ۇلى دالا جورىعى-2023: بايگە جەڭىمپازدارى انىقتالدى
شاباندوزدار ەلوردادان 1300 شاقىرىم قاشىقتىقتاعى تۇركىستانعا جەتتى، دەپ حابارلايدى قازاقپارات ءتىلشىسى.
«ۇلى دالا جورىعى» رەسپۋبليكالىق مارافون-بايگەسىنىڭ 14-كەزەڭى اياقتالىپ، بۇگىن تاڭعى ساعات 7:00 دەن باستاپ سوڭعى 50 شاقىرىمدى ەڭسەرگەن 4 كوماندا ىشىندە جەتىسۋ وبلىسىنىڭ شاباندوزدارى توپ جارىپ، مارەگە ءبىرىنشى جەتتى.
وسىلايشا جەڭىمپاز جەتىسۋ وبلىسىنىڭ كومانداسى باس جۇلدەگە (18000000 تەڭگە) يە بولدى. اقتوبە وبلىسى كومانداسى 2- ورىن ءۇشىن - 16000000 تەڭگە، ال 3-ورىن يەگەرى الماتى قالاسىنىڭ كومانداسى 9000000 تەڭگەنى قانجىعاسىنا بايلايدى.
تورەشىلەردىڭ شەشىمىمەن، مارەگە 4-بولىپ كەلگەن اباي وبلىسىنىڭ كومانداسىنا 5000000 تەڭگە بەرىلەتىن بولدى.
العاشقى تورتتىككە كىرگەن كوماندالاردىڭ ۋاقىت كورسەتكىشى:
جەتىسۋ وبلىسى - 93 ساعات 47 مينۋت 43 سەكۋند
اقتوبە وبلىسى - 95 ساعات 06 مينۋت 37 سەكۋند
الماتى قالاسى - 104 ساعات 23 مينۋت 57 سەكۋند
اباي وبلىسى - 112 ساعات 12 مينۋت 46 سەكۋند
سونىمەن قاتار سوڭعى كەزەڭدە ماڭعىستاۋ وبلىسىنىڭ «اداي» جىلقىسى رەكورد جاسادى. «رەكورد» كومانداسىنداعى 21 جاستاعى ماعجان ابدول ۇلى 1300 شاقىرىمنىڭ سوڭعى 50 شاقىرىمىن باعىندىرۋعا تاڭعى ساعات 7:10 دا اتتانىپ، تۇركىستانداعى مارە سىزىعىن 08 ساعات 44 مينۋت 09 سەكۋندتا ءبىرىنشى بولىپ كەستى. استانادان تۇركىستانعا دەيىنگى 1300 شاقىرىمدى باستان-اياق 1 اتپەن ەڭسەرۋدى ماقسات ەتكەن «رەكورد» كومانداسىنىڭ قۇرامى استانا قالاسى، ماڭعىستاۋ مەن جەتىسۋ وبلىستارىنىڭ شاباندوزدارىنان قۇرالعان.
ەسكە سالا كەتسەك، «ۇلى دالا جورىعى» رەسپۋبليكالىق مارافون- بايگەسى 5-19 قىركۇيەك ارالىعىندا ءوتتى. بايگەگە ەلىمىزدىڭ 19 وڭىرىنەن كوماندا قاتىستى. مارافونعا قاتىسۋشىلاردىڭ ەلىمىزدىڭ كيەلى جەرلەرى جوشى حان، الاشا حان كەسەنەلەرى جانە تۇركىستان قالاسى سياقتى تاريحي ورىندارعا زيارات جاساۋ مۇمكىندىگى تۋدى.
جەڭىمپازداردى ماراپاتتاۋ ءراسىمى كەشكى ساعات 18:30 دا «تۇركىستان-ارەنا» ستاديونىندا وتەدى.