قىتايلىق زاۋىت 76 سەكۋندتا ءبىر ەنەرگەتيكالىق كولىك قۇراستىرادى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
وزبەكستانعا تۋريست قاي ەلدەردەن ەڭ كوپ كەلەتىنى بەلگىلى بولدى– ءو ز ا
2025-جىلدىڭ قاڭتار-مامىر ايلارى ارالىعىندا وزبەكستانعا 4,2 ميلليون شەتەلدىك تۋريست كەلگەن. بۇل كورسەتكىش بىلتىرعى جىلدىڭ وسى كەزەڭىمەن سالىستىرعاندا 48,2 پايىزعا ارتىق.
ۇلتتىق ستاتيستيكا كوميتەتى كەلۋشىلەردىڭ باسىم بولىگى كورشى مەملەكەتتەردەن ەكەنىن مالىمدەدى. اتاپ ايتقاندا، ەڭ كوپ تۋريست قىرعىزستاننان كەلگەن - 1,2 ميلليون ادام.
بۇل تۋرالى وسى اپتادا «ءو ز ا» اقپارات اگەنتتىگى مالىمدەدى.
حابارلامادا ايتىلعانداي، ودان كەيىنگى ورىنداردا تاجىكستان (993,7 مىڭ)، قازاقستان (889,6 مىڭ)، رەسەي (334,3 مىڭ) جانە اۋعانستان (199,2 مىڭ) قاتارلى ەلدەردەن تۋريستەر كەلەدى ەكەن.
اتالعان ب ا ق- تىڭ دەرەگىنشە، ساياحاتشىلار وزبەكستاننىڭ تاريحي-مادەني كورنەكى ورىندارىنا قىزىعۋشىلىق تانىتقان.
سونداي-اق وسى اپتادا «ءو ز ا» - دا «وزبەكستان ەڭ قاۋىپسىز ەلدەر رەيتينگىندە 25-ورىنعا يە بولدى» دەگەن تاقىرىپتاعى اقپارات جاريالاندى.
دۇنيەجۇزىندەگى ەڭ ءقاۋىپسىز ەلدەر تىزىمىندە بىرىككەن اراب امىرلىكتەرى (ب ا ءا) كوش باستاپ تۇر. بۇل ەل جەكە قاۋىپسىزدىك پەن قوعامدىق ورتانىڭ جالپى تۇراقتىلىعى ءۇشىن جوعارى باعالانعان.
وزبەكستاندىق اقپارات كوزىنىڭ دەرەگىنشە، 2025-جىلعا ارنالعان Numbeo تالدامالىق پلاتفورماسىنىڭ جاڭارتىلعان رەيتينگىندە الەمنىڭ ەڭ قاۋىپسىز ەلدەرى مەن وڭىرلەرى جاريالاندى.
جاڭا ەسەپكە سايكەس، ب ا ءا ءبىرىنشى ورىندى يەلەنسە، ەكىنشى ورىندا اندوررا، ۇشىنشىدە قاتار ورنالاسقان. وزبەكستان بۇل تىزىمدە 25-ورىنعا جايعاسىپتى.
ايتا كەتەيىك، ەڭ ءقاۋىپسىز ەلدەر مەن وڭىرلەردىڭ العاشقى وندىعىندا، بىرىككەن اراب امىرلىكتەرى، اندوررا، قاتار، تايۆان، ماكاو، ومان، مەن ارالى، گونكونگ، ارمەنيا جانە سينگاپۋر قاتارلى ەلدەر بار.
اتالعان ەلدەردە قىلمىس دەڭگەيى تومەن، تۇرعىنداردىڭ قۇقىق قورعاۋ ورگاندارىنا سەنىمى جوعارى، ىشكى احۋال تۇراقتى.
