تۇركىستاندا قۇنى 1,1 ميلليارد دوللار بولاتىن ەلىمىزدەگى ەڭ ءىرى جىلىجاي سالىنادى
بۇگىن رەسەيلىك ينۆەستور «ەكو- كۋلتۋرا» كومپانياسىنىڭ وكىلدەرى جىلىجاي كەشەنىنە ارنايى قاراستىرىلعان 500 گا جەر تەلىمىمەن تانىستى، دەپ حابارلايدى قازاقپارات ءتىلشىسى.
كەزدەسۋگە تۇركىستان وبلىسىنىڭ اكىمى ءومىرزاق شوكەيەۆ پەن «قازاقينۆەست» ۇلتتىق كومپانياسى تۇركىستان وبلىسى بويىنشا فيليالى ديرەكتورىنىڭ ورىنباسارى قىدىر كايۋپوۆ، كەلەس اۋدانى اكىمىنىڭ ورىنباسارى اباي جاڭبىربايەۆ پەن ءتيىستى مەكەمە باسشىلارى قاتىستى. رەسەيلىك «ەكو- كۋلتۋرا» كومپانياسىنىڭ وكىلدەرى تانىسۋ بارىسىندا اۋداننىڭ گەوگرافيالىق ءتيىمدى ورنالاسقانىن اتاپ ءوتىپ، كەشەننىڭ ينفراقۇرىلىم جۇيەسىن جۇرگىزۋ جۇمىستارىن باستاۋعا ۋاعدىلاستى. جوبا 2025 -جىلعا دەيىن جۇزەگە اسىرىلسا، اۋداننىڭ ەكونوميكاسىن كوتەرىپ، جاڭادان 10 مىڭ جۇمىس ورنى اشىلادى.
«بۇل جەردى تاڭداۋدىڭ دا ءوز ەرەكشەلىگى بار. مۇندا قازاقستان بويىنشا كۇن ەرتە شىعىپ، جاندىكتەر ەرتە ويانادى. ەلدەگى ەڭ ىستىق نۇكتە سانالادى. بۇل ءوز كەزەگىندە جىلىجايعا جۇمسالاتىن شىعىندى ازايتادى. كەشەننىڭ جانىنان « قىزىل اسكەر» پوستانستانساسى اشىلىپ، 2021 -جىلدان باستاپ جارىقپەن قامتاماسىز ەتە الادى. گاز تارتىلعان جانە وسى جەردەن ۇلكەن اينالما جولى تۇسەدى دەپ جوسپارلانىپ وتىر. ترانسپورتتىق لوگيستيكالىق ماسەلە شەشىلەدى» ، - دەيدى وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ.
اتالعان كەشەندى سالۋ بويىنشا ق ر پرەمەر- ءمينيسترى اسقار ءماميننىڭ تۇركىستان قالاسىنا ساپارى اياسىندا مەموراندۋم تۇزىلگەن بولاتىن. «Kazakh Іnvest» كومپانياسىنىڭ باستاماسىمەن تۇركىستان وبلىسىنىڭ اكىمدىگى جانە «ەكو- كۋلتۋرا» رەسەيلىك كومپانياسى اراسىنداعى كەلىسىم ءتۇزىلىپ، جىلىجاي كەشەنىندە الداعى ۋاقىتتا قىزاناق، قيار ونىمدەرى وندىرىلمەك. 2019-2025 -جىلدارى سالىناتىن كەشەننىڭ ونىمدەرى تمد مەن ەۋروپا ەلدەرىنە ەكسپورتتالماق. جىلىجايدىڭ 25 پايىزى مەملەكەت تاراپىنان سۋبسيديالاناتىن بولادى. قاجەتتى جانار- جاعارماي شارۋالارعا بەرىلەتىن ارزان باعامەن بوساتىلىپ، تۇقىم الۋعا دا سۋبسيديا بەرىلەدى. سۋلاندىرۋ جۇمىستارى جەر استى درەناجدار جانە كەلەس وزەنىنەن سۋ تارتۋ ارقىلى جۇرگىزىلەدى.
«وسىنداي ۇلكەن جوبانى ىسكە اسىرۋ تۋرالى ۇسىنىسى Kazakh Invest-تەن ءتۇستى. بىزگە بۇل باستامانى قولعا الۋ بۇيىردى. ارينە، ءبىز قازاقستاندا جوبالاردى جۇزەگە اسىرامىز، ءبىراق ولار سونشالىقتى اۋقىمدى ەمەس. اتالعان كەشەنگە جىلىنا 7 ميلليون تەكشە مەتر سۋ مەن ساعاتىنا 100 تەكشە مەتر گاز، تاۋلىگىنە 40 مگۆت جارىق قاجەت. بيىل بارلىق ينفراقۇرىلىمداردى تارتۋ ماسەلەسى شەشىلسە، كەلەسى جىلدان باستاپ 50 گەكتار جەرگە كوكونىس ءوسىرۋدى قولعا الا باستايمىز. جوبانى جۇزەگە اسىرۋ 6 جىل كولەمىندە جۇرەدى. جىلىجاي تولىقتاي گوللانديالىق وزىق تەحنولوگيامەن سالىنادى» ، - دەيدى «ەكو- كۋلتۋرا» اگروكەشەنى حولدينگىنىڭ پرەزيدەنتى الەكساندر رۋداكوۆ.
ايتا كەتەيىك، وبلىس حالقىن جۇمىسپەن قامتۋ جانە وزىق تەحنولوگيالاردى يگەرۋ بويىنشا وڭىردە 480 جوبا قولعا الىنىپ جاتقان بولسا، سونىڭ 24 ى جىلى جايلارعا قاتىستى بولىپ وتىر.