ولجاس بەكتەنوۆ ەگىن جيناۋ ناۋقانىن ەرەكشە باقىلاۋدا ۇستاۋدى تاپسىردى

استانا. KAZINFORM - ۇكىمەت باسشىسى ولجاس بەكتەنوۆ ەگىن جيناۋ ناۋقانىنا دايىندىق ماسەلەلەرى جونىندە كەڭەس وتكىزدى.

جيىندا اۋىل شارۋاشىلىعى ءمينيسترى، ەكولوگيا جانە تابيعي رەسۋرستار، ەنەرگەتيكا ۆيتسە-مينيسترلەرى، سونداي-اق اقمولا، قوستاناي، سولتۇستىك قازاقستان جانە جامبىل وبلىستارىنىڭ اكىمدەرى تىڭدالدى.

مەملەكەت باسشىسىنىڭ تاپسىرماسى بويىنشا ۇكىمەت بيىلعى كوكتەمگى ەگىس جانە ەگىن جيناۋ جۇمىستارىن جۇرگىزۋگە 580 ميلليارد تەڭگە كولەمىندە رەكوردتىق قاراجات ءبولدى. اۋىل شارۋاشىلىعى تەحنيكاسىن ليزينگكە ساتىپ الۋعا باعىتتالعان سوما 5 ەسەگە ۇلعايتىلدى. مەملەكەت تاراپىنان كورسەتىلەتىن قولداۋ شارالارىن كەڭەيتۋ شارۋالارعا ەگىس ناۋقانىن ءساتتى وتكىزۋگە مۇمكىندىك بەردى.

اۋىل شارۋاشىلىعى مينيسترلىگىنىڭ مالىمەتىنشە، قازاقستاندا جاپپاي ەگىن جيناۋ جۇمىستارى تامىزدىڭ ءۇشىنشى ون كۇندىگىندە باستالادى. بۇگىنگى تاڭدا اۋىل شارۋاشىلىعى تەحنيكاسىنىڭ دايىندىعى � قۇرايدى. بارلىعى 149 مىڭنان استام تراكتور، 38 مىڭ استىق جينايتىن كومباين جانە 14 مىڭ دەستەلەگىش تارتىلاتىن بولادى.

ۇكىمەت باسشىسى ۆيتسە-پرەمەر سەرىك ءجۇمانعاريننىڭ باسشىلىعىمەن ءتيىستى مينيسترلىكتەر، اكىمدىكتەر مەن شارۋالار اراسىنداعى جۇمىستى ۇيلەستىرۋ مەن باقىلاۋ ءۇشىن ەگىن جيناۋ ناۋقانىن وتكىزۋ جونىندەگى جەدەل شتاب قۇرۋدى تاپسىردى.

«ەگىندى ساپالى جيناپ الۋ جانە ساقتاۋ ەلىمىز ءۇشىن ەرەكشە ماڭىزعا يە. تۋىندايتىن بارلىق ماسەلەنى كۇندەلىكتى پىسىقتاۋ قاجەت. بۇل تەك مينيسترلىكتەرگە عانا ەمەس، اكىمدىكتەر مەن فەرمەرلەردىڭ وزدەرىنە دە قاتىستى. اۋىل شارۋاشىلىعى مينيسترلىگىنە وبلىستاردىڭ اكىمدىكتەرىمەن بىرلەسىپ، ەگىن جيناۋ جۇمىستارىن ەرەكشە باقىلاۋدا ۇستاۋدى تاپسىرامىن. ءداندى داقىلداردى ساقتاۋدىڭ ءتيىستى جاعدايىن قامتاماسىز ەتۋ دە ماڭىزدى»، - دەپ اتاپ ءوتتى ولجاس بەكتەنوۆ.

شارۋالارعا كۇزگى دالا جۇمىستارىن جۇرگىزۋگە 64 مىڭ توننادان استام جەڭىلدىگى بار ديزەل وتىنى جونەلتىلدى. بەكىتىلگەن كەستەگە سايكەس، وڭىرلەرگە بارلىعى نارىق باعاسىنان تومەن دەڭگەيدە تىركەلگەن باعا بويىنشا شامامەن 355 مىڭ توننا جەتكىزىلەتىن بولادى. ديزەل وتىنىن جەتكىزۋدى باقىلاۋ جانە اشىقتىعىن قامتاماسىز ەتۋ بويىنشا شارالار قابىلداندى.

ولجاس بەكتەنوۆ ماسەلەنى تۇراقتى باقىلاۋدا ۇستاۋدى مىندەتتەدى، قاجەتتىلىك تۋىنداعان جاعدايدا شارۋالارعا استىقتى كەپتىرۋگە ديزەل وتىنىنىڭ قوسىمشا كولەمى بولىنەدى.

رەسپۋبليكادا استىق ساقتاۋدىڭ جالپى سىيىمدىلىعى 30 ميلليون توننانى قۇرايدى، بۇل بولجانىپ وتىرعان ەگىن كولەمىن ساقتاۋعا جەتكىلىكتى. سونىمەن قاتار جەكەلەگەن استىق قويمالارىنىڭ جۇكتەمەسى ءالى كۇنگە جوعارى بولىپ وتىر.

پرەمەر-مينيستر ەليەۆاتورلاردى وتكەن جىلعى ەگىن قالدىقتارىنان 10-قىركۇيەككە دەيىن بوساتۋدى تاپسىردى. وبلىستاردىڭ اكىمدىكتەرى باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ، ەليەۆاتورلار قىزمەتى باعاسىنىڭ نەگىزسىز وسۋىنە جول بەرمەۋى ءتيىس.

وندىرىلگەن اوك ونىمدەرىن، ونىڭ ىشىندە نەگىزگى ەكسپورت نارىقتارىندا وتكىزۋدى قامتاماسىز ەتۋدىڭ ماڭىزى اتاپ ءوتىلدى. ساۋدا جانە ينتەگراتسيا مينيسترلىگى قىتاي، تاياۋ شىعىس، افريكا جانە باسقا دا ەلدەردەگى سەرىكتەستەرمەن وسى باعىتتاعى جۇمىستى جانداندىرۋى قاجەت.

ايتا كەتەيىك، قازاقستانداعى اۋىل شارۋاشىلىعى داقىلدارىنىڭ جالپى اۋدانى 23,3 ميلليون گەكتاردى قۇرايدى، ونىڭ ىشىندە ءداندى داقىلداردىڭ اۋدانى - 16,7 ميلليون گەكتار. ەگىس القاپتارىنىڭ قۇرىلىمىنا سايكەس بارلىق وڭىردە ەگىن جيناۋ جۇمىسى باستالدى. بۇگىنگى تاڭدا 928,2 مىڭ گەكتار ءداندى جانە بۇرشاقتى داقىلدار نەمەسە %5,5 جينالدى. ورتاشا ونىمدىلىگى 19,3 ت س/گەكتار بولعان كەزدە 1,8 ميلليون توننا استىق باستىرىلدى. سونداي-اق 418,2 مىڭ توننا كارتوپ جانە 940,3 مىڭ توننا كوكونىس جينالدى.