قايتارىلعان اكتيۆتەر: Cartier ،Breguet ،Tiffany ،Ulysse Nardin Classic قول ساعاتتارى اۋكسيونعا شىعارىلادى

استانا. KAZINFORM - قوعامدا ەلىمىزدەن زاڭسىز جىلىستاتىلعان اكتيۆتەرگە بايلانىستى تۋىنداپ وتىرعان سۇراق از ەمەس. كەيىنگى ۋاقىتتا بۇل باعىتتا مەملەكەت تاراپىنان اۋقىمدى جۇمىس جۇرگىزىلىپ جاتقانى بەلگىلى. الايدا كوپشىلىك قايتارىلعان اكتيۆتەردىڭ كىمدەردىڭ باسقارۋىنا بەرىلگەنىن، قايدا ساقتالاتىنىن، سونداي-اق ولاردىڭ وتكىزىلۋى جونىندە دايەكتى اقپاراتتى بىلگىسى كەلەدى.

وسىعان وراي قايتارىلعان اكتيۆتەردى باسقارۋ كومپانياسىنا حابارلاسىپ، قولعا الىنعان جۇمىستارى تۋرالى سۇراپ بىلگەن ەدىك.

اتالعان كومپانيانىڭ قىزمەتى «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» ق ر زاڭى اياسىندا بەلگىلەنگەن. اكتيۆتەردىڭ ءتيىمدى باسقارىلۋى مەن ساقتاۋ تۋراسىندا، سونداي-اق ولاردىڭ قۇنىن ارتتىرۋعا بايلانىستى مالىمەت رەسمي سايتتارىندا ورنالاستىرىلعان.

كومپانيانىڭ باسپا ءسوز قىزمەتىنىڭ اقپاراتىنا سۇيەنسەك، قايتارىلعان اكتيۆتەردىڭ اراسىندا سۇرانىسى جوعارى زەرگەرلىك بۇيىمدار مەن الەمگە ايگىلى برەندتەردىڭ قول ساعاتتارى بار. مىسالى، Cartier ،Breguet جانە Tiffany سىندى تانىمال ماركالاردىڭ بۇيىمدارى ساتىلىمعا شىعارىلعان. ال 214,4 ميلليون تەڭگە تۇراتىن شەكتەۋلى شىعارىلىمداعى Ulysse Nardin Classic 789-80 قول ساعاتى اتالعان بۇيىمداردىڭ ىشىندەگى ەڭ قۇندى زاتتاردىڭ ءبىرى سانالادى. سونىمەن قاتار ەكى سىرعا، تىزبەكتەلگەن القا جانە ەكى ساقينادان تۇراتىن گاۋھار جيىنتىعى 85 ميلليون تەڭگەگە باعالانىپ وتىر.

«اكتيۆتەردى ساتۋ اشىق ءارى ءتيىستى زاڭعا سايكەس ءادىل تۇردە جۇرگىزىلەدى»، - دەيدى كومپانيانىڭ وكىلدەرى.

ساۋدا-ساتتىق اۋكسيون ارقىلى، ونىڭ ىشىندە ەلەكتروندى فورماتتا وتكىزىلەدى. ءار اكتيۆ تاۋەلسىز باعالاۋشىنىڭ بەلگىلەگەن باعاسىنا سايكەس ساتىلادى. زەرگەرلىك بۇيىمدار مەن ساعاتتاردىڭ باعاسى دۇكەندەگى باعادان تومەن بولۋى مۇمكىن. اكتيۆتەردىڭ وتىمدىلىگى جوعارى نەمەسە نارىق باعاسىمەن ساتۋعا قولايلى بولسا، وندا ساتۋعا قويىلادى.

«ەگەر دە اكتيۆتەر ءبىر ساۋدا تسيكلىنان وتپەگەن جاعدايدا ولار e-Qazyna پورتالى ارقىلى قايتا ساتىلىمعا شىعارىلادى. بۇل ءادىس اكتيۆتەردى ساتۋدىڭ اشىقتىعىن قامتاماسىز ەتىپ، نارىقتاعى سۇرانىسقا سايكەس باعانى قالىپتاستىرادى»، - دەپ ناقتىلادى ق ا ب ك - نىڭ ماماندارى.

ال تاياۋ ۋاقىتتا اۋكتسيون ارقىلى ءبىرقاتار اكتيۆ ساتىلىمعا شىعارىلماق. اتاپ ايتقاندا، 9-قازاندا ج ش س- نە قاتىسۋ ۇلەستەرى بار ەكى نىساننىڭ ساۋدا-ساتتىعى وتكىزىلەدى: ج ش س- دەگى ۇلەسى/قاتىسۋى، قىزمەت ءتۇرى - سۋدى جيناۋ، وڭدەۋ جانە تاراتۋ جانە ج ش س- دەگى ۇلەسى/قاتىسۋى، قىزمەت ءتۇرى -دەربەس قازاندىقتارمەن جىلۋ ەنەرگياسىن ءوندىرۋ.

11-قازاندا كەلەسى نىسانداردىڭ ساۋدا-ساتتىعى وتكىزىلەدى:

- مونەتالار، جالپى قۇنى 1564810 تەڭگە - قۇنى 150 مىڭنان باستالىپ، 690 مىڭ تەڭگەگە دەيىن جەتەتىن كوللەكتسيالىق مونەتالار؛

- ساعاتتار، جالپى قۇنى - 314742586 تەڭگە؛

- اشەكەي بۇيىمدار، جالپى قۇنى - 97963968 تەڭگە.

جالپى اكتيۆتىڭ قورىتىندى باعاسى - 414271364 تەڭگە. تۇتاستاي 19 لوت.

اۋكتسيونعا قاتىسۋ اكتيۆتەرگە يەلىك ەتۋمەن بىرگە قوعامنىڭ يگىلىگىنە ارنالعان الەۋمەتتىك جوبالاردى ىسكە اسىرۋعا جول اشادى. ماسەلەن، ساتىلىمنان تۇسكەن بارلىق قاراجات ارناۋلى مەملەكەتتىك قورعا اۋدارىلىپ، ەلىمىزدەگى ماڭىزدى الەۋمەتتىك- ەكونوميكالىق جوبالاردى قارجىلاندىرۋعا جۇمسالاتىنىن ايتا كەتكەن ورىندى.

تۇتاستاي العاندا، 2024 -جىلدىڭ 1 قازانىنداعى جاعداي بويىنشا باسقارۋشى كومپانيا 5,7 ملرد تەڭگە سوماعا اكتيۆتەردى ساتقان. ولاردىڭ ىشىندە 4,4 ملرد تەڭگە شەتەلدىك اكتيۆتەردى ساتۋدان تۇسكەن.