تۇركىستانعا ءبىر جىلدا 1,1 ميلليونعا جۋىق ادام ساياحاتتادى - فوتو
بۇل تۋرالى «ازىرەت سۇلتان» مەملەكەتتىك تاريحي-مادەني قورىق-مۋزەيى ديرەكتورىنىڭ ورىنباسارى عاني ىسقاقوۆ مالىمدەدى، دەپ حابارلايدى قازاقپارات ءتىلشىسى.
«قوجا احمەت ياساۋي، ۇكاشا اتا، گاۋحار انا كەسەنەلەرى جانە ساۋران قالاشىعى تۋريستەردىڭ ەرەكشە قىزىعۋشىلىعىن وياتاتىن تاريحي نىساندار بولىپ وتىر. جىلدان-جىلعا تاريحي مادەنيەتىمىزبەن تانىسۋ ءۇشىن ارنايى كەلەتىن قوناقتاردىڭ سانى دا ارتىپ كەلەدى. سايكەسىنشە ولارعا كورسەتىلەتىن اقىلى قىزمەت اياسىندا تۇسەتىن قارجىلاي تابىستىڭ دا كولەمى ۇلعايۋدا. جالپى، اقىلى قىزمەتتەن تۇسكەن قاراجات مۋزەيدىڭ ماتەريالدىق-تەحنيكالىق بازاسىن نىعايتۋعا جانە قاجەتتىلىكتەرىنە، قىزمەتكەرلەردىڭ جالاقىسىن تولەۋگە جۇمسالادى»، - دەدى عاني ىسقاقوۆ.
قورىق-مۋزەيىنە كەلەتىن تۋريستەردىڭ قاتارىن ارتتىرا ءتۇسۋ ءۇشىن مۇندا ءبىرقاتار شارالار جۇزەگە اسىرىلا باستاعان. اتاپ ايتقاندا، تاريحي-مادەني ەسكەتكىشتەرگە «شتريح-كودتار» ورناتۋ ارقىلى تۋريستەر سمارتفوننىڭ كومەگىمەن نىسان تۋرالى قاجەتتى ماعلۇماتتى الا الادى. سونداي-اق ەسكەرتكىشتەردىڭ «3D- تۋر» ۆيرتۋالدى جوباسى دا ازىرلەنگەن. ياعني، الەمنىڭ كەز كەلگەن جەرىنەن ينتەرنەت جەلىسى ارقىلى قورىق-مۋزەيىنىڭ جادىگەرلەرى جايلى تولىقتاي اقپارات الىپ، ءىشىن ارالاپ كورۋگە مۇمكىندىك تۋادى.
ال «قوجا احمەت ياساۋي قورىق-مۋزەيىندە جەرلەنگەن حاندار، سۇلتاندار، باتىرلار جانە بيلەردىڭ ءتىزىمى ەلەكتروندى فورماتتا دايىندالعان. بۇعان دەيىن اتالعان ءتىزىم جاي عانا تاقتايشاعا جازىلىپ كەلگەن. قازىرگى تاڭدا قورىق-مۋزەيدىڭ جۇمىس ىستەۋ كەستەسى، وتكىزىلەتىن ءىس-شارالار تۋرالى اقپارات كەلۋشىلەرگە عيماراتتىڭ قاسبەتىندە ورنالاسقان «Led» ەكران ارقىلى ۇسىنىلىپ وتىرادى.
