قوعامعا قاۋىپتى. دەپۋتات داۋلەت مۇقايەۆ كۆادروبەرلەرگە قاتىستى زاڭ شىعارۋدى ۇسىندى

استانا. قازاقپارات - ءماجىلىس دەپۋتاتى داۋلەت مۇقايەۆ قۇزىرلى ورگاندار مەن اتا-انالارعا ۇندەۋ جاسادى. ءماجىلىس دەپۋتاتى ءوزىنىڭ instagram-پاراقشاسىندا قازىر بالالار مەن جاسوسپىرىمدەر اراسىندا بەلەڭ الىپ جاتقان كۆادروبەرلەر جايلى ءسوز قوزعادى.

«قۇرمەتتى اتا-انالار، وقىرمان! سىزدەرگە ايتاتىن ماڭىزدى اقپاراتىم بار. كۆادروبەر دەگەن تەرميندى ەستىپ جاتقان شىعارسىزدار. قاراپايىم تىلمەن ايتقاندا، بۇل ادامداردىڭ جانۋارعا اينالۋى. بۇل كوبىنە جاسوسپىرىمدەر اراسىندا بەلەڭ الىپ جاتىر. بۇل كادىمگى دەرت، قوعام اۋرۋى دەسە دە بولادى. قازىردەن باستاپ الدىن الماساق، ەرتەڭگى كۇنى ۇرپاقتىڭ تامىرىنا بالتا شاۋىپ الۋىمىز مۇمكىن. قاراپايىم تىلمەن ايتقاندا، ادامدار، جاسوسپىرىمدەر جانۋارعا ەلىكتەيدى، ءتورت اياقتاپ جۇرەدى، سولار سەكىلدى ءومىر سۇرەدى، سەكىرەدى، ءتىپتى كوشەدە جۇرسەڭىز، ءسىزدى تىرناپ، تىستەپ الۋ قاۋپى دە بار. بۇل ەۋروپادا دا، ا ق ش-تا دا بەلەڭ الىپ جاتىر. سونداي-اق ءتىپتى رەسەيدە دە، وزبەكستاندا دا تىركەلگەن جاعدايلار بار. سوندىقتان بارىنشا ساق بولايىق»، - دەپ ەسكەرتتى ول.

دەپۋتات كۆادروبەرلەردىڭ ارەكەتىن ورگاندار مۇقيات زەرتتەۋ كەرەگىن، قاجەت جاعدايدا پارلامەنت ارنايى زاڭ شىعارۋعا دا دايىن ەكەنىن ايتتى.

«پرەزيدەنت ۇنەمى ايتاتىنداي، ءتارتىپ پەن زاڭ كەرەك. بىزدە مۇنداي كۆادروبەرلەرگە بايلانىستى زاڭ شىعارۋ كەرەك تە شىعار. سەبەبى بۇل اۋرۋدىڭ، ياعني دەرتتىڭ الدىن الماساق، ەرتەڭگى كۇنى ءوزىمىز وپىق جەيتىن بولامىز. جانە دە ايتارىم، ءدال وسى كۆادروبەرلەردىڭ ارەكەتىن قۇزىرلى ورگاندار تەكسەرىسكە الۋ كەرەك. ال اتا-انالارعا ايتارىم، بالالارىڭىزبەن مىندەتتى تۇردە سويلەسىڭىزدەر، دوس بولىڭىزدار، ارالاسىڭىزدار، كوڭىل بولىڭىزدەر. سەبەبى مۇنىڭ ارتىندا ۇلكەن ءبىر كۇشتەر دە تۇرۋى مۇمكىن. بالالارىڭىزدىڭ جانۋارعا اينالۋى اقىلعا قونىمسىز نارسە، ءبىراق، وكىنىشكە قاراي، سونداي بولىپ جاتىر. مەن سىزدەرگە ەسكەرتۋ رەتىندە ايتىپ وتىرمىن. سوندىقتان دا بارلىعىمىز بىرگە ارەكەت ەتەيىك. مۇنىڭ ارتىندا ۇلكەن يندۋستريا تۇر. ەلدەر سول جانۋارعا ەلىكتەپ، كيىمىن الادى، قۇيرىق جالعاپ الادى، ودان كەيىن، ءتىپتى سونىڭ تاماعىن دا جەيدى ەكەن. بۇل قوعام دەرتى. ول قوعامعا قاۋىپتى»، - دەيدى داۋلەت مۇقايەۆ ۆيدەودا.

