بەيبىت تۇرعىندارعا وق اتقان ەر ادام 30 جىلعا سوتتالدى

استانا. KAZINFORM - بەيسەنبى، 4-شىلدەدە وسلو ايماقتىق سوتى 2022 -جىلى نورۆەگيا استاناسىنداعى تۇنگى كلۋبتىڭ الدىندا قارۋدان وق اتقان اتىسقا قاتىستى ۇكىم شىعاردى. AP كەلتىرگەن سوت شەشىمىنە سايكەس، سوتتالۋشى - يراندىق نورۆەگيا ازاماتى زانيار ماتاپۋر لاڭكەستىك ارەكەت ءۇشىن كىنالى دەپ تانىلىپ، 30 جىلعا باس بوستاندىعىنان ايىرىلدى، دەپ حابارلايدى DW اقپارات اگەنتتىگى.

سوت قاۋلىسى بويىنشا، 45 جاسار ەر ادام بەيبىت تۇرعىندارعا اۆتوماتتان 10، تاپانشادان سەگىز وق اتقان. پروكۋراتۋرانىڭ مالىمەتىنشە، ماتاپۋر «يسلام مەملەكەتى» (قازاقستاندا تىيىم سالىنعان - رەد.) لاڭكەستىك ۇيىمىنا ادال بولۋعا انت بەرگەن.

سوت بارىسىندا ايىپتاۋشى مەن قورعاۋشى دا ماتاپۋردىڭ كوپشىلىككە وق جاۋدىرعانىن ءارى بۇل ارەكەتتىڭ لاڭكەستىككە قاتىسى بار ەكەنىمەن تولىق كەلىستى. الايدا سوتتالۋشىنىڭ ادۆوكاتى قورعاۋىنداعى ادامدى شابۋىل جاساۋعا ارانداتىپ، ءوزىن «يسلام مەملەكەتىنىڭ» جوعارى لاۋازىمدى مۇشەسى رەتىندە تانىستىرعان دانيا بارلاۋ اگەنتى ەكەنىن العا تارتىپ، اقتاۋ ۇكىمىن سۇرادى.

وسلو ورتالىعىنداعى اتىس 2022 -جىلدىڭ 25-ماۋسىمىنا قاراعان ءتۇنى ءبىر-بىرىنە جاقىن ورنالاسقان ءۇش مەكەمە اۋلاسىندا بولدى. شابۋىل سالدارىنان ەكى ادام مەرت بولىپ، 21 ادام جاراقات الدى.

كورولدىك پرەمەر-ءمينيسترى يوناس گار ستەرە بۇل وقيعانى «جازىقسىز ادامدارعا جاسالعان قاتىگەز شابۋىل» دەپ اتادى. 25-ماۋسىمدا وسلودا جىل سايىنعى Oslo Pride گەيلەر شەرۋى ءوتۋى ءتيىس ەدى، ءبىراق ۇيىمداستىرۋشىلار پوليتسيانىڭ ۇسىنىسى بويىنشا وتكىزۋدەن باس تارتتى.

اۆتور

زارينا تۋعانبايەۆا