ۇ ق ش ۇ ءتيىمدى جانە سۇرانىسقا يە حالىقارالىق قۇرىلىم رەتىندە ارەكەت ەتەدى - پرەزيدەنت
استانا. KAZINFORM - ۇ ق ش ۇ ۇجىمدىق قاۋىپسىزدىكتى قامتاماسىز ەتۋگە باعىتتالعان ءتيىمدى جانە سۇرانىسقا يە حالىقارالىق قۇرىلىم رەتىندە ارەكەت ەتەدى.
بۇل تۋرالى ۇ ق ش ۇ ۇجىمدىق قاۋىپسىزدىك كەڭەسى كەزەكتى سەسسياسىنىڭ كەڭەيتىلگەن قۇرامداعى وتىرىسىندا مەملەكەت باسشىسى قاسىم-جومارت توقايەۆ ايتتى.
«بۇگىندە ۇ ق ش ۇ ۇجىمدىق قاۋىپسىزدىكتى قامتاماسىز ەتۋگە باعىتتالعان ءتيىمدى جانە سۇرانىسقا يە حالىقارالىق قۇرىلىم رەتىندە ارەكەت ەتەدى. ونىڭ دامۋ جىلدارى ىشىندە مۇشە مەملەكەتتەر كەڭ اۋقىمدى ماسەلەلەر بويىنشا ءوزارا ءىس-قيمىلدىڭ باي تاجىريبەسىن جيناقتادى. اۋقىمدى نورماتيۆتىك-قۇقىقتىق بازا قالىپتاستىرىلدى. قازىرگى زامانعى سىن-قاتەرلەر مەن قاۋىپپەن كۇرەسۋدىڭ قاجەتتى تەتىكتەرى جولعا قويىلعان. ۇجىمدىق قاۋىپسىزدىك كۇشتەرى مەن قۇرالدارى قۇرىلدى جانە جۇمىس ىستەيدى»، - دەدى پرەزيدەنت.
مەملەكەت باسشىسىنىڭ اتاپ وتۋىنشە، ءبىرقاتار بەدەلدى، حالىقارالىق جانە وڭىرلىك ۇيىمدارمەن سىندارلى ىنتىماقتاستىق ورناتىلدى.
«2022-جىلى ۇ ق ش ۇ اياسىندا ءبىز ت م د- مەن جانە ش ى ۇ- مەن ىنتىماقتاستىقتى نىعايتۋ تۋرالى شەشىم قابىلدادىق. قالىپتاسقان يگى ءداستۇر رۋحىندا بۇگىنگى وتىرىسقا وسى حالىقارالىق ۇيىمداردىڭ باسشىلارى قاتىسىپ وتىر»، - دەدى قاسىم-جومارت توقايەۆ.