ال باسقا ەلدەردىڭ (ت م د ەلدەرى - اۆت.) ورىندارى مىناداي: ازەربايجان - 35-ورىن، رەسەي - 52-ورىن، قازاقستان - 73-ورىن، ۋكراينا - 81-ورىن، قىرعىزستان - 101-ورىندى يەلەنسە، تۇرىكمەنستان مەن تاجىكستان رەيتينگكە ەنبەگەن.
ايتا كەتۋ كەرەك، بۇل اقپاراتتا ەڭ قاۋىپتى ەلدەر ءتىزىمى دە جاريالانعان.
ەسكە سالا كەتەيىك، بۇل مالىمەتتەر رەسمي مەملەكەتتىك ستاتيستيكاعا ەمەس، ساۋالناماعا قاتىسقانداردىڭ سۋبەكتيۆتى قابىلداۋىنا نەگىزدەلگەن.
وزبەكستان قازاقستاندى شامامەن 30 جىلدان كەيىن قۋىپ جەتە الادى- Eurasia Today
وزبەكستان شامامەن 30 جىلدان كەيىن قازاقستاندى ەكونوميكا سالاسىندا قۋىپ جەتە الادى.
بۇل تۋرالى وزبەكستاندىق ەكونوميست بەحزود حوشيموۆ YouTube جەلىسىندەگى Cactuz پودكاستىندا مالىمدەگەن.
ول وزبەكستاننىڭ ەكونوميكالىق كورسەتكىشتەرىمەن قازاقستاندى قۋىپ جەتۋى قيىن بولاتىنىن ايتقان.
بۇل تۋرالى وسى اپتادا قىرعىزستاندا شىعاتىن Eurasia Today اقپارات اگەنتتىگى حابارلادى.
اتالعان ب ا ق- تىڭ كەلتىرگەن دەرەكتەرىنە سۇيەنسەك، بەحزود حوشيموۆ دامىعان جانە كەدەي ەلدەردىڭ ەكونوميكالىق ءوسىمى اراسىندا ايتارلىقتاي الشاقتىق بار ەكەنىن تىلگە تيەك ەتكەن.
ول مىسال رەتىندە ا ق ش پەن وزبەكستاننىڭ جان باسىنا شاققانداعى جالپى ىشكى ءونىمىنىڭ اراسىنداعى ايىرماشىلىق وتە ۇلكەن ەكەنىن ايتادى.
ەكونوميستتىڭ پىكىرى بويىنشا، وزبەكستان ءۇشىن جىلىنا 5 پايىزدىق ەكونوميكالىق ءوسۋ قارقىنىمەن جوعارى ناتيجەگە جەتۋ قيىن. ەلدىڭ ەكونوميكاسى كەم دەگەندە 8 پايىزعا ءوسۋى كەرەك.
- ولاي بولسا، شامامەن 30 جىلدان كەيىن ءبىز قازاقستاندى قۋىپ جەتە الامىز. قازاقستاندا جان باسىنا شاققانداعى تابىس بىزدىكىنەن 5-6 ەسە جوعارى. ءبىزدىڭ كەدەي بولعانىمىز سونشا، تابىسىمىز التى ەسە وسسە، ياعني ءاربىر وزبەكتىڭ تابىسى بىردەي مولشەردە وسسە، ءبىز قازاقستاندى قۋىپ جەتەمىز. ءتىپتى، جان باسىنا شاققانداعى ىشكى جالپى ءونىمىمىز 5 پايىزدان استام وسسە دە، 10 جىلدان كەيىن قازاقستاندى قۋىپ جەتۋىمىز ەكىتالاي. ءتىپتى، وزبەكستاننىڭ الەمدە ورتاشا تابىسقا يە ەلدەردىڭ قاتارىنا ەنۋى كوپ كۇمان تۋدىرادى. بارىنەن بۇرىن تۇراقتى ەكونوميكالىق ءوسىمنىڭ 5 پايىز دەڭگەيىندە بولۋىنىڭ ءوزى نەعايبىل، - دەيدى بەحزود حوشيموۆ.
