پەتروپاۆل تۇرعىنى ءوز قاراجاتىنا اۋلاعا ەرەكشە اتكەنشەكتەر ورناتتى
پەتروپاۆل. KAZINFORM - پەتروپاۆل تۇرعىنى الەكساندر گۋسيەۆ كوپقاباتتى تۇرعىن ءۇيدىڭ اۋلاسىنا ەرەكشە اتكەنشەكتەر قۇراستىرىپ ورناتتى.
قاۋىپسىزدىكتى باستى ورىنعا قويعان ەر ادام جاقىندا بالالارعا تاعى ءبىر تارتۋ جاساپ، ەرتەگى كەيىپكەرلەرىنىڭ مۇسىندەرىن ورناتپاق.
اتكەنشەكتىڭ ەرەكشەلىگى - ول توقپەن اينالىپ، 2 مينۋتتان سوڭ توقتايدى. سونداي-اق ۇستىندەگى كولونكاعا بليۋتۋز ارقىلى قوسىلىپ، بالاعا ەرتەگى، نە بولماسا، ءان قوسىپ قويۋعا بولادى.
«قىس بويى جۇمىس ىستەدى. قازىر كورشى اۋلالاردان دا بالالار كەلەدى. قاسىمىزدا مەكتەپ ورنالاسقان، سوندىقتان الاڭ بوس تۇرمايدى. بالا بولعاسىن وينايدى، كەيدە بىرنەشەۋى ءمىنىپ، سىندىرىپ كەتەدى. قايتا ىستەپ، ىسكە قوسامىن.
قازىرگى ورناتىلىپ جاتقان اتكەنشەكتەردىڭ كوپشىلىگى دەنساۋلىققا قاۋىپتى، ويتكەنى، قولدانىسقا بەرىلگەن كەزدە بەلگىلى ءبىر تالاپ بويىنشا تەكسەرىلمەيدى، ياعني گوست جوق. سول سەبەپتى اۋلامداعى بالالارعا قاۋىپسىز، ءارى ەرەكشە اتكەنشەكتەر جاساپ بەرگىم كەلدى. رەسەيدە كورگەنىم بار ەدى، مىسالى، مىنا 3D «اۆاتار» دەپ اتالاتىن اتكەنشەكتىڭ وتىرعىشتارىن كورشى ەلدىڭ زاۋىتىنان تاپسىرىسپەن العىزدىم. سول سياقتى، ۇستىندەگى بۋىنى جوبا بويىنشا اۆتوموبيل كاردانىنان جاسالعان. ول تىعىز قوزعالادى، مەن ونى وزىمشە جەتىلدىردىم.
ۇقساس اتكەنشەكتەردە ءبىر جاعىنداعى بالا سەكىرىپ تۇسسە، ەكىنشىسى جەرگە قۇلايدى. ال بۇل جەردە ونداي قاۋىپ جوق، جوعارى-تومەن عانا ەمەس، جان-جاققا قوزعالادى»، - دەيدى الەكساندر گۋسيەۆ.
بالالاردىڭ ويىن الاڭى جوبا بويىنشا 20/20 مەتر جەردى الۋى ءتيىس. بىلتىر كوپقاباتتى ءۇيدىڭ كەزەگى جەتىپ، قالالىق اكىمدىكتىڭ باعدارلاماسىمەن الاڭ جوندەلۋى كەرەك ەدى. ءبىراق، قالا تۇرعىنىنىڭ ايتۋىنشا، اكىمدىك وكىلى كەلىپ، قاراپ، «سىزدەردە الاڭ سالۋعا قولايلى ورىن جوق» دەگەن سىڭايمەن كەتىپ قالعان. كەيىن قانشا رەت حابارلاسسا دا، جاۋاپ بولماپتى.
الەكساندر گۋسيەۆ كەزىندە پەتروپاۆلداعى قورعانىس زاۋىتتارىنىڭ بىرىندە ەڭبەك ەتكەن. 1980-جىلداردىڭ سوڭىندا تۇرمىستىق تەحنيكا، سونىڭ ىشىندە «رومانتيك» ماگنيتوفوندارىن شىعارعان. قازىر ءوزى تۇرىپ جاتقان كوپقاباتتى ۇيدە قوعامدىق نەگىزدە پاتەر يەلەرى كووپەراتيۆىن باسقارادى.
«قورعانىس زاۋىتىندا جۇمىس ىستەدىم، كەيىن كاسىپورىن قۇلدىراعاننان كەيىن ەنەرگەتيكا سالاسىنا كەتتىم. ماعان تەحنيكامەن جۇمىس ىستەۋدىڭ تۇك قيىندىعى جوق. مەن ءۇشىن وسىنداي دۇنيە جاساۋ - دەمالىس، سۇيىكتى ءىس دەسەم دە بولادى. نەگىزگى جۇمىسىمنان قولىم بوساعان كەزدە اينالىسامىن. زەينەتكەرمىن، ءبىراق شاعىن كومپانيانى باسقارامىن. ءبىز جىلۋ پۋنكتتەرىن، ناسوس ستانسالارىن جوبالايمىز، سالامىز، جوندەيمىز»، - دەيدى الەكساندر گۋسيەۆ.
قازىر الەكسەي اۋلاعا ورناتۋعا شاعىن مۇسىندەردى جاساپ جاتىر. بەرىك، ءارى، زيانسىز بولۋى ءۇشىن قاۋىپسىز ماتەريالداردى قولدانادى. وسىلايشا جاڭا جىلعا دەيىن ەرتەگى كەيىپكەرلەرىن ورناتىپ، بالالارعا تارتۋ جاساماق.
شەبەر كوپقاباتتى ۇيگە قويىلاتىن جىلۋ ەسەپتەگىش قۇرىلعىسىن دا جەتىلدىرگەن. قازىر ءار تۇرعىن ۇيالى تەلەفونى ارقىلى ءتىپتى ءبىر ساعات ىشىندە قانشا ەنەرگيانى تۇتىنعانىن كورە الادى.
«بارلىق ارحيۆ وسىندا ساقتالعان. قانشا پايدالاندى، انىق كورىنىپ تۇر. ياعني، تۇتىنۋشىلار كوممۋنالدىق اقىنى از تولەيدى. پاتەرلەردە جايلى تەمپەراتۋرا ساقتالىپ، تەرەزە اشىپ، دالانى جىلىتپايمىز. مۇنى قالاداعى باسقا ۇيلەرگە دە قويۋعا بولادى، تەگىن ىستەپ بەرۋگە دايىنمىن. ءبىراق، وكىنىشكە وراي ەشكىمگە كەرەك ەمەس. قازىرگى جىلۋ ەسەپتەگىش قۇرالدارىنىڭ قالاي ەسەپتەيتىنى كوپشىلىككە بەيمالىم. مىسالى كورشى ۇيگە ەنەرگەتيكالىق كومپانيانىڭ باقىلاۋشىسى كەلىپ، وسى ايدا سىزدەر جىلۋ ءۇشىن ءار شارشى مەترگە وسىنشا تولەيسىڭدەر دەپ ايتادى ەكەن. ال ول سيفردىڭ قايدان كەلگەنىن ەشكىم بىلمەيدى. بىزدە ءبارى اۆتوماتتاندىرىلعان»، - دەيدى الەكسەي گۋسيەۆ.
بۇعان دەيىن جۇمىستان بوس ۋاقىتىندا كەستە تىگىپ، تەمىردەن ءتۇرلى بۇيىم جاسايتىن اۋىل اكىمى تۋرالى جازعان ەدىك.