پەتروپاۆل بوتانيكالىق باعىن رەسەيگە كوشىرۋدى سۇراعان ديرەكتور كوپشىلىكتىڭ اشۋىنا ءتيدى

پەتروپاۆلداعى بوتانيكالىق باق ديرەكتورى ارتۋر ريازاپوۆ كەشەندەگى زووباق جانە مۋزەي كوللەكتسياسىن تاتارستانعا ەۆاكۋاتسيالاۋدى سۇراپ، سول ەلدىڭ پرەزيدەنتىنە حات جازدى.

ونىڭ بۇل ارەكەتى تۇرعىنداردىڭ نارازىلىعىن تۋعىزىپ جاتىر، دەپ حابارلايدى قازاقپارات ءتىلشىسى.

كەشە الەۋمەتتىك جەلىدە پەتروپاۆلداعى بوتانيكالىق باق ديرەكتورى ارتۋر ريازاپوۆتىڭ تاتارستان پرەزيدەنتىنىڭ اتىنا كومەك سۇراپ جازعان حاتى جاريا بولدى.

كەشەن باسشىسىنىڭ ايتۋىنشا، جاعداي وزگەرمەسە كوپ جىلعى ەڭبەك زايا كەتىپ، باق جويىلۋى مۇمكىن.

بۇل حات تۇرعىنداردىڭ اشۋىن تۋعىزدى.

كەيىن جازبا استىنا حات اۆتورى جاۋاپ قالدىرىپ، جاعدايدى تۇسىندىرمەك بولدى.

ارتۋر ريازاپوۆتىڭ ايتۋىنشا، ولار وسىلايشا بوتانيكالىق باقتى ساقتاپ قالماق.

قالانىڭ كوممۋنالدىق مەنشىگىنە بەرىلگەنىمەن، ماسەلە شەشىلمەگەن. ول حاتتى جازۋعا نە سەبەپ بولعانىن ءتىزىپ بەردى.

سونىڭ ىشىندە مەملەكەتتىك زاڭدى تۇلعانىڭ بەرىلمەۋى، باق اۋماعىن ۇلكەيتۋگە مۇمكىندىكتىڭ بولماۋى، ماڭىندا قۇرىلىستىڭ جۇرگىزىلۋى سياقتى ءبىرقاتار ماسەلە بار.

«باقتىڭ قاي ۆەدومستۆوعا قارايتىنى دا بەلگىسىز. سونداي-اق بوتانيكالىق باققا ونىڭ نەگىزىن قالاۋشى، قازاقستاننىڭ ەڭبەگى سىڭگەن اگرونومى، پەتروپاۆلدىڭ قۇرمەتتى ازاماتى، پروفەسسور راۆيل ريازاپوۆتىڭ ەسىمى بەرىلمەدى... ءبىزدىڭ باق قۇرىپ بارادى، ەندەشە ول تاتارستاندا جاڭعىرسىن!»، دەپ جازدى ارتۋر ريازاپوۆ.

پەتروپاۆل قالالىق ءبىلىم ءبولىمىنىڭ مالىمەتىنشە، بوتانيكالىق باق ءتيىستى دەڭگەيدە قارجىلاندىرىلىپ كەلەدى. ماسەلەن بيىل بۇل مەكەمەنى كۇتىپ ۇستاۋعا جانە جوندەۋگە 90 ميلليون تەڭگەدەن ارتىق قاراجات بولىنگەن.

«عاسىرلىق تاريحى بار پەتروپاۆلداعى بوتانيكالىق باق 2018 -جىلى «جاس دارىن» مۋزىكالىق مەكتەبىنىڭ بالانسىنا بەرىلدى. سول ۋاقىتتان بەرى بۇل نىسانعا 320 ميلليون تەڭگە بولىنگەن. بيىل 90 ميلليون تەڭگەدەن ارتىق قارجى بولىنسە، ونىڭ 20 ميلليون تەڭگەدەن استامى ماتەريالدىق بازاسىن نىعايتۋعا جانە شاتىرىنا اعىمداعى جوندەۋ جۇمىسىن جۇرگىزۋگە جۇمسالدى»، - دەلىنگەن ۆەدومستۆونىڭ جاۋابىندا.