قازاق تازىلارى مەديتسينالىق تەكسەرۋدەن ءوتىپ جاتىر

استانا. KAZINFORM - قازاقستاندا قازاق تازىسى تۇقىمىن حالىقارالىق دارەجەدە تانىتۋ شاراسىنا دايىندىق اياسىندا اتالعان تۇقىمعا جاتاتىن 50 ءيتتى تەگىن مەديتسينالىق تەكسەرۋدەن وتكىزىپ جاتىر.

ق ر ۇلتتىق سپورت فەدەراتسياسى ءمالىم ەتكەندەي، بۇگىندە ۇلتتىق مۇرا - قازاق تازىسى تۇقىمىن ساقتاۋ جانە ونىڭ ەجەلدەن قازاقى تۇقىم ەكەنىن حالىقارالىق دەڭگەيدە تانىتۋ بويىنشا بەلسەندى جۇمىس ءجۇرىپ جاتىر.

قازاقستان 2023 -جىلى حالىقارالىق كينولوگيا فەدەراتسياسىنىڭ (FCI) تولىققاندى مۇشەسى بولدى. قازاق تازىسى تۇقىمىن حالىقارالىق دارەجەدە تانىتۋ ءۇشىن FCI-دىڭ مىندەتتى تالاپتارىنىڭ ءبىرى يتتەردى تەكسەرىپ، شىققان ەلىندەگى تۇقىمنىڭ جاي-كۇيى مەن دامۋ بولاشاعىن زەردەلەۋ كەرەك.

«ەندىگى ماڭىزدى ماسەلە، قازاقستاندى حالىقارالىق كينولوگيالىق فەدەراتسيادا (FCI) وسى تۇقىمداردىڭ شىققان ەلى رەتىندە بەكىتۋ»، - دەدى قازاقستان كينولوگتار وداعىنىڭ پرەزيدەنتى باۋىرجان سەرىكقالي.

قازاق تازىلارىن تەگىن مەديتسينالىق تەكسەرۋدەن وتكىزۋدى قازاقستان كينولوگتار وداعى ۇيىمداستىرىپ جاتىر. بۇل تەكسەرۋ - حالىقارالىق كينولوگيا فەدەراتسياسىنىڭ جاڭا تۇقىمدى تانۋعا قوياتىن تالاپتارىنىڭ ءبىرى.

يتتەر مىناداي اۋرۋلار بويىنشا تەكسەرىلەدى: جامباس جانە شىنتاق بۋىندارىنىڭ ديسپلازياسى، كورۋ ورگاندارىنىڭ تۇقىم قۋالايتىن پاتولوگيالارى، جۇرەك- تامىر جۇيەسى اۋرۋلارى، سونداي-اق كەرەڭدىك، پاتەللا ليۋكساتسياسى جانە ت. ب.

ايتا كەتەيىك، بيىل قىركۇيەكتە استانادا وتەتىن 5-شى دۇنيەجۇزىلىك كوشپەندىلەر ويىندارىنىڭ كورسەتۋ باعدارلاماسى اياسىندا تازى جارىستارى جوسپارلانعان.

اۆتور
كۇنسۇلتان وتارباي