قازاقستاندا قانشا وزبەك، وزبەكستاندا قانشا قازاق تۇرادى؟

استانا. قازاقپارات - بۇل تۋرالى وزبەكستان سىرتقى ىستەر ءمينيسترى باحتيەر سايدوۆتىڭ قازاقستانعا رەسمي ساپارى اياسىندا سىرتقى ىستەر ءمينيسترى مۇرات نۇرتىلەۋ مالىمدەدى.

قازاقستان تەرريتورياسىندا 500 مىڭعا جۋىق وزبەكتەر تۇرسا، وزبەكستاندا 800 مىڭعا جۋىق قازاقتار تۇرىپ جاتىر. ولار - ەكى ەلدى جاقىنداستىراتىن جاقسى فاكتور. ولاردى قولداۋ ءۇشىن ءتيىستى جاعداي جاسالعان. مەكتەپتەر بار. قازاقستاندا ەكى وزبەك تەاترى بار، - دەدى مينيستر.

ول وسى باعىتتا ارى قاراي دا ءتيىستى قادامدار جاسالاتىنىن جەتكىزدى. قازاقستان مەن وزبەكستاننىڭ ءوزارا مادەنيەت كۇندەرى تۇراقتى وتكىزىلىپ جاتقانىن ايتتى.

جاستار اراسىندا بەلسەندى ديالوگ ورناتىلدى. قازاقستاندا قازىر التى مىڭ وزبەكستان ازاماتى ءبىلىم الىپ جاتىر. جوعارعى وقۋ ورىندارىندا ورتا ازيا ەلدەرى ءۇشىن گرانتتار، كۆوتالار بەرىپ جاتىرمىز. ولاردى ءبىز ۋاقىت وتكەن سايىن جىلدان جىلعا ولاردىڭ سانىن ۇلعايتىپ وتىراتىن بولامىز. قازىر مىسالى، ءبىز مەملەكەتتىك قىزمەتكەرلەر دايىنداۋ، ديپلوماتتار دايىنداۋ جانە مەديتسينا سالاسىنداعى ماماندار دايىنداۋ بويىنشا وزبەك تاراپىنا ۇسىنىستارىمىزدى بەردىك، - دەدى ول.

 

 BAQ. KZ