رەسەيدە كۆادروبەرلەرمەن كۇرەسۋ ءۇشىن شارالار قابىلداۋ سۇرالدى

ەسكە سالايىق، رەسەي ارداگەرلەرى ۇيىمى رەسەيدىڭ باس پروكۋرورى يگور كراسنوۆقا بالالار مەن جاسوسپىرىمدەر اراسىندا كۆادروبينگ دەپ اتالاتىن اۋەستىكتىڭ تارالۋىن توقتاتۋ تۋرالى ءوتىنىش جىبەردى.

باس پروكۋرورعا كۆادروبينگكە بايلانىستى تاۋارلاردى ءىرى ماركەتپلەيستەردە جانە بولشەك ساۋدا جەلىلەرىندە ساتۋدىڭ زاڭدىلىعىن تەكسەرۋ، بالالاردى كۆادروبينگكە تارتۋدى قولدايتىن جانە ىنتالاندىراتىن اتا-انالارعا قاتىستى جاۋاپكەرشىلىك شارالارىن ەنگىزۋ مۇمكىندىگىن زەرتتەۋ، سونداي-اق جاڭا قۇبىلىستىڭ زياندى سالدارى تۋرالى ءتۇسىندىرۋ جۇمىستارىن جۇرگىزۋ ۇسىنىلدى.

«مۇنداي شارالار وتباسىلىق قۇندىلىقتاردى ساقتاۋعا جانە نىعايتۋعا جانە قوعامىمىزدى وسىنداي قاۋىپتى اعىمداردان قورعاۋعا وڭ اسەر ەتەتىنىنە سەنىمدىمىز»، - دەلىنگەن بۇكىل رەسەيلىك قوزعالىستىڭ ۇندەۋىندە.

وزبەكستاندا كۆادروبەرلەردىڭ اتا-انالارىنا ايىپپۇل سالادى

وزبەكستاندا ءى ءى م كۆادروبەرلەردىڭ اتا-انالارىنا ايىپپۇل سالاتىنىن مالىمدەدى.

مينيسترلىك بالالار اراسىندا كۆادروبيكا دەپ اتالاتىن سۋبمادەنيەتتىڭ كورىنىسى اتا-انالاردىڭ ءوز مىندەتتەرىن ورىنداماۋى رەتىندە قاراستىرىلاتىنىن ەسكەرتتى.

«اكىمشىلىك جاۋاپكەرشىلىك تۋرالى كودەكسكە سايكەس، بۇل ءۇشىن بەس بازالىق ەسەپتىك شاماعا دەيىن - 1,875 ميلليون سوماعا دەيىن ايىپپۇل قاراستىرىلعان»، - دەلىنگەن حابارلامادا.

كۆادروبەرلەر جايلى نە بەلگىلى؟

كۆادروبيكا (لاتىنشا quattuor - ءتورت جانە اعىلشىنشا aerobics - اەروبيكا) - ادامدار جانۋارلاردىڭ قوزعالىسىن قايتالاپ، ءتورت اياقتاپ جۇرەتىن سپورتتىڭ رەسمي ەمەس ءتۇرى. ادامدار كۆادروبيكا كەزىندە جانۋارلاردىڭ ماسكاسى مەن قۇيرىعىن پايدالانادى. وسىلايشا، ولار مىسىق، تۇلكى، قاسقىر سياقتى كيىنەدى. ءبىر جاعىنان بۇل قيىن اكروباتيكا، ال ءبىر جاعىنان - بۇل ءبىرتۇرلى اۋەستىك كەيدە شەكتەن شىعىپ، اقىلعا قونىمسىز ارەكەتكە اينالادى.