ا ق ش-تا جىل سايىن 1,3 ميلليوننان استام وقۋشى مەكتەپتى تاستاپ كەتەدى
بۇل تۋرالى Time جۋرنالىنىڭ رەسمي سايتى حابارلادى. الايدا، ماسەلە ورتا مەكتەپتىڭ جوعارى سىنىپتارىنا قاتىستى بولىپ تۇر.
باتىس ەلدەرىنىڭ ءبىلىم بەرۋ جۇيەلەرىندە بىزدەگىگە قاراعاندا ءبىرقاتار وزگەرىستەر بار. ولار ادەتتە high school دەپ جوعارى سىنىپتاردى اتايدى. الگى وقۋدى تاستاپ كەتەتىندەر دە وسى «جوعارى مەكتەپكە» قاتىستى بولسا كەرەك. dosomething.org سايتىنىڭ جازۋىنا قاراعاندا امەريكادا جوعارى سىنىپتاردا وقىماعانداردىڭ جۇمىسقا ورنالاسۋى وتە قيىن.
ياعني، جۇمىس بەرۋشىلەردىڭ 90 پايىزى ازاماتتاردىڭ مەكتەپتى تولىق بىتىرگەنىن قالايدى. ال، مەكتەپتەن شىعىپ كەتەتىندەردىڭ 20 پايىزى شەتەل ازاماتتارى بولسا، تاعى 17 پايىزى يسپان تىلىندە سويلەيتىندەر ەكەن. ا ق ش ەكىنشى دۇنيەجۇزىلىك سوعىستان كەيىن الەمدە ازاماتتاردىڭ مەكتەپ ءبىتىرۋ كورسەتكىشى جاعىنان ءبىرىنشى ورىندا تۇرسا، قازىر دامىعان 27 ەلدىڭ ىشىندە 22 ورىنعا تۇراقتاپتى.
زەرتتەۋشىلەر ورتا مەكتەپتى تولىق بىتىرگەن ازاماتتاردىڭ تابىسى باستاۋىش سىنىپتىڭ دەڭگەيىندەگى ءبىلىمى بار ادامدارعا قاراعاندا 50-100 پايىز ارتىق بولاتىندىعىن انىقتاعان. سونىمەن بىرگە، امەريكادا اق ءناسىلدى نەمەسە تەگى ازيالىق ادامدار افرو-امەريكالىقتار مەن يسپان ءتىلدى وقۋشىلارعا قاراعاندا مەكتەپتە دۇرىس وقيتىن ءتارىزدى. اق ناسىلدىلەر مەن ازيالىقتاردىڭ 80 پايىزى مەكتەپتى تۇگەل بىتىرسە، افرو-امەريكالىقتار مەن يسپان تىلىندە سويلەيتىن ازاماتتاردىڭ 55 پايىزى عانا ورتا ءبىلىمدى تولىق الاتىن كورىنەدى.
الايدا، Time جۋرنالى مەكتەپتى تولىق اياقتاماسا دا الەمگە تانىلعان، بايىعان 11 ازاماتتىڭ ءتىزىمىن بەرگەن. ولاردىڭ قاتارىندا ريچارد برانسون، دجو ليۋيس، فرانسۋا پينو، دەۆيد مەردوك سىندى ميللياردەرلەر بار. وسىلايشا، ورتا مەكتەپ اتتەستاتىن الۋ داڭقتى ءھام باي بولۋعا ناقتى اسەر ەتە قويمايتىنىن سيپاتتاپتى باسىلىم. ال، Forbes جۋرنالى بيلل گەيتس تە، ستيۆ دجوبس تا، مارك تسۋكەربەرگ تە بيزنەس ءۇشىن ۋنيۆەرسيتەتتەگى وقۋلارىن تارك ەتكەنىن جازعانى بار ەرتەرەكتە.
جالپى، الەمدە ورتا مەكتەپتى ءتامامداماعان ەڭ كەمى 10 ميللياردەر بار.
Kaznews.kaztrk.kz
