امازونياداعى نۋ ورماندا 1 جاسار بالا 40 كۇن بويى قالاي كۇن كەشتى؟

استانا. قازاقپارات - «قارالى كۇندەر سوڭىنان جارىق كۇن دە شىعادى ەكەن»، - دەيدى قۋانىشى قوينىنا سىيماعان بالالاردىڭ اكەسى.

ونىڭ ايتۋىنشا، تۇينەك جەمىستى تروپيكالىق وسىمدىك - كاسساۆو بالالاردىڭ امان قالۋىنا سەپ بولعان. 1- مامىر كولۋمبيادا بولعان ۇشاق اپاتىنان، ارادا 40 كۇن وتكەندە 13، 9، 4 جاستاعى جانە بار بولعانى 12 ايلىق بالاقاي ءدىن امان تابىلدى. بالالاردىڭ اكەسى مانۋەل رانوك قۋانىشىنا سەنە الار ەمەس. جەرگىلىكتى بايىرعى تايپا وكىلى رەتىندە ول پەرىشتەلەرىن اجالدان ساقتاپ قالعان - تابيعات- اناعا العىس ايتۋمەن بولدى.

مانۋەل رانوك، بالالاردىڭ اكەسى:

- ءبىز دجۋنگليگە سەنەمىز، ول دا ءبىزدىڭ انامىز. امازونيادان راداردان شىعىپ كەتكەن ۇشاقتى تاۋىپ، بارشا جۇرتتى ءبىر تاڭ قالدىرساق، بالالاردى تاۋىپ، تاعى تاڭقالتتىق. بارشا اتسالىسقان جاندارعا العىسىم شەكسىز! تابيعات اناعا مىڭ العىس!

بالالاردىڭ ۇلكەنى 13 جاسار لەسلي ياكوبومبەر مۋكۋتۋي اكەسىنە اناسىنىڭ شامامەن ءتورت كۇن ءتىرى بولعانىن ايتتى. مارقۇم اناسىنىڭ بالالارىنا ايتقان سوڭعى ءسوزى: «اپات بولعان ۇشاققا جولاماڭدار، كەتىڭدەر» دەگەن ءسوز ەكەن.

فيدەنسيو ۆالەنسيا، بالالاردىڭ اعاسى:

- ەكى تاۋلىك ءوتتى، بالالاردا وڭ وزگەرىس بار. ازىرگە ءبىز ولارمەن بۇل وقيعا تۋرالى سويلەسىپ جاتقان جوقپىز. پسيحولوگتار سۋرەت- تەراپياسى ارقىلى ەمدەپ جاتىر. ءتورت كىشكەنتاي بالا 1,5 ايدىڭ ىشىندە قاتتى ازىپ كەتكەن. بەلگىلى بولعانى، ولار جەمىستى تروپيكالىق وسىمدىكتەر مەن تابيعي ۇندى تاماققا تالعاجاۋ ەتكەن.

دارىگەرلەر: «ولاردىڭ ومىرىنە قاۋىپ ءتونىپ تۇرعان جوق»، - دەيدى. ايتا كەتەرلىگى، بالالار شاعىن ورمان القابىنداعى اپات ورنىنان 5 شاقىرىم جەردە تابىلدى.

شاعىن ۇشاق مامىردىڭ باس كەزىندە امازونياداعى نۋ ورماندا اپاتقا ۇشىراعان. ۇشقىش پەن بالالاردىڭ اناسى اپاتتان كوز جۇمعان.

پەدرو سانچەز، كولۋمبيانىڭ ارنايى جاساق كۇشتەرىنىڭ قولباسشىسى:

- كىشكەنتاي بالالار امازونيانىڭ نۋ ورمانىندا جالعىز قالسا دا ەش قورىقپاعان. ولاردا ەشقانداي قۇرال، كيىم بولماعان. تەك ءتىرى قالۋ ءۇشىن بار كۇشتەرىن سالىپ كۇرەسكەن.

اۆتورى: سىمبات عالىمجان قىزى

www.24.kz