قىرعىزستاندا بيىك تاۋداعى كول تاسىدى: 160 ادام ەۆاكۋاتسيالاندى
استانا. KAZINFORM - قىرعىزستانداعى ىستىقكول وبلىسىندا جاۋىن-شاشىن سالدارىنان بيىك تاۋداعى زىندان كولى تاسىدى.
ت ج م مالىمەتى بويىنشا، ىستىقكول وبلىسى تون اۋدانى تۋۋرا- سۋۋ اۋىلىنداعى زىندان كولىنىڭ تاسۋىنان تون وزەنىندە سۋ دەڭگەيى كوتەرىلدى.
حالىقتىڭ قاۋىپسىزدىگىن قامتاماسىز ەتۋ ماقساتىندا جەرگىلىكتى بيلىك ورگاندارى تۋۋرا- سۋۋ اۋىلىنان 90 ادامدى جانە بالىق زاۋىتى جانىنداعى 70 تۇرعىندى ەۆاكۋاتسيالاۋدى ۇيعارعان. ولار جاقىن ماڭداعى ەلدى مەكەندەرگە - ەشپەروۆ پەن اقسايعا قونىستانعان.
وقيعا ورنىندا ت ج م قۇتقارۋشىلارى جۇمىس ىستەپ جاتىر، ولار تۋۋرا-سۋۋ اۋىلىنداعى ۇيلەردى سۋ باسۋدىڭ الدىن الىپ جاتىر. ارنايى تەحنيكانىڭ كومەگىمەن سۋ اعىنىن بۇرۋ جۇمىستارى جۇرگىزىلىپ جاتىر.
ايتا كەتەيىك، ىستىقكولدەگى قاتتى نوسەر سەل اعىندارىنا اكەپ سوقتىردى، ناتيجەسىندە بىرنەشە اۋىل مەن پانسيونات سۋ استىندا قالدى، كەيبىر جولداردا كولىك قوزعالىسى شەكتەلدى.
اۆتور
ايجان سەرىكجان قىزى