قازاقستاننىڭ مۇناي سەرۆيسى سالاسى حالىقارالىق نارىققا شىعۋدا

استانا. KAZINFORM - قازاقستاندا جاسالعان «Satti» ءوزى كوتەرىلەتىن قالقىمالى العاشقى تەڭىز بۇرعىلاۋ قوندىرعىسى كاسپي تەڭىزىنىڭ تۇرىكمەنستان سەكتورىنداعى شەلەكەن كەن ورنىندا بۇرعىلاۋ جۇمىستارىن باستايدى.

«Satti» - بۇل كۇردەلى تەڭىز جاعدايلارىندا بۇرعىلاۋ جۇمىستارىن جۇرگىزۋگە ارنالعان، وزىق تەحنولوگيالارمەن تولىق جابدىقتالعان بىرەگەي قوندىرعى.

2021-جىلى موديفيكاتسيادان وتكەننەن كەيىن ونىڭ جۇك كوتەرۋ قۋاتى 453 توننادان 680 تونناعا دەيىن ارتتى. ناتيجەسىندە اۋقىمدى جوبالار ءۇشىن جاڭا مۇمكىندىكتەر اشىلدى. قوندىرعى 6 مىڭ مەترگە دەيىنگى تەرەڭدىكتەگى ۇڭعىمالاردى بۇرعىلاي الادى.

شەتەلدەگى جوبالاردا «Satti» پلاتفورماسىنىڭ تابىستى پايدالانۋى قازاقستاننىڭ جوعارى ساپالى قىزمەت كورسەتىپ، الەمدىك دەڭگەيدە كۇردەلى مۇناي-گاز جۇمىستارىن ورىنداۋ قابىلەتىن راستاپ وتىر.

الداعى ۋاقىتقا جوسپارلانعان جۇمىستارعا بايلانىستى اشحاباد قالاسىندا «KMG Drilling and Services» كومپانياسىنىڭ («Satti» قوندىرعىسىن يەلىك ەتەتىن «قازمۇنايگاز» ۇ ك ا ق- نىڭ ەنشىلەس كاسىپورنى) فيليالى اشىلدى، بۇل تۇرىكمەنستانداعى قىزمەتتەردى جەدەل ءارى ءتيىمدى اتقارۋعا مۇمكىندىك بەرەدى. KMG DS فيليالىنىڭ اشىلۋ سالتاناتىنا ق م گ باسشىسى اسحات حاسەنوۆ قاتىستى.

بۇل ءىس-شارا ەلىمىزدىڭ حالىقارالىق مۇناي سەرۆيسى قىزمەتى نارىعىنا قاتىسۋىن كەڭەيتە وتىرىپ، قازاقستان مەن تۇرىكمەنستان اراسىنداعى ەكىجاقتى ىنتىماقتاستىقتى نىعايتا تۇسۋدە.

بيىل تامىز ايىندا KMG DS جانە Dragon Oil Turkmenistan Limited كاسپي تەڭىزىنىڭ تۇرىكمەن سەكتورىندا بۇرعىلاۋ جۇمىستارىن جۇرگىزۋگە كەلىسىمشارت قابىلداعان بولاتىن.

انىقتاما:

«KMG Drilling Services» ج ش س — 2008-جىلى اشىلعان قازمۇنايگازدىڭ ەنشىلەس كومپانياسى. كاسپي تەڭىزىنىڭ قازاقستاندىق سەكتورىندا بۇرعىلاۋ قىزمەتتەرىن كورسەتەتىن جەتەكشى كاسىپورىن. Satti العاشقى تەڭىز بۇرعىلاۋ قوندىرعىسىنا يەلىك ەتەدى.

Dragon Oil Turkmenistan Ltd - DragonOil كومپانياسىنىڭ ەنشىلەس ۇيىمى (ب ا ءا). كاسپي تەڭىزىندەگى شەلەكەن اۋماعىندا كومىرسۋتەكتەردى بارلاۋ جانە وندىرۋمەن اينالىسادى. كاسىپورىن EmiratesNational Oil Company (ENOC) مەنشىگىندە.