جول پوليتسياسىنا 1 مىڭ تەڭگە پارا بەرگەن جۇرگىزۋشىگە 400 مىڭ تەڭگە ايىپپۇل سالىندى

استانا. قازاقپارات - جول پوليتسياسىنا 1000 تەڭگە پارا بەرگەنى ءۇشىن جۇرگىزۋشىگە 400 مىڭ تەڭگەگە جۋىق ايىپپۇل سالىندى.

بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى حابارلادى.

سونىمەن، جامبىل وبلىسى قورداي اۋدانى بويىنشا اۋدانارالىق قۇرىلىمى بويىنشا اۋداننىڭ 26 جاسار تۇرعىنىنا قاتىستى ق ر اكىمشىلىك قۇقىق بۇزۋشىلىق تۋرالى كودەكسى بويىنشا 676-بابىنا سايكەس اكىمشىلىك قۇقىقبۇزۋشىلىق انىقتالدى.

اتاپ ايتقاندا، بۇل تۇرعىدا «جەكە تۇلعالاردىڭ مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن تۇلعالارعا نەمەسە ولارعا تەڭەستىرىلگەن تۇلعالارعا زاڭسىز ماتەريالدىق سىياقى، سىيلىقتار، جەڭىلدىكتەر بەرۋى نە قىزمەتتەر كورسەتۋى، ەگەر بۇل ارەكەتتەردە قىلمىستىق جازالاناتىن ءىس- ارەكەت بەلگىلەرى بولماسا، - ەكى ءجۇز ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى».

اكىمشىلىك جاۋاپكەرشىلىكتەن جالتارۋ ءۇشىن قۇقىقبۇزۋشى قورداي اۋداندىق ءى ءى ب قىزمەتكەرىنە 1000 تەڭگە كولەمىندە اقشالاي سىيلىق ۇسىنعان. قورداي اۋداندىق سوتىنىڭ قاۋلىسىمەن قۇقىقبۇزۋشى اكىمشىلىك جاۋاپكەرشىلىككە تارتىلىپ، 200 ايلىق ەسەپتىك كورسەتكىش كولەمىندە 396400 تەڭگە ايىپپۇل سالىندى. سوت ماجىلىسىندە كىنالى ءوز قاتەلىگىن تولىقتاي مويىنداپ، جىبەرگەن قاتەلىگى ءۇشىن وكىنىشىن ءبىلدىردى.

ايتا كەتەيىك، جامبىل وبلىسىنىڭ سىبايلاس جەمقورلىققا قارسى قىزمەتىمەن 2015 -جىلدىڭ 1 -توقسانىندا 6 اكىمشىلىك قۇقىقبۇزۋشىلىق انىقتالدى. ونىڭ ىشىندە تورتەۋى سىبايلاس جەمقورلىق سيپاتىندا.

اۆتور: رۋسلان عابباسوۆ