ساياحاتتاۋشى قازاقستاندىقتارعا بارۋعا بولاتىن توپ-5 ەلدى ۇسىندى
استانا. KAZINFORM - جاز ماۋسىمىن شۋاقتى كۇن، جاعاجاي جانە ساياحاتتاۋمەن بايلانىستىرامىز. سوندىقتان كوپشىلىك جازدا جاعاجايى بار، اۋا رايى ىستىق ەلگە بارىپ دەمالىپ كەلگەندى ءجون سانايدى.
وعان قوسا، جازدا وقۋشىلار، ستۋدەنتتەر دەمالاتىندىقتان، كوپشىلىك ەرەسەك تە ەڭبەك دەمالىسىن جازدا الادى. بىرەۋلەر ءتىپتى جازدا ەڭبەك دەمالىسىنا شىقپاسا، ءوزىن مۇلدەم دەمالماعانداي سەزىنەدى. جازدا شەتەلگە بارىپ دەمالىپ كەلۋدى جوسپارلاپ ءجۇرسىز بە؟ تۋراگەنت جانە ساياحاتتاۋشى مەرۋەرت مۇحيت قىزى قازاقستاندىقتارعا بارۋعا ءتيىمدى 5 ەلدى ۇسىندى، - دەپ حابارلايدى Massaget.kz ءتىلشىسى.
تۋراگەنت بىردەن بىرنەشە قالاسىنا بارۋعا بولاتىن ەلدەردى تاڭداۋعا كەڭەس بەردى.
«جالپى ساياحاتتاۋشىعا ماڭىزدىسى - جاڭا ەموتسيا الۋ، سول مەملەكەتتىڭ مادەنيەتىمەن، تاريحىمەن تانىسۋ. سوندىقتان ەگەر شەتەلدە دەمالۋدى جوسپارلاساڭىز، بىردەن بىرنەشە قالاسىن ارالاپ، ءتۋريزمنىڭ دە بىرنەشە ءتۇرىن بايقاپ كورەتىندەي مەملەكەتتەرگە بارۋدى كەڭەس بەرەر ەدىم»، - دەيدى ساياحاتتاۋشى.
مەرۋەرت مۇحيت قىزى قازاقستاندىقتارعا جازدا مىنا ەلدەرگە بارۋدى ۇسىندى:
تۇركيا
ستامبۇلعا رەيستەردى ىڭعايلى ەتىپ تاڭداپ، تەك ستامبۇلدى عانا ەمەس، ءارى قاراي تۇركيانىڭ الۋان ءتۇرلى تابيعاتىمەن تانىسىپ، تەڭىزگە شومىلۋ ءۇشىن فەتحيە، كاش، وليۋدەنيز سەكىلدى كىشىگىرىم، ءبىراق اۋتەنتيكالىق قالالارىن ارالاۋعا كەڭەس بەرەر ەدىم. كۇن ىستىقتاۋ بولسا دا، تەگىن تەڭىز جاعالاۋلارى وتە كوپ. ستامبۇلدان دا ىشكى اۋە بيلەتىن الىپ، ارالاۋعا بولادى. نەمەسە پاكەتپەن ۇسىنىلاتىن دايىن تۋرلاردى السا دا بولادى. تۋروپەراتورلار قازىر بودرۋم، مارماريسكە دە تۋرلار ۇسىنىپ جاتىر. بۇل قالالاردىڭ دا سۇلۋلىعى ءبىر بولەك. تۇركيادا بەلسەندى دە، مادەني دە دەمالۋعا مۇمكىندىك بار.
گرۋزيا
قازىر باتۋميگە دە تىكەلەي رەيستەر بار. باتۋمي - گرۋزيانىڭ كەرەمەت ينفراقۇرىلىمى مەن كوپتەگەن كورىكتى جەرلەرى بار كۋرورتتىق استاناسى. بۇل جەردە سامەبا تاۋىندا ورنالاسقان XIX عاسىرداعى شىركەۋ - قاسيەتتى ۇشتىك عيباداتحاناسى جانە جەتى شاقىرىمدىق تەڭىز جاعاسىنداعى بۋلۆار بار. قارا تەڭىز جاعالاۋىندا دەمالۋدىڭ كەرەمەت ءادىسى. سودان سوڭ ءارى قاراي كۋتايسي، تبيليسي، كازبەگي، سيگناحي سەكىلدى تاريحي، تاۋلى-تاستى، مادەني جەرلەرىن ارالاۋعا كەڭەس بەرەر ەدىم. وعان قوسا، گرۋزيانىڭ ءاسۇيى ءار تۋريستتىڭ كوڭىلىنەن شىعاتىنى انىق.
ەگيپەت
ءوزىم شارم-ەش-شەيحكە بارعاندى دايۆينگ ءۇشىن ۇناتامىن. بۇل جولى الامەين قالاسىنا دا رەيستەر بار. دەمەك كونە الەكساندريا قالاسىنا دا بارۋ تەزىرەك ءارى ىڭعايلىراق. الەكساندريا مۇناراسى بۇرىن الەمنىڭ 7 كەرەمەتى تىزىمىندە بولاتىن.
يتاليا
الماتىدان ميلانعا تىكەلەي رەيستەر بار. اۋەكومپانيانى Neos سايتىنا كىرىپ تاڭداساڭىزدار بولادى نەمەسە ارزانداۋ شىعۋ ءۇشىن تۋركومپانيادان دا دايىن پاكەتتى السا بولادى. ءبىراق باسقا دا قالالاردى ارالاعىڭىز كەلسە، ءوز بەتىڭىزبەن مارشرۋت قۇرعان دۇرىس بولادى.
وڭتۇستىك-شىعىس ازيا ەلدەرى
ۆەتنام، تايلاند، مالايزيا - قالاعانىڭىزدان باستاپ، ءبىر ساياحاتتا بىرنەشە مەملەكەتكە بارۋعا بولادى. ولار وزدەرىنىڭ ەكزوتيكالىق جاعاجايلارىمەن، مادەني مۇراسىمەن جانە ەكسكۋرسيالىق باعدارلامالارىمەن ەرەكشەلەنەدى. مارشرۋتقا باليدى دە قوسۋدى ۇمىتپاڭىز.