ايبەك نۇعىماروۆ 1/2 فينالدا جەڭىلگەن موڭعوليالىقتىڭ نارازىلىعىنا جاۋاپ بەردى

استانا. قازاقپارات - «الەم بارىسى» اتانعان ايبەك نۇعىماروۆ تۋرنيردەن سوڭ وتكىزىلگەن باسپا ءسوز ءماسليحاتىندا ءوزىنىڭ جەڭىستەن كەيىنگى اسەرىمەن ءبولىستى، دەپ حابارلايدى «قازاقپارات» ح ا ا ءتىلشىسى.

تىلشىلەر قاۋىمى موڭعوليا بالۋانى سەرىك بەردىمۇرات جارتىلاي فينالدى جەڭىستىڭ ايبەككە بەرىلۋىنە نارازىلىق ءبىلدىرۋى تۋراسىندا سۇراق قويدى.

بۇعان قاتىستى ايبەك ءوز ويىن ءبىلدىرىپ، بەلدەسۋ ەرەجەگە سايكەس وتكەنىن اتاپ ءوتتى. «موڭعوليا بالۋانى ءوزىمىزدىڭ قانداس باۋىرىمىز. ەشقانداي ادىلەتسىزدىك بولعان جوق دەپ ويلايمىن. ءبىر بۇك ۇپايمەن ۇتتىم. كۇرەس كەزىندە ۇپايدىڭ ءبارى ەسەپتەلىپ، تابلودان كورسەتىلدى. شىندىعىن ايتقاندا، «جەرەبە الدىن الا تارتىلعان» دەگەن سوزدەر كىشكەنە قيىن ەكەن. جەرەبە بويىنشا قيىن توپقا ءتۇسىپ قالدىم. وزدەرىڭىز كورگەندەي، ءبىرىنشى دودادان باستاپ پولياك بالۋانىمەن، ودان كەيىنگى وزبەك بالۋانىمەن، «قازاقستان بارىسى» اتانعان ەلامان باۋىرىمىزبەن بولعان كەزدەسۋلەردىڭ ەشقايسىسى وڭاي تۇسكەن جوق. بۇگىن شىنى كەرەك، ماعان اۋىرلاۋ بولدى. وسىدان 15 كۇن بۇرىن كەلىپ، ارنايى جاتتىعۋدان وتكەن بولاتىنبىز. مەن ءۇشىن ەڭبەك اقتالدى دەگەن ويدامىن»، - دەيدى «الەم بارىسى».

ايبەك سونىمەن بىرگە ەلامان ەرعاليەۆپەن بولعان كەزدەسۋگە قاتىستى ويىن ءبىلدىردى.

«ەلاماننان 2015-جىلى ۇتىلىپ قالعان بولاتىنمىن. ول وتە مىقتى بالۋان. سالماعى دا مەنەن اۋىر. كەز كەلگەن ادام «قازاقستان بارىسى» بولا بەرمەيدى. بەلدەسۋگە توقتالا كەتسەك، باسىندا، راس، ەكى رەت بۇككە ءتۇسىپ قالدىم. ودان كەيىنگى ءادىس جاساعان كەزدە ءوزىم اينالدىرىپ، جانعا ءتۇسىردىم. ارى قاراي تاعى ءبىر-ەكى بۇك بولدى. جاڭا ءبىر اعالارىمىز جولدان كەسىپ، قاشىپ كۇرەسۋگە بولمايدى دەپ ايتىپ جاتىر. مەن ەشقاشان قاشىپ كۇرەسپەگەنمىن. كۇرەستە كەيدە قاشاتىن كەز دە بولادى. العا ۇمتىلاتىن جەرى دە بولادى. قاشتىڭ نە، العا ۇمتىلدىڭ نە، كىمنىڭ قولىن كوتەردى - سول جەڭىسكە جەتتى. مەن السىزدىك كورسەتتىم دەپ ويلامايمىن»، - دەيدى ايبەك.

بالۋان سونداي-اق اقتىق باسەكەدەگى قارسىلاسى گرۋزيالىق گۋرام تۋشاشۆيليگە قاتىستى دا پىكىرىن ءبىلدىرىپ، الداعى جوسپارىمەن ءبولىستى.

«فينالدىق بەلدەسۋ تۋرالى ايتار بولسام، گۋرام الەمدى دزيۋدودان باعىندىرىپ جۇرگەن بالۋان. وسىدان ءبىر جىل بۇرىن ەكى رەت كەزدەسكەن بولاتىنبىز. ءوزى جاس بالۋان. الەمدەگى الدىڭعى قاتارلى بالۋانداردىڭ ءبىرى. بىرىنشىسىندە شىمكەنت قالاسىندا وتكەن ۇلكەن تۋرنيردە ءوز قاتەلىگىمنەن جەڭىلىپ قالعان ەدىم. سودان كەيىن  قىزىلوردادا وتكەن جارىستا مەن ۇتقان بولاتىنمىن. بۇگىن فينالدا اللا قولداپ، جەڭىس ماعان بۇيىرىپ تۇر ەكەن. ماقساتىمدى ىسكە اسىردىم. قازاق كۇرەسىنە قاتىسىپ كەلە جاتقانىما 15 جىل بولدى. التى الەم چەمپيوناتىن ءتورت رەت ۇتقان بولاتىنمىن. استانادا كەلەسى ايدىڭ 27 سىندە قازاق كۇرەسىنەن الەم چەمپيوناتى بولادى. سوعان قاتىسامىن»، - دەپ ءتۇيدى ايبەك.