قازاقستاندا باعامىنىڭ تومەندەۋىنە ەشقانداي نەگىز جوق - مينيسترلىك

استانا. KAZINFORM - ەلىمىزدە دەۆالۆاتسياعا ەشقانداي نەگىز جوق. بۇل تۋرالى ۇلتتىق ەكونوميكا ۆيتسە-ءمينيسترى ارمان قاسەنوۆ ءمالىم ەتتى.

بۇگىن سەناتتىڭ جالپى وتىرىسىنان كەيىن تىلشىلەر 9-تامىزدا شەتەل ۆاليۋتاسىنىڭ تەڭگەگە شاققانداعى باعامى نە سەبەپتى وسكەنىن سۇرادى.

«ۆاليۋتا تۇراقتى دەپ ايتا الامىن. ارينە، وعان ءارتۇرلى فاكتورلار اسەر ەتۋى مۇمكىن. كەز كەلگەن باسقا ۆاليۋتا سياقتى ول ەلدىڭ ەكسپورتى مەن يمپورتىنا تاۋەلدى بولادى. سوندىقتان مۇنداي اسەرلەر كەزىندە باعام وزگەرۋى مۇمكىن. جالپى العاندا، بارشامىز ۆاليۋتانىڭ تۇراقتىلىعىن كورىپ وتىرمىز، ياعني ۇلتتىق ۆاليۋتادا دەپوزيتتەردىڭ كىرىستىلىگى شەتەل ۆاليۋتاسىنان الدەقايدا جوعارى. سوندىقتان ءوز باسىم ۇلتتىق ۆاليۋتانىڭ تۇراقتىلىعىنا سەنەمىن»، - دەدى ا. قاسەنوۆ.

ونىڭ ايتۋىنشا، كەيىنگى ءۇش جىلدا ب ا ق-تا ءتۇرلى ساراپشىلار شەتەلدىك ۆاليۋتا باعامىنىڭ تىم جوعارى بولاتىنىن جاريالاپ ءجۇردى. الايدا ولاردىڭ وسى پايىمى ءىس جۇزىندە بولمادى.

«شىن مانىندە، بىزدە ءبىرازدان بەرى دەۆالۆاتسيا بولعان جوق، ويتكەنى دەۆالۆاتسياعا ۇشىراۋعا ۇنەمى ناقتى ىرگەلى نەگىزدەر بايقالۋى ءتيىس. ال قازىر مۇنداي نەگىز جوق. ەكسپورتىمىز بىلتىرعىدان الدەقايدا جوعارى. يمپورت تومەندەدى. قازىر بىزدە وڭتايلى ساۋدا بالانسى قالىپتاستى. سوندىقتان قازىر بىزدە دەۆالۆاتسياعا ەشقانداي نەگىز جوق»، - دەدى ۆيتسە-مينيستر.