ىستەيمىن دەۋشىلەرگە تەگىن ۇيرەتەمىن. 22 جاستاعى جىگىت ەتىك تىگىپ، كاسىبىن دوڭگەلەتىپ وتىر
قازاقستاندا بىلعارىدان قازاقى ناقىشتا ەتىك تىگەتىندەر سانى ارتىپ كەلەدى، - دەپ حابارلايدى "حابار 24" تەلەارناسى.
قازاقستاندا بىلعارىدان قازاقى ناقىشتا ەتىك تىگەتىندەر سانى ارتىپ كەلەدى، - دەپ حابارلايدى "حابار 24" تەلەارناسى.
پاۆلودار وبلىسىنىڭ تۇرعىنى مەملەكەتتەن 5 ميلليون تەڭگە گرانت الىپ، شاعىن سەح اشقان. جاسى 20 دان ەندى اسقان ىسكەر ازامات كەلەشەكتە كاسىبىن كەڭەيتىپ، شاكىرت تاربيەلەۋ جاعىن دا ويلاستىرىپ جاتىر. بۇل اياق كيىم سەحىنىڭ اشىلعانىنا نەبارى 2 اپتا بولعان.
تۇرسىنبەك كەڭشىلىكتىڭ وتباسى وسىدان 3 جىل بۇرىن قىتايدان قونىس اۋدارعان. العاشىندا اكەسى ۇلىنىڭ باستاماسىن قۇپتاي قويماعان. ەتىك تىگەتىن تەرى مەن بىلعارىدان تاپشىلىق تۋىندايدى دەپ ويلاعان.
"بۇل كاسىپ قالاي بولار ەكەن، تاۋاردى باسقا جاقتان اكەلۋ كەرەك قوي دەدىم. سويتسەم، ماتەريالدىڭ ءبارى قازاقستاننىڭ وزىنەن شىعىپ جاتىر ەكەن. ءار وبلىستا ءارقالاي شىعىپ جاتىر. قوي تەرىلەرىن، سيىر تەرىلەرىن مانەرلەپ، سودان كەيىن وسى بالامدى قولداپ، قۋاتتاپ جاتىرمىن"، - دەدى ۋسپەن اۋىلىنىڭ تۇرعىنى تۇرسىنبەك كەڭشىلىك.
ەتىك تىگۋگە كەرەك شيكىزات كوزىن كاسىپكەر وڭتۇستىكتەن اكەلەدى. كەيىنگى جىلدارى بىلعارى باپتاپ، تەرى يلەيتىن زاۋىت ەلىمىزدە كوپتەپ اشىلىپ جاتىر. ەڭ باستىسى، ءونىمنىڭ ساپاسىندا ءمىن جوق.
"بۇل - قولتىراۋىن تەرىسىنە ۇقساپ جاسالعان تەرىلەر. بۇل اياققا جۇمساق ءارى ىڭعايلى كەلەدى. اياق كيىم شىعارساق تا، ءماسى تىكسەك تە، بۇل تەرىلەر وتە ىڭعايلى. سونداي جۇمساق، سوزىلعىش كەلەدى. اياققا جۇمساق، باتپايدى. ەرەكشەلىگى وسىندا"، - دەدى كاسىپكەر ەرزادا تۇرسىنبەك.
22 جاستاعى ەرزادا دا ەتىكشىلىكتىڭ قىر-سىرىن ابدەن مەڭگەرگەن. بولاشاقتا شاكىرت تاربيەلەسەم دەپ ارماندايدى. ازىرگە ساپتاما ەتىك، ءماسى، كەبىسپەن قاتار سپورتتىق جانە كلاسسيكالىق ۇلگىدەگى اياقكيىم تۇرلەرىن تىگىپ جاتىر.
"جاڭادان باستاپ جاتقاندىقتان، ەندى كوپ اياقكيىمدى ءبىر كۇندە شىعارىپ ۇلگەرە الماي جاتىرمىز. ىستەيتىن ادام از بولىپ جاتىر. ال ەندى ىستەيمىن دەپ جاتقان كىسىلەر بولسا، ۇيرەنەم دەگەن جاستار بولسا، جاقسى بولار ەدى. مەن ءوزىم تەگىن ۇيرەتەمىن. 3 ايدىڭ ىشىندە ءبىر مامان بولىپ شىعۋىنا كومەكتەسەمىن"، - دەدى كاسىپكەر ەرزادا تۇرسىنبەك.
بۇعان قاتىستى ۋسپەن اۋداندىق كاسىپكەرلىك ءبولىمىنىڭ باسشىسى پىكىر ءبىلدىردى.
"بىزدە "ىسكەر" باعدارلاماسى بار. بيىل 20 جوبا ىسكە اسىرىلدى. سونىمەن قاتار، "اۋىل اماناتى" باعدارلاماسى. بيىل 2,5 پايىزبەن 14 جوبا قارجىلاندىرىلدى. نەگىزگى 90 پايىزى مال شارۋاشىلىعىن دامىتۋعا باعىتتالعان. قالعاندارى مال سويۋ الاڭدارىن مودەرنيزاتسيادان وتكىزۋ جانە تاعى باسقا باعىتتار بويىنشا"، - دەدى ۋسپەن اۋداندىق كاسىپكەرلىك ءبولىمىنىڭ باسشىسى ايدوس جاقىپوۆ.
شاعىن كاسىپتى 5 ميلليون تەڭگە مەملەكەتتىك گرانتپەن باستاعان كاسىپكەر ايىنا كەم دەگەندە 50 اياق كيىم شىعارۋدى جوسپارلاپ وتىر. ەكولوگيالىق تازا، تابيعي ماتەريالداردان تىگىلگەن ونىمگە سۇرانىس جوعارى بولاتىنىنا سەنىمدى. قازاقى اياقكيىمدەرگە ينتەرنەت ارقىلى تاپسىرىس الىپ، الەمنىڭ كەز كەلگەن بۇرىشىنا جونەلتۋگە دايىن.