باركول قازاق اۆتونوميالى اۋدانىندا اۋەجاي اشىلدى- CNR
شىڭجاڭنىڭ 28-ازاماتتىق كولىك اۋەجايى قولدانىسقا بەرىلدى.
15-شىلدەدە چۋنتسيننەن باركولگە تىكەلەي ۇشقان Huaxia Airlines اۋەكومپانياسىنىڭ G54215 رەيسى شىڭجاڭنىڭ قۇمىل ايماعى باركول اۋدانىنا كەلىپ قوندى.
بۇل تۋرالى وسى اپتادا قىتايدىڭ «ورتالىق حالىق راديوسى» حابارلادى.
بۇل باركول داحى اۋەجايىنىڭ رەسمي اشىلعانىن بىلدىرەدى. باركول قازاق اۆتونوميالى اۋدانىنداعى جاڭا اۋەجاي شىڭجاڭدا پايدالانۋعا بەرىلگەن 28-حالىقتىق اۋەجاي جانە ەكىنشى ءۇستىرت اۋەجايى، دەپ جازادى قىتايلىق ب ا ق.
ايتا كەتەيىك، باركول قازاق اۆتونوميالىق اۋدانى قىتايدىڭ شىڭجاڭ ۇيعىر اۆتونوميالىق ولكەسىندەگى قۇمىل ايماعىنا قاراستى اۋدان.
باركول 1954-جىلى اۆتونوميالىق اۋدان بولىپ قۇرىلعان.
قىتايدا ىلە قازاق اۆتونوميالىق وبلىسىنان تىس موري قازاق اۆتونوميالىق اۋدانى، باركول قازاق اۆتونوميالىق اۋدانى جانە گانسۋ ولكەسىندە اقساي قازاق اۆتونوميالىق اۋدانى قاتارلى ءۇش قازاق اۆتونوميالىق اۋدان بار.
قىتايلىق اۆتوزاۋىت 76 سەكۋندتا ءبىر ەنەرگەتيكالىق كولىك قۇراستىرىپ جاتىر -«حالىق گازەتى»
Xiaomi اۆتوموبيل زاۋىتى بەيجىڭنىڭ ەكونوميكالىق جانە تەحنولوگيالىق دامۋ ايماعىندا ورنالاسقان. زاۋىت 700000 شارشى مەتردەن استام اۋماقتى الىپ جاتىر. بۇل 100 فۋتبول الاڭى كولەمىنە پارا-پار الپاۋىت زاۋىتتا ءار 76 سەكۋند سايىن ءبىر جاڭا ەنەرگەتيكالىق كولىك قۇراستىرىلادى، دەپ حابارلايدى «حالىق گازەتى» باسىلىمى.
اتالعان باسىلىمنىڭ مالىمەتىنشە، Xiaomi سوڭعى بەس جىلدا زەرتتەۋلەر مەن ازىرلەمەلەرگە 100 ميلليارد يۋاننان استام ينۆەستيتسيا سالعان جانە نەگىزگى مۇمكىندىكتەرىن ءتيىمدى قولدانۋى ارقاسىندا ۇلكەن جەتىستىكتەرگە قول جەتكىزگەن. كومپانيا الداعى بەس جىلدا جاھاندىق تەحنولوگيالاردىڭ جاڭا بۋىنىن شىڭىنا جالعاستى ۇمتىلۋ ءۇشىن تاعى 200 ميلليارد يۋان ينۆەستيتسيالاۋدى جوسپارلاپ وتىر.
BRICS تەلەارناسىنىڭ ارنايى سىيلىعى بەرىلدى- ParsToday
ءۇندىستان وكىلىنە ءۇشىنشى رەت ۇيىمداستىرىلعان «ەۋرازيا جاسىل كليمات» حالىقارالىق بايقاۋىندا BRICS TV جەلىسىنىڭ ارنايى جۇلدەسى تابىس ەتىلدى، دەپ جازدى ParsToday اقپارات اگەنتتىگى.
