قازاقستاندا 1,2 ميلليون ادام تۇراقسىز جۇمىس ىستەيدى
بۇل تۋرالى «اشىق» ن ق ا پورتالىندا جاريالاعان ەڭبەك نارىعىن دامىتۋدىڭ 2028-جىلعا دەيىنگى كەشەندى جوسپارىندا ايتىلعان، دەپ حابارلايدى قازاقپارات ءتىلشىسى.
«قازاقستاندا 1,2 ميلليون ادام بەيرەسمي نەمەسە تۇراقسىز جۇمىسپەن قامتۋ جاعدايىندا جۇمىس ىستەيدى. ال ولاردىڭ تابىسى باعالانبايدى. قازاقستاندا بەيرەسمي جۇمىسپەن قامتۋ نەگىزىنەن تومەن تابىسپەن جانە ونىمدىلىگى تومەن ارزان ەڭبەكپەن بايلانىستى. ماسەلەن، بەيرەسمي سەكتوردا جۇمىسپەن قامتىلعانداردىڭ 40 پايىزى زاۋىتتارعا، فابريكالارعا، اتەلەگە (37 پايىز) جانە جەكە قوسالقى شارۋاشىلىقتارعا (36 پايىز) شوعىرلانعان. قۇرىلىس الاڭدارىندا (2 پايىز) ، اشىق بازارلاردا (2 پايىز)، مەنشىكتى اۆتوكولىك قۇرالدارىندا (2 پايىز) ەلەۋسىز ۇلەس بايقالادى. سونىمەن قاتار، بەيرەسمي جۇمىسپەن قامتۋ سانى 15 ادامنان (57 پايىز) اسپايتىن شاعىن ۇيىمدارعا ءتان»، - دەلىنگەن ۆەدومستۆو تالداۋىندا.
ەڭبەك جانە حالىقتى الەۋمەتتىك قورعاۋ مينيسترىلىگىنىڭ مالىمەتىنشە، بەيرەسمي جۇمىسپەن قامتۋدىڭ تارالۋىنا اسەر ەتەتىن ماڭىزدى فاكتور ءبىلىم دەڭگەيىنىڭ تومەندىگى.
«2021-جىلى بەيرەسمي جۇمىسپەن قامتىلعانداردىڭ 59 پايىزى تەحنيكالىق جانە كاسىپتىك، ال 23 پايىز ورتا ءبىلىم العان. قالعان 18 پايىزنىڭ جوعارى ءبىلىمى بار. اۋىلدىق جەرلەردە تۇراتىن ادامدار بەيرەسمي تۇردە قالا تۇرعىندارىنا قاراعاندا 2 ەسە كوپ جۇمىس ىستەيدى»، - دەپ كورسەتىلگەن كەشەندى جوسپاردا.
وسى تۇيتكىلدەردى الدىن الا شەشۋ ماقساتىندا ەڭبەك جانە حالىقتى قوراعاۋ مينيسترىگى ەڭبەك نارىعىن دامىتۋدىڭ 5 جىلدىق جوسپارىن بەكىتۋدى ۇسىنىپ وتىر.
