ۇلتتىق مۋزەي باسشىلىعىنا قاتىستى ءىس: انتيكور 1,2 ميلليارد تەڭگە جىمقىرىلعانىن ءمالىم ەتتى

نۇر- سۇلتان. قازاقپارات – ق ر سىبايلاس جەمقورلىققا قارسى ءىس- قيمىل اگەنتتىگى ۇلتتىق مۋزەي باسشىلىعىنا قاتىستى قىلمىستىق ءىستى تەرگەپ- تەكسەرۋدى جالعاستىرىپ جاتىر.

بۇل تۋرالى اتالعان اگەنتتىكتەن ءمالىم ەتتى، دەپ حابارلايدى قازاقپارات. بۇگىندە نۇر- سۇلتان قالاسى بويىنشا سىبايلاس جەمقورلىققا قارسى قىزمەت ۇلتتىق مۋزەي باسشىلىعىنا جانە باسقا دا تۇلعالارعا قاتىستى سوتقا دەيىنگى تەرگەۋ جۇرگىزىپ جاتىر.

كۇدىكتىلەرگە 2017-2018 -جىلدارى «اقپاراتتىق رەسۋرستاردا وبەكتىلەردى تانىمال ەتۋ ءۇشىن جالپى ۇلتتىق تىزبەگە ەنگىزىلگەن وبەكتىلەردىڭ 3D مودەلىن قۇرۋ» جوباسىن ىسكە اسىرۋ كەزىندە اسا ءىرى مولشەردە بيۋدجەت قاراجاتىن جىمقىردى دەگەن ايىپ تاعىلىپ وتىر.

«ۇلتتىق مۋزەي مەردىگەر ۇيىمدارعا اتالعان جوبا اياسىندا اتقارىلعان جۇمىستار ءۇشىن 1,3 ميلليارد تەڭگە تولەگەن. بۇل رەتتە جۇرگىزىلگەن ساراپتامالىق زەرتتەۋ جۇمىستاردىڭ ناقتى قۇنى 83,4 ميلليون تەڭگەنى قۇراعانىن انىقتادى. وسىلايشا، جۇمىس قۇنى 1,2 ميلليارد تەڭگەگە نەگىزسىز ۇلعايتىلىپ، مەملەكەتكە اسا ءىرى مولشەردە زالال كەلتىرىلدى. تەرگەپ- تەكسەرۋ امالدارى جالعاسۋدا. وزگە اقپارات تەرگەۋ مۇددەسىنە وراي جاريا ەتۋگە جاتپايدى»، - دەلىنگەن ق ر سىبايلاس جەمقورلىققا قارسى ءىس- قيمىل اگەنتتىگىنىڭ حابارلاماسىندا.

ەسكە سالايىق، بيىلعى مامىر ايىندا ۇلتتىق مۋزەي ديرەكتورى ارىستانبەك مۇحامەدي ۇلى ۇستالىپ، وعان قاتىستى «كۇزەتپەن ۇستاۋ» بۇلتارتپاۋ شاراسى قولدانىلعانى ءمالىم ەتىلدى. ول ۋاقىتتا انتيكور قىزمەتى ق ر ۇلتتىق مۋزەيىنىڭ لاۋازىمدى قىزمەتكەرلەرىنە جانە باسقا دا تۇلعالارعا بيۋدجەت قاراجاتىنىڭ 146 ميلليون تەڭگە سوماسىن جىمقىردى دەگەن ايىپ تاعىلعانى تۋرالى ايتىلعان ەدى. بۇل قاراجات «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ جونىندەگى مەملەكەتتىك ساتىپ الۋ تۋرالى شارت اياسىندا قولدى بولعانى ءمالىم ەتىلدى.