قازاقستاندا 1 جاسقا دەيىنگى سابيگە 10 ەكپە سالىنادى

استانا. قازاقپارات - قازاقستاندا بالا دۇنيەگە كەلگەننەن 1 جاسقا دەيىن 10 ەكپە سالىنادى. بۇل جايىندا قازاقپاراتتىڭ رەسمي ساۋالىنا وراي ەلىمىزدىڭ دەنساۋلىق ساقتاۋ مينيسترلىگىنەن ءمالىم ەتتى.

  «قازاقستاندا بالا دۇنيە كەلگەننەن 1 جاسقا تولعانعا دەيىن 10 ەكپە سالىنادى. ونىڭ ەكەۋى - تۋبەركۋلەز بەن  «В» ۆيرۋستىق گەپاتيتىنە قارسى ەكپە بالا دۇنيەگە كەلگەن العاشقى 4 كۇندە ەگىلەدى. قالعان 8- ءى الدىن الا ەكپە جاساۋ ۇلتتىق كۇنتىزبەسىنە سايكەس 2, 3, 4 جانە 12-15-ايلىق كەزىندە كوكجوتەل، ديفتەريا، سىرەسپە، b ۇلگىسىندەگى گەموفيلدى ينفەكتسيا، پوليوميەليت، پنيەۆموكوكك ينفەكتسياسى، پاروتيت، قىزىلشا،  «В» ۆيرۋستىق گەپاتيتىنە قارسى سالىنادى»، - دەلىنگەن حابارلامادا.

مينيسترلىك اقپاراتىنا سايكەس، قازاقستانداعى الدىن الا ەكپە جاساۋ ۇلتتىق كۇنتىزبەسى دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىنا ساي كەلەدى جانە اۆستريا، يزرايل، بەلگيا، گەرمانيا، تۇركيا، جاپونيا سىندى دامىعان ەلدەردىڭ يممۋنداۋ كەستەسىنە ۇقساس. ماسەلەن، گەرمانيادا بالا ءبىر جاسقا دەيىن - 10، فرانسيادا - 14 ، اۆستريادا - 12، بەلگيادا 8 ەكپە الادى.

سونداي- اق مينيسترلىك قازاقستانداعى الدىن الا ەكپە جاساۋ ۇلتتىق كۇنتىزبەسىنە وزگەرىستەر ەنگىزۋ جوسپارلانىپ وتىرماعاندىعىن حابارلادى. «الدىن الا ەكپە جاساۋ ۇلتتىق كۇنتىزبەسى دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىنا جانە دامىعان ەلدەردىڭ باسىم بولىگىنىڭ يممۋنداۋ كەستەسىنە ساي كەلەدى»، - دەلىنگەن اقپاراتتا.

 اۆتور: مارلان جيەمباي