قازاقستان مەن قىتاي ءبىلىم، عىلىم، تۋريزم سالاسىندا بىرلەسكەن جوبالار جاسايدى - پرەزيدەنت

استانا. KAZINFORM - ەلوردادا «تاتۋ كورشىلىك قارىم-قاتىناستىڭ جاڭا كەزەڭى» اتتى قىتاي مەن قازاقستان اراسىنداعى مادەني الماسۋ فورۋمى باستالدى.

ق ر مادەنيەت جانە اقپارات ءمينيسترى ايدا بالايەۆا مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ بەردى.

«قۇرمەتتى جيىنعا قاتىسۋشىلار! سىزدەردى «تاتۋ كورشىلىك قارىم-قاتىناستىڭ جاڭا كەزەڭى» اتتى قازاق-قىتاي فورۋمىنىڭ اشىلۋىمەن قۇتتىقتايمىن! بۇل ءىس-شارا قىتاي حالىق رەسپۋبليكاسىنىڭ ءتوراعاسى شي جينپيڭ مىرزانىڭ قازاقستانعا مەملەكەتتىك ساپارى سونداي-اق ش ى ۇ سامميتى اياسىندا ۇيىمداستىرىلىپ وتىر. ونىڭ سيمۆولدىق ءمانى زور»، - دەپ جازىلعان قۇتتىقتاۋ حاتىندا.

پرەزيدەنت ءوز قۇتتىقتاۋىندا قازاق-قىتاي قاتىناسى جاڭا دەڭگەيگە كوتەرىلگەنىن، جان-جاقتى ستراتەگيالىق سەرىكتەستىگىمىز جىل وتكەن سايىن نىعايىپ كەلە جاتقانىن اتاپ ءوتتى. بۇعان مادەني-گۋمانيتارلىق بايلانىستاردىڭ دا ىقپالى زور.

«شىن مانىندە، مادەنيەت پەن ونەر - ەلدەر مەن وركەنيەتتەردى جالعاپ تۇرعان التىن كوپىر. ش ى ۇ سامميتى قارساڭىندا ەكى ەلدىڭ مادەنيەت ورتالىقتارى جۇمىسىن باستايدى. بۇل قادام قوس مەملەكەتتىڭ ءوزارا ىقپالداستىعىن ودان ءارى دامىتۋعا جول اشادى. وسى رەتتە ءبىلىم، عىلىم، تۋريزم سالاسىنداعى بىرلەسكەن جاڭا جوبالار قولعا الىنادى. بۇگىن فورۋم قازاقستان مەن قىتايدىڭ تاتۋ كورشىلىككە نەگىزدەلگەن دوستىق قارىم-قاتىناسىن نىعايتادى دەپ ۇمىتتەنەمىن»، - دەدى قاسىم-جومارت توقايەۆ.

فورۋمدا قازاقستان مەن قىتاي بىرلەسىپ تۇسىرگەن «ورتاق ارمان» دەرەكتى لەنتاسى جانە «شي جينپيڭنىڭ سۇيىكتى قاناتتى سوزدەرى» باعدارلاماسىنىڭ ءۇشىنشى ماۋسىمى تانىستىرىلدى.

سونداي-اق، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى مەن قىتاي مەدياكورپوراتسياسىنىڭ عىلىمي-زەرتتەۋ ينستيتۋتى جانە «Kazakh Tourism» ۇ ك» ا ق مەن قىتاي مەدياكورپوراتسياسىنىڭ ەۋرازيالىق بيۋروسى ىنتىماقتاستىق تۋرالى مەموراندۋم الماستى.