بوكستان الەم چەمپيوناتىنىڭ 1/4 فينالى: قازاقستاندىقتار كىمدەرمەن كەزدەسەدى

نۇر-سۇلتان. قازاقپارات - بۇگىن رەسەيدىڭ ەكاتەرينبۋرگ قالاسىندا بوكستان الەم چەمپيوناتىنىڭ شيرەك فينالدىق ويىندارى وتەدى. جارىستىڭ بۇل ساتىسىندا قازاقستاندىق جەتى بوكسشى سىنعا تۇسەدى، دەپ حابارلايدى قازاقپارات ءتىلشىسى.

قازاقستاندىق بىلعارى قولعاپ شەبەرلەرىنىڭ قارسىلاستارى انىقتالدى. نۇر-سۇلتان ۋاقىتىمەن 16.00 دە باستالاتىن كۇندىزگى جەكپە-جەكتەردە ساكەن بيبوسىنوۆ (52 كەلى) ارمەنيالىق ارتۋر وگانەسيانمەن، تۇرسىنباي قۇلاحمەت (75 كەلى) تە سول ەلدىڭ وكىلى ارمان دارچينيانمەن قولعاپ تۇيىستىرسە، ۆاسيلي لەۆيت (91 كەلى) يوردانيالىق حۋسسەين ياشايشپەن شارشى الاڭعا شىعادى.

ال كەشكى جەكپە-جەكتەر ەلوردا ۋاقىتىمەن 20.00 دە باستالادى. بۇل ۋاقىتتاردا ابىلايحان ءجۇسىپوۆ (69 كەلى) دومينيكان رەپۋبليكاسىنان كەلگەن روان پولانكومەن، بەكزات نۇرداۋلەتوۆ (81 كەلى) تۇركيالىق بايرام مالكانمەن، قامشىبەك قوڭقابايەۆ (91 كەلىدەن جوعارى) گەرمانيادان كەلگەن نەلۆي تيلفاكپەن، قايرات ەراليەۆ (57 كەلى) وزبەكستاندىق ميرازيزبەك ميرزاحاليلوۆپەن كەزدەسەدى.

جارتىلاي فينالعا جولداما العان بوكسشىلار 20- قىركۇيەكتە جۇدىرىقتاسادى. ال 21- قىركۇيەكتە چەمپيوندار انىقتالادى.

قازاقستان قۇراماسى الەم چەمپيوناتىنا 1993-جىلدان بەرى تۇراقتى قاتىسىپ كەلەدى. سودان بەرى بارلىعى 40 مەدالعا قول جەتكىزدى. مەدالدىڭ 11 ءى «التىن» ، 12 ءى «كۇمىس» جانە 17 ءى «قولا».

بۇدان بۇرىن قازاقستاندىق جەتى بوكسشىنىڭ شيرەك فينالعا جولداما العانىن حابارلاعان ەدىك.