ترامپ اق ۇيدە كريپتوۆاليۋتا جونىندەگى جاڭا لاۋازىم ەنگىزۋى مۇمكىن
استانا. KAZINFORM - جاڭادان سايلانعان پرەزيدەنت دونالد ترامپتىڭ كومانداسى سيفرلىق اكتيۆتەر يندۋسترياسىنىڭ وكىلدەرىمەن اق ۇيدە تەك كريپتوۆاليۋتالىق ساياساتقا ارنالعان جاڭا پوزيتسيا قۇرۋ تۋرالى كەلىسسوزدەر جۇرگىزۋدە، دەپ حابارلايدى US News باسىلىمى.
پروتسەسسپەن تانىس دەرەككوزدىڭ مالىمەتىنشە، ترامپتىڭ كومانداسى بۇل لاۋازىمعا ۇمىتكەرلەردى قاراستىرىپ جاتىر.
دونالد ترامپ پرەزيدەنتتىك سايلاۋ قارساڭىندا بيتكوين مەن كريپتو يندۋسترياسىن بەلسەندى تۇردە قولدادى. ول كريپتوۆاليۋتالارعا كۇماندى كوزقاراستارىمەن تانىمال باعالى قاعازدار جانە بيرجالار جونىندەگى كوميسسيانىڭ ءتوراعاسى گاري گەنسلەردى قىزمەتىنە كىرىسكەننىڭ «ءبىرىنشى كۇنى» قىزمەتىنەن بوساتۋعا ۋادە بەردى.
سارسەنبىدە بيتكوين $100000 بەلگىسىنە جاقىنداپ، جاڭا رەكورد جاسادى، كريپتوۆاليۋتا سەكتورىنىڭ بولجامى وسى ايدىڭ باسىندا دونالد ترامپتىڭ پرەزيدەنتتىك سايلاۋداعى جەڭىسىنەن كەيىن جاقسارا ءتۇستى.