سيفرلىق ينكليۋزيا كونفەرەنسياسى: حالىقارالىق ءىس- شارا قاتىسۋشىلارىنا ۆيزا بەرۋدىڭ ەرەكشە ءتارتىبى بەلگىلەندى

استانا. KAZINFORM - سەنات «قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىنداعى سيفرلىق ينكليۋزيا جانە ترانسفورماتسيا جونىندەگى ازيا- تىنىق مۇحيتى مينيسترلىك كونفەرەنتسياسىن ۇيىمداستىرۋ تۋرالى كەلىسىمدى راتيفيكاتسيالاۋ تۋرالى» زاڭدى ماقۇلدادى.

زاڭنىڭ ماقساتى - قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىنداعى سيفرلىق ينكليۋزيا جانە ترانسفورماتسيا جونىندەگى ازيا-تىنىق مۇحيتى مينيسترلىك كونفەرەنتسياسىن ۇيىمداستىرۋ تۋرالى كەلىسىمدى راتيفيكاتسيالاۋ. كەلىسىمدە 2024 -جىلعى قىركۇيەكتىڭ 3-5 ءى ارالىعىندا استانا قالاسىندا ءوتۋى ءتيىس كونفەرەنتسيانى وتكىزۋ مەرزىمى مەن ورنى بەلگىلەنگەن.

كەلىسىمدە مىناداي وكىلدەردىڭ نەمەسە بايقاۋشىلاردىڭ: ەسكاتو مۇشەلەرى مەن قاۋىمداستىرىلعان مۇشەلەرىنىڭ؛ باسقا مەملەكەتتەردىڭ؛ بىرىككەن ۇلتتار ۇيىمىنىڭ باس اسسامبلەياسىنان بايقاۋشىلار رەتىندە كونفەرەنتسيالارعا قاتىسۋعا تۇراقتى شاقىرۋلار العان ۇيىمداردىڭ؛ بىرىككەن ۇلتتار ۇيىمىنىڭ مامانداندىرىلعان جانە ارالاس مەكەمەلەرىنىڭ؛ باسقا دا ۇكىمەتارالىق ۇيىمداردىڭ؛ بىرىككەن ۇلتتار ۇيىمىنىڭ ۇكىمەتارالىق ورگاندارىنىڭ؛ ۇكىمەتتىك ەمەس ۇيىمداردىڭ؛ بىرىككەن ۇلتتار ۇيىمى حاتشىلىعىنىڭ لاۋازىمدى ادامدارىنىڭ؛ بىرىككەن ۇلتتار ۇيىمى شاقىرعان باسقا ادامداردىڭ قاتىسۋى كوزدەلەدى.

سونىمەن قاتار كەلىسىمگە سايكەس ۆيزا بەرۋدىڭ ەرەكشە ءتارتىبى بەلگىلەنەدى. جوعارىدا اتالعان بارلىق ادام قازاقستانعا كەدەرگىسىز كىرۋگە جانە شىعۋعا قۇقىلى بولادى. ۆيزالار مەن كىرۋگە رۇقسات قاجەت بولعان جاعدايدا تەگىن، وتە قىسقا مەرزىمدە جانە كونفەرەنتسيا اشىلعانعا دەيىن ەكى اپتادان كەشىكتىرىلمەي بەرىلەدى.

كەلىسىمگە سايكەس قازاقستان ۇكىمەتى بەيرەسمي وتىرىستار وتكىزۋگە ارنالعان كونفەرەنتس- زالداردى، كونفەرەنتسيالىق قىزمەتتىك ءۇي- جايلاردى، جۇمىس ءۇي- جايلارىن جانە باسقا دا ءتيىستى ءۇي- جايلاردى قوسا العاندا، قاجەتتى ءۇي- جايلاردى بەرەتىن بولادى.

سونىمەن قاتار:

- توتەنشە جاعدايلار تۋىنداعان كەزدە كونفەرەنتسياعا قاتىسۋشىلارعا العاشقى كومەك كورسەتۋ ءۇشىن قاجەتتى مەديتسينالىق قىزمەت كورسەتۋ؛

- كولىكپەن قامتاماسىز ەتۋ؛

- كەز كەلگەن ارالاسۋدى بولدىرمايتىن قاۋىپسىزدىك پەن تىنىشتىق اتموسفەراسىندا كونفەرەنتسيانىڭ ءتيىمدى جۇمىس ىستەۋى ءۇشىن پوليتسيا كۇزەتى جانە باسقالارمەن قامتاماسىز ەتۋ كوزدەلگەن.