تەرگەۋ باستالدى.