قوعامدىق بىرلەستىك قۇرۋ ءراسىمى جەڭىلدەتىلىپ، جاۋاپكەرشىلىك كۇشەيتىلەدى - نارتاي سارسەنعاليەۆ

 الداعى سارسەنبىدە وتەتىن ءماجىلىستىڭ جالپى وتىرىسىندا «قوعامدىق بىرلەستىكتەر تۋرالى» زاڭعا وزگەرتۋلەر مەن تولىقتىرۋلار ەنگىزۋ» تۋرالى زاڭ جوباسى 1-وقىلىمدا تالقىعا تۇسەدى.

وسىعان وراي اتالعان زاڭ جوباسى بويىنشا جۇمىس توبىنىڭ ءتوراعاسى ءماجىلىس دەپۋتاتى نارتاي سارسەنعاليەۆتەن ۇسىنىلىپ وتىرعان جاڭا نورمالار جايىندا سۇراپ بىلگەن ەدىك، دەپ حابارلايدى Kazinform.

«وزدەرىڭىز بىلەتىندەي، رەسپۋبليكانىڭ اۋماقتىق قۇرىلىمى وزگەرىپ، 3 وبلىس ورتالىعى قۇرىلدى. وسىعان وراي قازىرگى قولدانىستاعى «قوعامدىق بىرلەستىكتەر تۋرالى» زاڭدى رەتتەۋ قاجەتتىلىگى تۋىنداپ وتىر. وسىنى رەتتەۋدى كوزدەدىك. الايدا، ەڭ باستى نوۆەللا بىرلەستىك قۇرۋعا قاتىستى وزگەرىس بولماق. بۇرىن بىزدە قوعامدىق بىرلەستىك قۇرۋ ءۇشىن 10 قۇرىلتايشى قاجەت ەدى. ەندى زاڭ جوباسىنا سايكەس، ەلىمىزدە قوعامدىق بىرلەستىك قۇرۋ ءۇشىن 3 قۇرىلتايشى جەتكىلىكتى بولادى. تاعى ءبىر وزگەرىس - وسى ۋاقىتقا دەيىن بىزدە قوعامدىق بىرلەستىكتەر اشىلىپ، جابىلىپ جاتادى. ال ەندىگى ۋاقىتتا بىرلەستىكتىڭ قارجىلىق نەگىزدەمەسى بولسا، وندا مەملەكەتتىك ورگاندار ونى جابىلعانعا دەيىن تەكسەرەدى. بۇل جاۋاپكەرشىلىكتى كۇشەيتەدى»، - دەدى نارتاي سارسەنعاليەۆ.

دەپۋتات زاڭ جوباسىن ازىرلەۋ بارىسىندا ەۋروپالىق تاجىريبە تىڭعىلىقتى زەردەلەنگەنىن ايتادى.

«كاسىپوداقتار، ءدىني بىرلەستىكتەر، ساياسي پارتيالارعا قاتىستى ساۋالدار دا كەلىپ تۇسۋدە، بۇل وتە ماڭىزدى. ساياسي پارتيالارعا، ءدىني بىرلەستىكتەرگە، كاسىپوداقتارعا بۇل زاڭدا كوزدەلگەن جەڭىلدىكتەر جۇرمەيدى. ءدىني ۇيىمدار دا، ساياسي پارتيالار دا، كاسىپوداقتار دا وزدەرىنىڭ سالالىق زاڭناماسىمەن رەتتەلەدى. ۇسىنىلىپ وتىرعان زاڭ جوباسىنا سۇيەنىپ كاسىپوداق، ءدىني بىرلەستىك نەمەسە ساياسي پارتيا قۇرۋعا رۇقسات بەرىلمەيدى. بۇل زاڭ جوباسى الداعى سارسەنبىدە 1-وقىلىمعا شىعارىلادى»، - دەدى ءماجىلىس دەپۋتاتى.

دەپۋتات زاڭ جوباسى بويىنشا ءماجىلىستىڭ بارلىق كوميتەتى وڭ قورىتىندى بەرگەنىن، دەپۋتاتتار تاراپىنان قارسىلىق بولماعانىن اتاپ وتەدى.

«ەڭ باستىسى - قوعامدى دەموكراتيالاندىرۋ، ازاماتتارىمىزعا بارىنشا كوپ قوعامدىق بىرلەستىك قۇرۋعا مۇمكىندىك بەرۋ. جۇمىس توبىندا قۇرىلتايشى سانى ازايتىلىپ، بىرلەستىك كوبەيسە «مەملەكەتتىك ورگاندارعا سالماق بولادى» دەگەن پىكىرلەر بولدى. ءبىراق، وعان قاراپ وتىرا المايمىز عوي. ويتكەنى، «دەموكراتيالىق قوعام، ەستۋشى مەملەكەت قۇرامىز» دەپ ازاماتتارعا جەكە مۇمكىندىك بەرسەك، ەندى ولارعا بىرلەستىك قۇرۋعا دا جول اشۋىمىز قاجەت. ءتۇرلى ماسەلەلەر بويىنشا ۇستانىمىن ءبىلدىرىپ، قوعامدىق بىرلەستىك قۇرعىسى كەلە مە ازاماتتارىمىز، وندا ەشقانداي ماسەلە بولماۋى ءتيىس. 3 قۇرىلتايشى تاۋىپ، قۇرسىن. ارى قاراي قانشا مۇشەسى بولاتىندىعى ولاردىڭ بەلسەندىلىگىنە، جۇمىستارىنا بايلانىستى. باستىسى قۇرىلتايشىلار سانىن 10 نان 3 كە ءتۇسىرىپ بەرمەكپىز» ، - دەدى نارتاي ارالباي ۇلى.