قازاقستاندا 1 ميلليون 200 مىڭ ازامات جەر الۋ ءۇشىن كەزەكتە تۇر
بۇل تۋرالى بۇگىن استاناداعى ۇلتتىق كىتاپحانادا وتكەن «قازاقستان-2050» جالپىۇلتتىق كواليتسياسىنىڭ وتىرىسىندا «اۋىل» پارتياسىنىڭ ءتوراعاسى، سەناتور ءالي بەكتايەۆ ءمالىم ەتتى.
«جەر رەفورماسى اياسىندا، جەر ماسەلەسىنە قاتىستى پروبلەمالار كوتەرىلىپ جاتقان كەزدە، ونىڭ كولەڭكەلى تۇستارىنا دا نازار اۋدارعان ءلازىم. بۇلاردىڭ بارلىعى دا حالىقتىڭ الەۋمەتتىك جاعدايىنا، تۇرمىس تىرشىلىگىنە تىكەلەي بايلانىستى. ماسەلەن، ۇلتتىق ەكونوميكا مينيسترلىگىنىڭ مالىمەتىنە قاراعاندا، 1 ميلليون 200 مىڭنان استام ازامات ءۇي سالۋ ءۇشىن جەر ۋچاسكەلەرىن الۋ كەزەگىندە تۇر. ولاردىڭ كوپشىلىگى جاستار، جاس وتباسىلار. وسى رەتتە ايتا كەتەرلىگى، ۇكىمەت قاۋلىسى ارقىلى ينفراقۇرىلىمى جوق جەرلەردى بەرۋگە تىيىم سالىنعان. وسىنى سىلتاۋ ەتكەن اكىمدەر جۇرتقا جەر بەرۋدى توقتاتتى»، - دەدى ءالي بەكتايەۆ.
ونىڭ ايتۋىنشا، سوڭعى 10-12 جىل كولەمىندە ءۇي سالۋعا جەر ءبولۋ مۇلدەم ماردىمسىز جۇرگىزىلدى، ءتىپتى جوقتىڭ قاسى دەسە دە بولادى. «مىنە، جەر تۋرالى اڭگىمە توڭىرەگىندە ەلدىڭ ىزاسىن تۋدىراتىن وسىنداي ماسەلە دە بار عوي. سوندىقتان دا، بۇل پروبلەمانى ساراپتاپ، كەيبىر كەدەرگىلەردى الىپ تاستاپ، ناقتى شەشىمدەر قابىلدايتىن كەز كەلگەن سەكىلدى»، - دەدى بەكتايەۆ.
بۇنىمەن قوسا، پارتيا باسشىسى ەلدى مەكەندەر اينالاسىنداعى جايىلىمدار پروبلەماسىنا دا توقتالىپ ءوتتى. ونىڭ كەلتىرگەن مالىمەتىنە قاراعاندا، سوڭعى 10 جىل كولەمىندە ەكونوميكانىڭ وڭالۋىنا بايلانىستى حالىقتىڭ تۇرمىسى جاقسارىپ، جۇرت قولىندا ۇستالاتىن مال سانى دا كۇرت ارتقان. بۇل رەتتە بۇرىنعى نورماتيۆتەرگە سايكەس، ورتاق پايدالانۋعا بەرىلگەن جايىلىمدار تارىلىپ، مال جايۋعا ورىسكە شىعارۋعا كەدەرگىلەر كەزدەسىپ جاتىر.
«سوندىقتان دا، ەرتەرەكتە كەيبىرەۋلەردىڭ يەلىگىنە كەتكەن، جالعا بەرىلگەن جايىلىمنىڭ ءبارىن ريەۆيزيادان وتكىزۋگە ءتيىسپىز. ارتىق الىنعان جەرلەر ورتاق پايدالانۋعا بەرىلىپ، ەلدى مەكەن تۇرعىندارىنا جاعداي جاسالۋى كەرەك. ويتكەنى، اۋىل تۇرعىندارىنىڭ تۇرمىسى مال شارۋاشىلىعىنا تىكەلەي بايلانىستى بولىپ وتىر»، - دەدى بەكتايەۆ.
