بەيجىڭدە 1,3 ميلليونعا جۋىق ادام كوروناۆيرۋس تەستىسىنەن ءوتتى
بەيجىڭ. قازاقپارات - بەيجىڭدەگى شۋنيا اۋدانىندا COVID-19 ىندەتى قايتا تاراپ، 1,29 ميلليونعا جۋىق تۇرعىن كوروناۆيرۋستىڭ نۋكلەين قىشقىلدارىنا تەست تاپسىردى، دەپ حابارلايدى قازاقپارات.
وتكەن سەيسەنبىدەگى جاعداي بويىنشا، شۋنيا اۋدانىنىڭ 1,25 ميلليون تۇرعىنىندا كوروناۆيرۋس انىقتالمادى. وسى اپتادا شۋنيادا جەرگىلىكتى COVID-19 ينفەكسياسىنىڭ جەتى جاڭا راستالعان جاعدايى تىركەلدى.
ناۋقاستارمەن بايلانىستا بولعان 1 مىڭنان استام ادام انىقتالدى. ولاردىڭ بارلىعى مەديتسينالىق باقىلاۋدا. بەيجىڭ اكىمشىلىگىنىڭ رەسمي وكىلى سيۋ حەجياننىڭ ايتۋىنشا، «بىردە- ءبىر ادام ۇمىت قالماس ءۇشىن» كوروناۆيرۋستى تەستىلەۋگە كوبىرەك كوڭىل ءبولىپ، COVID-19-دىڭ قورشاعان ورتاسىن ىرىكتەۋدى كەڭەيتۋ كەرەك.
سونىمەن بىرگە، قىتاي شەنەۋنىگى بەيجىڭگە شەتەلدەن كەلگەن ادامدار ءۇشىن 21 كۇندىك كارانتيندى قاتاڭ ساقتاۋعا شاقىردى. رەسمي مالىمەتتەرگە سايكەس، ق ح ر ماتەريگىندە كوروناۆيرۋس جۇقتىرعانداردىڭ %94,26 ى ەمدەلىپ شىقتى.
2019 -جىلدىڭ جەلتوقسان ايىنان باستاپ جۇقتىرعاندار سانى 87 مىڭنان استى، مەديتسينالىق مەكەمەلەردە كوروناۆيرۋس ينفەكسياسى بار 356 ادام جاتىر. سوڭعى 24 ساعات ىشىندە (الدىڭعى جارتى جىلداعىداي) ەلدە بىردە-ءبىر ءولىم تىركەلگەن جوق، ءولىم كورسەتكىشى %5,32 دى قۇرايدى (4634 ادام قايتىس بولدى).
