ەڭ باستى مىندەت - تۇرعىندارىمىزدىڭ قاۋىپسىزدىگىن قامتاماسىز ەتۋ - ولجاس بەكتەنوۆ
استانا. KAZINFORM - مەملەكەت باسشىسى قاسىم-جومارت توقايەۆتىڭ تاپسىرماسى بويىنشا پرەمەر- مينيستر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ جەتەكشىسى ولجاس بەكتەنوۆ قازىرگى كەزدە سۋ تاسقىنىنا بايلانىستى كۇردەلى جاعداي قالىپتاسىپ وتىرعان قوستاناي وبلىسىندا ءجۇر.
ۇكىمەت باسشىسى سۋ دەڭگەيى قوستاناي، رۋدنىي قالالارى، ب. مايلين، دەنيسوۆسكي، ءجىتىقارا اۋداندارىنداعى جاعدايعا تىكەلەي اسەر ەتەتىن توبىل وزەنىن تىكۇشاقپەن ارالاپ كوردى.
سۋ قويمالارىنىڭ تولۋ دەڭگەيى ماكسيمالدى مەجەگە جاقىنداپ كەلەدى. ماسەلەن، جەلقۋار جانە امانگەلدى سۋ قويمالارى 100 پايىزعا، قاراتومار 97 پايىزعا، جوعارعى توبىل 93 پايىزعا تولىپ وتىر، سەرگەيەۆ جانە امانگەلدى سۋ قويمالارى ترانزيتتىك رەجيمدە ءوز قۋاتىنىڭ شەگىندە جۇمىس ىستەپ جاتىر.
بۇل رەتتە سۋدىڭ كەلۋى ونى وتكىزۋ كولەمىنەن اسىپ تۇسەدى. جاقىن ارادا، بولجام بويىنشا، ەرىگەن قار سۋىنىڭ جانە جوعارعى جاقتان كەلەتىن سۋدىڭ ەسەبىنەن سۋ دەڭگەيى تاعى دا ۇلعايادى دەپ كۇتىلۋدە. قوستاناي جانە توبىل قالالارىنا ىرگەلەس اۋماقتاردى سۋ باسۋى مۇمكىن.
ولجاس بەكتەنوۆ باستى مىندەت تۇرعىندارىمىزدىڭ قاۋىپسىزدىگىن قامتاماسىز ەتۋ ەكەنىن اتاپ ءوتتى. پرەمەر-مينيستر جاعدايدىڭ ناشارلاۋىنا جول بەرمەۋ ءۇشىن جاسالىپ جاتقان شارالارمەن تانىستى.
وڭىردە ەرىگەن قار سۋىن وتكىزۋ ماقساتىندا قوستاناي قالاسىنداعى كىشى كوپىر اۋدانىندا جۇمىس ىستەمەيتىن جول توسەمى اشىلدى، ەلدى مەكەندەردە ارنايى بوگەتتەر سالىنىپ، ەرىگەن سۋلاردى باسقا جاققا بۇرۋ ءۇشىن ارىقتار دايىندالۋدا، توپىراق تولتىرىلعان قاپشىقتار مەن ينەرتتى ماتەريالدار توسەلىپ، سۋدى سورۋ جانە باسقا دا جۇمىستار جۇرگىزىلىپ جاتىر. قاراسۋ جانە توبىل وزەندەرىندە مۇز جارۋ جۇمىستارى جۇرگىزىلدى.
جۇمىستار كۇشەيتىلگەن رەجيمدە جۇرگىزىلۋدە. 2000 عا جۋىق ادام، 650 دەن استام تەحنيكا، موتوپومپالار، سونداي-اق ءجۇزۋ قۇرالدارى مەن اۋە كەمەلەرى جۇمىلدىرىلدى.
وڭىردە سۋ تاسقىنى كەزەڭى باستالعاننان بەرى بارلىعى 3257 ادام قۇتقارىلدى جانە ەۆاكۋاتسيالاندى، ۋاقىتشا ورنالاستىرۋ پۋنكتتەرىنە 632 ادام ورنالاستىرىلعان، قالعاندارى ءوز ەركىمەن تۋىستارى مەن جاقىندارىنىڭ ۇيىنە بارۋعا شەشىم قابىلدادى. قوسىمشا ەۆاكۋاتسيالاۋ جانە ۋاقىتشا ورنالاستىرۋ پۋنكتتەرى تولىق دايىندىق رەجيمىندە.
جاعداي - تۇراقتى باقىلاۋدا.
