سايلاۋ حالىقتىڭ ساياسي ساۋاتىن ارتتىرادى - تايىر نىعمانوۆ

  سايلاۋ كوپ وتكەن سايىن پارتيالار جۇمىسىن كورسەتۋگە مول مۇمكىندىك الادى. مۇنداي پىكىردى ساياساتتانۋشى تايىر نىعمانوۆ ءبىلدىردى، دەپ حابارلايدى Kazinform.

«مەنىڭ جەكە پىكىرىم، قازىرگى قازاقستانداعى ەڭ ۇلكەن پروبلەمالاردىڭ ءبىرى - ساياسي ساۋاتتىلىقتىڭ جەتىسپەۋشىلىگى. بۇل ازاماتتاردىڭ بەلگىلى ءبىر پروبلەمانى ناقتى قاي ورگاننىڭ نە ينستيتۋتتىڭ شەشەتىنىن جەتە بىلە بەرمەۋىنە بايلانىستى. مۇنى ءماجىلىس سايلاۋىنان دا بايقاۋعا بولادى. دەپۋتاتتاردان ايتالىق، ءۇيىنىڭ جانىنداعى جولعا، مەكتەپكە، اۋرۋحاناعا قاتىستى سۇراپ جاتادى. الايدا، قالاي دەسەك تە دەپۋتاتتىڭ نەگىزگى قىزمەتى دەپۋتاتتىق ساۋال جولداۋ ەمەس، زاڭ شىعارماشىلىق پروتسەسى. دەگەنمەن، ول دا ماڭىزدى قۇرال. بىزدە اۋدان، قالا، وبلىس اكىمدەرىن، ءماجىلىس، ءماسليحات دەپۋتاتتارىن سايلاۋ كوپ بولعان سايىن ادامدار دا قاي ورگانعا قانداي قۇزىرەتى جۇكتەلگەنىن جەتە تۇسىنە باستايدى»، - دەدى ول اگەنتتىك تىلشىسىنە بەرگەن سۇحباتىندا.

ونىڭ اتاپ وتۋىنشە، بۇل ادامداردىڭ بيلىكپەن ءوزارا قارىم- قاتىناس جاساۋى ءۇشىن وتە جاقسى.

«ساياسي ساۋاتتىلىق جوعارى بولعان سايىن سايلاۋ دا جاقسى وتەدى. ياعني، باعدارلاماسى قازاقستاندىقتاردىڭ باسىم بولىگىنىڭ مۇددەسىنە ساي كەلەتىن كانديدات جەڭىسكە جەتەدى. قازاقستان ازاماتتارى دا وزدەرىنىڭ قاجەتتىلىگىنە قاراي سۇرانىستارىن دۇرىس ءتۇزۋدى ۇيرەنەدى. وكىنىشكە قاراي، «ءبارىن قاتىرامىن» دەگەن پوپۋليستىك ۇراندى دا ەستۋگە بولادى ءارى ءالى دە بولسا سونىڭ داۋرەنى ءجۇرىپ تۇر. وتكەن جىلدارى «پارتيالار تۇك ىستەمەيدى. پارلامەنتتىك نە پرەزيدەنتتىك سايلاۋ قارساڭىندا كانديدات ۇسىنۋ ءۇشىن 5 جىلدا ءبىر رەت ويانىپ، ودان كەيىن قايتادان 4 -جىلعا ۇيقىعا كەتەدى» دەگەن سىندى ءجيى ەستيتىن ەدىك. ال سايلاۋ كوپ بولسا، وندا پارتيالارعا دا ءوز جۇمىستارىن كورسەتۋگە مۇمكىندىك مول بولار ەدى»، - دەدى تايىر نىعمانوۆ.