تالعار وقيعاسى «تەرگەۋ قۇپياسى» تۋرالى باپتى قايتا قاراۋ كەرەكتىگىن كورسەتتى - ابزال قۇسپان

استانا. KAZINFORM - ءماجىلىس دەپۋتاتى ابزال قۇسپان تالعار وبلىسىنداعى قاندى وقيعادان رەسمي اقپارات تاراتۋ قانشالىقتى زاڭ اياسىنا ساي ءجۇرىپ جاتقانى تۋرالى پىكىر ءبىلدىردى.

«قىلمىستىق-پروتسەستىك كودەكستىڭ «201-بابىندا مىنانداي ءبىر ەرەكشەلىك بار. «تەرگەۋ دەرەگىنىڭ ءبارىن اشۋعا بولمايدى. پروكۋرور بەلگىلى ءبىر شەكتە اشۋعا قۇقىلى»، - دەپ كەلەدى. ول قۇقىق پروكۋرورعا بەرىلگەن. ياعني، پروكۋرور قۇپيالىقتى بۇزباۋ شەگىنەن اسپايتىنداي دەڭگەيدە مالىمەتتەردى اشا الادى. تالعاردىڭ ۆيدەوسىنا كەلسەك، قوعام شۋلاپ كەتتى، مەن ءوزىم دە تالاپ ەتتىم. پروكۋراتۋرا جۋرناليستەرگە، قوعامنىڭ سۇرانىستارىنا اشىق بولۋى كەرەك. سوندىقتان ول پروكۋروردىڭ قۇزىرەتىندەگى ماسەلە. ال تەرگەۋ ورىندارى، ىشكى ىستەر ورگاندارى ءوز ەرىكتەرىمەن ول مالىمەتتى اشا المايدى»، - دەيدى دەپۋتات.

زاڭگەر اتالمىش 201-باپتى وزگەرتۋ كەرەكتىگىن قاڭتار وقيعاسىنان بەرى ايتىپ كەلە جاتقانىن ەسكە سالدى.

«قازىرگى تاڭدا ماجىلىستە قارالىپ جاتقان زاڭ جوباسى اياسىندا بۇل ماسەلە تالقىلانىپ جاتىر. قازىر ءبىز ىشكى ىستەر ورگاندارىن دا، پروكۋرورلاردى دا «نەگە مىنا اقپاراتتى بەرمەيسىڭ؟»، «نەگە مىنا مالىمەتتى تولىق اشپايسىڭ؟»، - دەپ ايىپتاي المايمىز. ويتكەنى قولدانىستاعى 201-باپ ولارعا كەدەرگى. ال ەندى بىزدەگى زاڭ ۇزاق قارالادى عوي. ول ەندى شامامەن، جوبامەن كەلەسى جىلدارى شىعادى. ءبىراز پروتسەدۋراسى بار. نەگىزى ول ماسەلە اكتۋالدى. تالعار وقيعاسى اياسىندا دا ول ماسەلەنى ايتتىم. 201-باپتى ءبىز قايتا قاراۋىمىز كەرەك»، - دەدى ابزال قۇسپان.

دەپۋتات وزىق ەلدەردىڭ تاجىريبەسىندە قازاقستانداعىداي قاتاڭ شەكتەۋ جوق ەكەنىن ايتادى.

«ارينە، وتباسى قۇپياسىنا بايلانىستى بولماسا جىنىستىق سيپاتتاعى قىلمىستار بار. ولاردىڭ اشۋعا بولمايدى. مەملەكەتتى قۇپياسى بار ىستەر بولادى. مىنە، سونداي شەكتەۋلەردى قالدىرىپ، قالعان ىستەر اقپاراتتى اشىق بەرگەن دۇرىس. ويتكەنى، بىرىنشىدەن، قوعامنىڭ تالابى وسىنداي بولىپ تۇر. ەكىنشىدەن، ءبىز باسقا دامىعان باتىس ەلدەرىنىڭ، امەريكانىڭ تاجىريبەسىن كورىپ وتىرمىز. ول جەردە وسىنداي ءبىر رەزونانستى ىستەر بولسا، پوليتسيا كوپ جاعدايدا قىزمەتى ەل الدىنا شىعىپ، وقيعانىڭ ءمان-جايىن جۋرناليستەرگە ايتادى. اشىقتىق دەگەن نارسە بار. ال بىزدە كەڭەس ۇكىمەتىنىڭ كەزىنەن قالىپ قويعان مورالدىك تۇرعىدا ءبىر ەسكىرگەن نورما جۇمىس ىستەپ كەلەدى»، - دەدى ءماجىلىس دەپۋتاتى.

ەسكە سالساق، كەشە ىشكى ىستەر مينيسترلىگىنىڭ وكىلدەرى تالعارداعى 16 جاستاعى شەرزات بولات قازا تاپقان جەردە كامەراعا ءتۇسىپ قالعان ۆيدەونى كورسەتكەن ەدى.