ParsToday اگەنتتىگىنىڭ BRICS تەلەارناسىنا سىلتەمە جاساپ حابارلاۋىنشا، «جاسىل كليمات ەۋرازيا» ءۇشىنشى حالىقارالىق بايقاۋىنىڭ جابىلۋ سالتاناتىندا ءۇندىستاننىڭ قورشاعان ورتانى قورعاۋ قورى (EFI) 603 قاراۋسىز قالعان سۋ جولدارىن قالپىنا كەلتىرگەنى جانە جەر استى سۋلارىنىڭ قورىن جاقسارتقانى ءۇشىن BRICS تەلەارناسىنىڭ ارنايى سىيلىعىن الدى.
ايتا كەتەيىك، ەۋرازيالىق ەكونوميكالىق كوميسسيانىڭ قولداۋىمەن وتكەن شارادا 16 ەلدەن 295 جوبا باعالاندى.
EFI نەگىزىن قالاۋشى ارۋن چەلا كريشنامۋرتي ت ۆ بريكستەن بۇل ارنايى سىيلىقتى الۋ ەرەكشە ىنتالاندىرادى دەگەن.
ونىڭ ايتۋىنشا، بۇل ماراپات ءبىزدىڭ تىنىمسىز ەڭبەگىمىز بەن تىرشىلىك ەتۋ ورتاسىن قالپىنا كەلتىرۋگە عىلىمي كوزقاراسىمىزدى كورسەتەدى جانە جاھاندىق وڭتۇستىكتەگى ەكولوگيالىق ماسەلەلەرگە الەمنىڭ نازارى اۋادى.
ىستانبۇل اۋەجايى الەمنىڭ ەڭ ۇزدىك اۋەجايى بولىپ تاڭدالدى - TRT
ىستانبۇل اۋەجايى «Travel + Leisure» جۋرنالى تاراپىنان قاتارىنان ەكىنشى رەت الەمنىڭ ەڭ ۇزدىك اۋەجايى بولىپ تاڭدالدى. اۋەجاي ەكى جىل بۇرىن 7-ورىندا بولسا، قازىر كوش باستاپ تۇر، دەپ حابارلايدى تۇركيا راديو تەلەۆيزيا پورتالى.
«TRT» - نىڭ مالىمەتىنشە، ەۋروپانىڭ ەڭ ءىرى اۋەجايى سانالاتىن ىستانبۇل اۋەجايى تانىمال ساياحات جۋرنالى «Travel + Leisure» جۇرگىزگەن ساۋالناما ناتيجەسى بويىنشا قاتارىنان ەكىنشى رەت الەمدەگى ەڭ ۇزدىك اۋەجاي رەتىندە تاڭدالعان.
اۋەجايدىڭ كورسەتكىشى وتكەن جىلمەن سالىستىرعاندا جوعارىلاپ، 95,79 دان 98,57 گە دەيىن وسكەن. 2023-جىلعى ساۋالنامادا 83,36 وقىرمان ۇپايىمەن جەتىنشى ورىندى يەلەنگەن ىستانبۇل اۋەجايىنىڭ بيىلعى جەتىستىگى «Travel + Leisure» جۋرنالى تاراپىنان «ەرەكشە اسەرلى كورسەتكىش» دەپ سيپاتتالدى.
تۇركيالىق باسىلىمنىڭ دەرەگىنشە، اۋەجايلار «Travel + Leisure» جۋرنالىنىڭ وقىرماندارى تاراپىنان قولجەتىمدىلىك، تىركەلۋ تاجىريبەسى، قاۋىپسىزدىك، تاماقتانۋ، ساۋدا جانە ديزاين سياقتى ولشەمدەر بويىنشا باعالاندى.
اۆتور بەيسەن سۇلتان