قىزىلوردا وبلىسىندا 4 ادام كوروناۆيرۋس ينفەكسياسىن جۇقتىردى

قىزىلوردا. KAZINFORM - قىزىلوردا وبلىسىندا جىل باسىنان بەرى كوروناۆيرۋس ينفەكسياسىن جۇقتىرۋدىڭ 4 دەرەگى انىقتالدى. بىلتىر ناۋقاستار سانى 118 ادام بولعان.

قىزىلوردا وبلىسىندا كوروناۆيرۋس ينفەكسياسى بويىنشا ەپيدەميولوگيالىق احۋال تۇراقتى. 2022 -جىلمەن سالىستىرعاندا 55 ەسە تومەندەگەن.

«2023 -جىلى وبلىس بويىنشا كوروناۆيرۋس ينفەكتسياسىن جۇقتىرۋدىڭ 118 دەرەگى انىقتالدى. ونىڭ ىشىندە 14 جاسقا دەيىنگى بالالار ۇلەسى 47 دەرەك. باسىم بولىگى اۋرۋ سيمپتومىمەن ناقتىلاندى. بيىل جىل باسىنان بەرى اتالعان اۋرۋعا شالدىعۋدىڭ 4 جاعدايى تىركەلدى»، - دەدى قىزىلوردا وبلىسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ءابدىقايىموۆا.

ماماندار ۆيرۋستىڭ تارالۋىن بولدىرماۋ جانە جۇقتىرۋ ءقاۋپىن تومەندەتۋدىڭ ەڭ جاقسى ءتاسىلى رەتىندە ادامدارعا اۋرۋ تۋرالى جانە ونىڭ قوزدىرعىشىنىڭ تارالۋ مەحانيزمدەرى تۋرالى حاباردار ەتۋ ەكەنىن ايتادى.

«سوندىقتان ءوزىڭىزدى جانە باسقا ادامداردى ينفەكسيادان قورعاۋ ءۇشىن ساقتىق شارالارىنا نازار اۋدارۋدى سۇرايمىز. ماسەلەن، ازاماتتار قول جۋۋ گيگيەناسىن ساقتاۋ، ءجيى سابىنداپ جۋىپ، زالالسىزداندىرۋ انتيسەپتيكتەر قولدانۋ، تۇشكىرۋ، جوتەلۋ گيگيەناسىن ساقتاۋ، ادامدار كوپ جينالاتىن ورىندارعا بارۋدى مەيلىنشە شەكتەۋ، الەۋمەتتىك اراقاشىقتىق ساقتاۋ قاجەت. سونداي-اق ناشار جەلدەتىلەتىن ورىنداردا بەتپەردە پايدالانۋ، ينفەكسياعا قارسى ۆاكسينالاۋدان ۋاقىتىلى ءوتۋ، دارىگەرلەرلەردىڭ نۇسقاۋىن ورىنداۋ، ۆيرۋس جۇقتىرعان ادامدارعا كۇتىم جاساعاندا سانيتاريالىق-ەپيدەميولوگيالىق شارالاردى ورىنداۋ ارتىق ەمەس»، - دەدى ءا. ءابدىقايىموۆا.

ەسكە سالساق، قىزىلوردا وبلىسىندا بيىل قىزىلشا جۇقتىرۋدىڭ 30 دەرەگى انىقتالدى.