قازاقستان مەن پولشانىڭ ءوزارا تاۋار اينالىمى 1 ميلليارد 100 ميلليون دوللارعا جەتتى

بۇل تۋرالى اقوردانىڭ باسپا ءسوز قىزمەتى حابارلادى.
باسپاءسوز ءماسليحاتى بارىسىندا قازاقستان پرەزيدەنتى وتكەن كەلىسسوزدەردىڭ جەمىستى بولعانىن ايتىپ، بيىل ەكى ەلدىڭ ديپلوماتيالىق قارىم- قاتىناسىنىڭ ورناعانىنا 25 جىل تولاتىنىن اتاپ ءوتتى.
- ءبىزدىڭ ەلدەرىمىزدى ورتاق تاريح بايلانىستىرادى. پولشا - قازاقستاننىڭ ەۋروپاداعى ەڭ جاقىن ءارى ماڭىزدى سەرىكتەسىنىڭ ءبىرى. ەلدەرىمىزدىڭ اراسىندا اسىرەسە ەكونوميكالىق سالا بويىنشا ءوزارا ءتيىمدى كوپتەگەن پەرسپەكتيۆالى باعىتتار بار. ەرتەڭ ەلىمىزدەگى ىسكەر توپتار وكىلدەرىنىڭ قاتىسۋىمەن ءىرى بيزنەس- فورۋم وتەدى. جالپى قۇنى 1 ميلليارد دوللار بولاتىن ەكىجاقتى كەلىسىمدەرگە قول قويۋ جوسپارلانىپ وتىر، - دەدى نۇرسۇلتان نازاربايەۆ.
مەملەكەت باسشىسى رەسپۋبليكامىزدا ەكى ەل اراسىنا دانەكەر بولىپ وتىرعان 40 مىڭعا جۋىق پولياك تۇرىپ جاتقانىن اتاپ ءوتتى.
- بيىل ولاردىڭ قازاقستانعا جەر اۋدارىلعانىنا 80 جىل تولادى. بۇلاردىڭ بارلىعى - ەلىمىزدە تۇرىپ جاتقان 130 دان استام ۇلت وكىلىمەن تەڭ قۇقىلى ءوز ازاماتتارىمىز. مەملەكەت ولارعا بارىنشا قولداۋ كورسەتىپ كەلەدى، - دەدى قازاقستان پرەزيدەنتى.
نۇرسۇلتان نازاربايەۆ قازاقستاننىڭ يندۋستريالىق الەۋەتى ارتىپ وتىرعانىنا نازار اۋداردى.
- 5 جىل ىشىندە مىڭعا جۋىق جاڭا ءوندىرىس كاسىپورنى ىسكە قوسىلدى. پولشا بيزنەسمەندەرىن وسى جۇمىسقا اتسالىسۋعا شاقىرامىن. بۇل ءۇشىن بارلىق جاعداي جاسالعان. ماسەلەن، كەلەسى جىلدان باستاپ ەكى ەلدىڭ ازاماتتارى ءۇشىن ۆيزاسىز رەجىم ەنگىزۋ جوسپارلانۋدا، تىكەلەي اۋە بايلانىسىن جولعا قويۋ مۇمكىندىگى قاراستىرىلىپ وتىر. بۇگىندە ءوزارا تاۋار اينالىمى 1 ميلليارد 100 ميلليون دوللارعا جەتتى. ارينە، بۇل قازىرگى الەۋەتىمىزدى تولىق كورسەتە المايدى، - دەدى مەملەكەت باسشىسى.
قازاقستان پرەزيدەنتى ەلدەرىمىزدىڭ ءتۇرلى باعىت بويىنشا ەكىجاقتى ىنتىماقتاستىعىن نىعايتۋعا مۇمكىندىگى بار ەكەنىن ايتتى.
- ارامىزداعى ءوزارا ەكونوميكالىق ءىس- قيمىلدى جانداندىرۋ جانە ازاماتتارىمىزعا جاڭا جۇمىس ورىندارىن اشۋ ءۇشىن جاعداي جاساۋ قاجەت. ەلدەرىمىز اراسىنداعى سەنىمدى دوستىق قارىم- قاتىناس حالىقتاردىڭ جاقىنداسا تۇسۋىنە سەپتىگىن تيگىزەتىنىنە سەنەمىن، - دەدى نۇرسۇلتان نازاربايەۆ.
سوڭىندا مەملەكەت باسشىسى پولشا پرەزيدەنتىن «ەكسپو-2017» حالىقارالىق كورمەسىنە شاقىرىپ، پولياك ىسكەر توپتارى وكىلدەرىنە استاناداعى حالىقارالىق قارجى ورتالىعىنىڭ قىزمەتىنە اتسالىسۋ جونىندە ۇسىنىس جاسادى.