تۇتاس قوعام تۇرمىستىق زورلىققا توزبەۋى كەرەك - سۆەتلانا جاقىپوۆا
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا تۇرمىستىق زورلىق-زومبىلىققا قارسى كۇرەس تۋرالى پىكىر ءبىلدىردى، دەپ حابارلايدى Kazinform اگەنتتىگى.
«ءسىز مينيسترلەر كابينەتىندەگى از ايەلدىڭ ءبىرىسىز. سوڭعى وقيعالارعا بايلانىستى قوعامدا تۇرمىستىق زورلىق-زومبىلىق تاقىرىبى قىزۋ تالقىلانۋدا. ءسىزدىڭ پىكىرىڭىزشە، مۇنىمەن كۇرەسۋ ءۇشىن نەنى وزگەرتۋ كەرەك؟»، - دەپ سۇراق قويدى تىلشىلەر ءماجىلىس كۋلۋارىندا.
«ءبىز سوڭعى 5 جىل بويى زاڭداردى كۇشەيتىپ كەلەمىز، ءبىراق مۇندا جەكەلەگەن نورمالار نەگىزىنەن كوپشىلىك اراسىندا قابىلدانبايدى. مەنىڭ ويىمشا، وتباسىلىق ساياسات تولىعىمەن قايتا قارالۋى كەرەك. وتباسىنداعى تاربيە، ەر مەن ايەل قاتىناسى، اتا-انا مەن بالا اراسىنداعى قارىم-قاتىناس مادەنيەتى - مۇنىڭ ءبارىن تولىعىمەن قايتا قاراۋ كەرەك. بالكىم بىزگە باسقا قۇندىلىقتار سيفرلاندىرۋ عاسىرىمەن، الەۋمەتتىك جەلىلەر ارقىلى كەلگەن بولۋى مۇمكىن. وسىعان قاراماستان، كەيبىر نارسەلەردى تۇبەگەيلى وزگەرتۋ قاجەت بولۋى مۇمكىن»، - دەپ جاۋاپ بەردى س. جاقىپوۆا.
مينيستر تۇرمىستىق زورلىق-زومبىلىققا قارسى قاتاڭ تالاپتار قوعامدىق شەشىم بولۋى كەرەگىن باسا ايتتى.
«ياعني، تۇتاس قوعام تۇرمىستاعى زورلىققا توزبەۋى كەرەك. ءبىر رەت قولىن كوتەرسە، كەشىرە سالايىن دەگەن وي بولماۋى كەرەك. ەگەر ەرتەڭ بۇل نورما بولىپ كەتسە، باسقا جاعدايدا بولامىز»، - دەدى ەڭبەك ءمينيسترى.
ايتا كەتەيىك، بۇگىن پرەزيدەنت قاسىم-جومارت توقايەۆ ىشكى ىستەر مينيسترلىگىنە ەلوردا مەيرامحانالارىنىڭ بىرىندە بولعان كىسى ولىمىنە قاتىستى رەزونانستى وقيعانى ەرەكشە باقىلاۋعا الۋدى تاپسىردى.