قاراعاندىدا اۆتوبۋستار سوقتىعىسىپ، 1 ادام كوز جۇمىپ، 15 ى اۋرۋحاناعا جەتكىزىلدى

بۇگىن تاڭەرتەڭ قاراعاندى قالاسىنىڭ د س ك اۋدانىنداعى كوپىردە ەكى قوعامدىق كولىك سوقتىعىسىپ قالدى. اۆتوبۋستاردىڭ ءبىرىنىڭ جۇرگىزۋشىسى وقيعا ورنىندا كوز جۇمدى.

«جول - كولىك وقيعاسى سالدارىنان №41-اۆتوبۋس جۇرگىزۋشىسى وقيعا ورنىندا قايتىس بولدى، 15 جولاۋشى مەن №146-مارشرۋت جۇرگىزۋشىسى مەديتسينا مەكەمەسىنە جەتكىزىلدى. وقيعا بولعان كەزدە №41-اۆتوبۋس بوس بولدى»، - دەپ مالىمدەدى قاراعاندى وبلىسىنىڭ پ د باسپا ءسوز قىزمەتى.

اتالمىش فاكت بويىنشا قىلمىستىق ءىس تىركەلىپ، ءتيىستى ساراپتامالار تاعايىندالدى. قازىرگى ۋاقىتتا بولعان وقيعانىڭ ءمان-جايى انىقتالۋدا. كولىك اپاتى ورنىندا جەدەل- تەرگەۋ توبى، ت ج د قىزمەتكەرلەرى جۇمىس ىستەپ جاتىر.

اۆتوبۋس كوندۋكتورلارىنىڭ ءبىرى وسىعان دەيىن 112 قىزمەتىنە حابارلاسىپ، جولعا قۇم سەبۋ كەرەكتىگىن ايتقانى بەلگىلى بولدى.

قاراعاندى قالاسى اكىمدىگىنىڭ مالىمەتىنشە، جولدارعا قۇم سەبۋ تاڭعى التىدان بەرى جۇزەگە اسىرىلىپ جاتىر.