تۇركىستان تۇركى الەمىنىڭ تۋريستىك استاناسىنا اينالدى - ديماش قۇدايبەرگەن
تۇركىستان. KAZINFORM - بۇگىن قازاقتىڭ ماقتانىشى، ءانشى ديماش قۇدايبەرگەن تۇركىستان قالاسىنا كەلدى. وبلىس اكىمى دارحان ساتىبالدى انشىمەن ارنايى كەزدەسىپ، قۇرمەت كورسەتتى.
تۇركىستان وبلىسىنىڭ اكىمى دارحان ساتىبالدى ەلىمىزدىڭ اتىن الەمدىك ارەنادا تانىتىپ جۇرگەن جاس ونەرپازدىڭ الداعى جۇمىستارىنا ساتتىلىك تىلەدى. سونداي-اق، بۇل ساپاردىڭ وڭتۇستىك ءوڭىرىنىڭ رۋحانيات سالاسىنا، ءوڭىر تۋريزمىن دامىتۋعا زور سەرپىن بەرەتىندىگىن ايتىپ ءوتتى.
«قازىرگى تاڭدا، وڭىردە رۋحانيات سالاسىندا ءبىرقاتار باستامالار قولعا الىنىپ، جۇزەگە اسىپ جاتىر. رەسپۋبليكالىق، حالىقارالىق دەڭگەيدەگى شارالار - وڭىرىمىزگە تۋريستەردىڭ، قادىرلى قوناقتاردىڭ كەلۋىنە سەبەپ بولىپ وتىر. سولاردىڭ ءبىرى - «Voice of Turan» حالىقارالىق قازاق اندەرىن ورىنداۋشىلار بايقاۋى. بيىل 5-رەت ۇيىمداستىرىلىپ وتىرعان بايقاۋدا الەمنىڭ 20 عا جۋىق ەلىنەن ونەرپاز قاتىسىپ، قازاق اندەرىن شىرقايدى. وسى بايقاۋ بارىسىندا الەمنىڭ قاي ەلىندە بولماسىن انشىلەردىڭ ءسىزدىڭ ورىنداعان اندەرىڭىزگە دەگەن قىزىعۋشىلىعى باسىم ەكەندىگى بايقالادى. بۇل - ءبىز ءۇشىن قۋانىش ءارى زور جاۋاپكەرشىلىك»، - دەگەن وبلىس اكىمى ءانشىنى حالىقارالىق قازاق اندەرىن ورىنداۋشىلار بايقاۋىنا قۇرمەتتى قوناق بولۋعا شاقىردى.
ءانشى ءوز سوزىندە تۇركىستاننىڭ رۋحاني ورتالىق رەتىندە قارىشتاۋىنا تاڭدانىسىن جەتكىزىپ، ءوڭىر باسشىسىنا العىسىن جەتكىزدى.
«تۇركىستاننىڭ جاڭا كەيپىنە، وزگەرىسكە تاڭ قالدىم. بارلىعى ۇناپ جاتىر. ەس بىلگەلى العاش رەت كەلۋىم، ەرەكشە اسەر الدىم. ەلدىڭ وسىنداي ادەمى شاھاردا تۇرىپ جاتقانىن، ەڭسەسى كوتەرىلىپ جاتقانىن كورگەنىمە قۋانىپ وتىرمىن. تۇركىستان بۇگىندە تۇركى الەمىنىڭ تۋريستىك استاناسىنا اينالىپ، دۇنيە جۇزىنە تانىلىپ جاتىر. ەڭ باستىسى ەلىمىز تىنىش بولسىن! قالالارىمىز الەمگە تانىلىپ، حالقىمىزدىڭ دۇنيەتانىمى، رۋحانياتى كوكجيەگى كەڭەيە بەرسىن!» - دەدى ديماش قۇدايبەرگەن.
ايتا كەتەيىك، 13-14-قىركۇيەكتە استانادا ديماش قۇدايبەرگەننىڭ كونسەرتى وتەدى. قازاقستاننىڭ حالىق ءارتىسى «Astana Arena» ستاديونىندا «Stranger» اتتى جەكە كونسەرتىندە ونەر كورسەتەدى. ۇلتتىق دىبىستىق جانە قازىرگى اۋەندىك تەحنيكا ۇيلەسىم تاپقان الەمدىك دەڭگەيدەگى شوۋدا ءداستۇرلى جانە زاماناۋي ستيلدەگى كومپوزيتسيالار ورىندالادى. ءان كەشى 8-13-قىركۇيەك ارالىعىنا جوسپارلانعان V دۇنيەجۇزىلىك كوشپەندىلەر ويىندارى اياسىندا مادەنيەت جانە اقپارات مينيسترلىگىنىڭ قولداۋىمەن، «ديماشالي» شىعارماشىلىق ورتالىعىنىڭ ۇيىمداستىرۋىمەن وتكىزىلەدى.