قۇلسارى قالاسىنداعى توپتىق توبەلەس: جاراقات العان ءبىر جاس ءوسپىرىم كوز جۇمدى

اتىراۋ. KAZINFORM — اتىراۋ وبلىسىنداعى قۇلسارى قالاسىنىڭ جاستارى تاعى دا توپتالىپ توبەلەستى. توپتىق توبەلەس كەزىندە جاراقات العان ءبىر جاس ءوسپىرىم اۋرۋحانانىڭ جانساقتاۋ بولىمىندە قايتىس بولعان.

اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، توپتىق توبەلەس 19-قاڭتاردا تۇنگى مەزگىلدە بولعان.

«جىلىوي اۋدانىنىڭ ورتالىعى - قۇلسارى قالاسىندا تۇنگى ساعات 03:05 شاماسىندا توپتىق توبەلەستىڭ بولعانى انىقتالدى. اۋداندىق پوليتسيا ءبولىمىنىڭ قىزمەتكەرلەرى جەدەل-ىزدەستىرۋ شاراسىن جۇرگىزدى. قۇقىق بۇزۋشىلىققا قاتىسى بار كۇدىكتىلەردىڭ ءبارى ۇستالىپ، پوليتسيا بولىمىنە جەتكىزىلدى»، - دەپ حابارلادى دەپارتامەنتتىڭ باسپا ءسوز قىزمەتى.

توپتىق توبەلەستىڭ سالدارىنان 3 ادام ءتۇرلى دەنە جاراقاتىمەن جىلىوي اۋداندىق ورتالىق اۋرۋحاناسىنا جەتكىزىلگەن. ونىڭ ءبىرى - 2006 -جىلعى جاس ءوسپىرىم اۋرۋحانانىڭ جانساقتاۋ بولىمىندە كوز جۇمعان.

«پوليتسيا قىزمەتكەرلەرى توپتىق توبەلەسكە بايلانىستى 2000 جانە 2007 -جىلى تۋعان كۇدىكتىلەردى قاماۋعا الدى. قازىر كۇدىكتىلەرگە قاتىستى سوتقا دەيىنگى تەرگەۋ امالدارى باستالدى. سوت-مەديتسينالىق ساراپتاما تاعايىندالدى»، - دەپ ءمالىم ەتتى دەپارتامەنتتىڭ باسپا ءسوز قىزمەتى.