قونىس اۋدارۋشىلارعا كورسەتەتىن قىزمەتتەر اۆتوماتتاندىرىلادى
استانا. KAZINFORM - 2025 -جىلدىڭ ناۋرىزىنان قونىس اۋدارۋشىلارعا مەملەكەتتىك قولداۋ شارالارىن كورسەتۋ قىزمەتتەرى اۆتوماتتاندىرىلادى.
بۇل تۋرالى ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.
«قونىس اۋدارۋ باعدارلامالارىنىڭ اشىقتىعىن ارتتىرۋ ماقساتىندا ۇكىمەت 2023 -جىلعى قازاننان باستاپ، جۇمىس كۇشىنىڭ موبيلدىلىگىن ارتتىرۋ ءۇشىن ادامداردىڭ ەرىكتى تۇردە قونىس اۋدارۋ قاعيدالارىنا ءبىرقاتار تۇزەتۋ ەنگىزۋ بويىنشا جۇمىس جۇرگىزدى. اتاپ ايتقاندا، وزگەرىستەر قونىس اۋدارۋشىلار ساتىپ الاتىن تۇرعىن ءۇيدى مىندەتتى باعالاۋ تالاپتارىنا، قونىس اۋدارۋشىنىڭ سەرتيفيكات بويىنشا اقشالاي تولەمدى ەرلى- زايىپتىلاردان جانە جاقىن تۋىستارىنان جىلجىمايتىن مۇلىك ساتىپ الۋعا پايدالانۋىنا جول بەرمەۋگە، سونداي-اق جىلجىمايتىن مۇلىكتى ساتۋعا 5 (بەس) جىل بويى تىيىم سالۋعا قاتىستى بولدى»، - دەدى ۇكىمەت باسشىسى جاۋابىندا.
ونىڭ اتاپ وتىنشە، مۇددەلەر قاقتىعىسىنا جول بەرمەۋ ماقساتىندا سەرتيفيكات بويىنشا اقشالاي تولەمدەردى تاعايىنداۋ فۋنكتسيالارى مانساپ ورتالىقتارىنان ەڭبەك موبيلدىلىگى ورتالىقتارىنا بەرىلدى.
«بۇدان باسقا، قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزۋ جانە ولارعا مەملەكەتتىك قولداۋ شارالارىن كورسەتۋ جونىندەگى مەملەكەتتىك قىزمەتتەردى 2025 -جىلعى ناۋرىزدان باستاپ اۆتوماتتاندىرۋ جوسپارلانۋدا. مەملەكەتتىك كورسەتىلەتىن قىزمەتتەردىڭ وسى تۇرلەرىن سيفرلاندىرۋ قونىس اۋدارۋشىلار مەن ەڭبەك موبيلدىلىگى ورتالىقتارى اراسىنداعى شارتتىق مىندەتتەمەلەردىڭ ورىندالۋىن ناقتى مونيتورينگتەۋگە مۇمكىندىك بەرەدى»، - دەدى ولجاس بەكتەنوۆ.