قاي بانكتىڭ دەپوزيتىنە اقشا جيناعان ءتيىمدى؟

استانا. قازاقپارات - قازىر تەڭگەدەگى دەپوزيتتەردىڭ سىياقىسى وتە جاقسى. دوللارمەن جيناعان دەپوزيتكە قاراعاندا تەڭگەمەن جيناعان دەپوزيتتەن اجەپتاۋىر پايدا كورۋگە بولادى.

سەبەبى ەلىمىزدەگى ەكىنشى دەڭگەيلى بانكتەردىڭ بارىندە شەتەل ۆاليۋتاسىمەن (دوللار، ەۋرو، رۋبل) جيناعان دەپوزيتتىڭ سىياقىسى 1 پايىز عانا. مىسالى دەپوزيتىڭىزدە ءۇش مىڭ دوللارىڭىز بار دەلىك. تەڭگەگە شاقساڭىز - 1,5 ميلليون تەڭگەدەي اقشا. سول اقشاڭىزدىڭ سىياقىسى رەتىندە بانك اي سايىن 2 دوللار عانا بەرەدى. ول مىڭ تەڭگەگە جەتەر-جەتپەس اقشا. ياعني ءسىز دوللارمەن دەپوزيت جيناعاندا، بانكتەن پايدا كورمەيسىز دەپ ايتۋعا دا بولادى. جيناعان اقشانى وزىڭىزگە جۇمىس ىستەتۋ، پاسسيۆ تابىس كوزىنە اينالدىرۋ تۇرعىسىنان قاراساق، دوللارداعى دەپوزيت وتە ءتيىمسىز.

توعىز جىلدان بەرى ەلىمىزدە دوللار قۇنى كۇرت كوتەرىلگەن جوق. ەركىن اينىمالى باعامعا وتكەنىمىزدى ەسكەرسەك، دەپوزيتتە دوللارمەن اقشا جيناپ، دەۆالۆاتسيا بولا قالسا، دوللار باعامى ءوسىپ، ۇتا قالامىن دەۋ - ەكىۇداي دۇنيە. حالىقارالىق ساياسات، ەكونوميكا، قىرعي-قاباق سوعىس، تەكە- تىرەستەر، مۇناي باعاسى مەن ۇكىمەتتىڭ نە ويلاعانى بارىن ءبىلىپ بولمايمىز.

سول سەبەپتى جاقىن ارادا شەشىپ المايتىن، ۇزاق مەرزىمگە جينايتىن ارتىق اقشاڭىز بولسا دوللارمەن دە دەپوزيت ۇستاعان ارتىقتىق ەتپەيدى. سەبەبى دوللارمەن سالعان اقشانى قىسقا مەرزىمدە شەشىپ الاتىن بولساڭىز ساتۋ - ساتىپ الۋ باعامىنان ۇتىلىپ قالاسىز. تارازى باسىن تەڭ ۇستاپ، دوللارمەن دە، تەڭگەمەن دە دەپوزيت ۇستاعان - ەڭ دۇرىسى.

ال ەندى بۇگىنگى تاقىرىبىمىزدىڭ وزەگى - تەڭگەدەگى دەپوزيتتەرگە كەلەيىك. 2014-2015 -جىلدارداعى دەۆالۆاتسيادان كەيىن جۇرت جاپپاي اقشاسىن دوللارمەن جيناي باستاعان سوڭ، ۇكىمەت پەن ەكىنشى دەڭگەيلى بانكتەر تەڭگەلىك دەپوزيتتەردىڭ سىياقىسىن ءوسىردى. مۇنداعى ماقسات - تەڭگەلىك دەپوزيتتەردىڭ تارتىمدىلىعىن ارتتىرۋ، حالىقتى اقشانى تەڭگەمەن جيناۋعا قىزىقتىرۋ بولدى. بۇل شارالار ءوز جەمىسىن بەردى دە. قازىرگى تاڭدا اقشا جيناي العان ادام ءۇشىن تەڭگەلىك دەپوزيتتەر وتە جاقسى تابىس كوزى بولىپ وتىر. دەپوزيتتەگى اقشاڭىز نەعۇرلىم كوپ بولسا، اي سايىن سوعۇرلىم قوماقتى سىياقى تۇسەدى. وسى ورايدا ءبىز پايىزى جوعارى بانك دەپوزيتتەرىنە اناليز جاساپ كورگەن ەدىك. قاي بانككە اقشا سالىپ، كوبىرەك تابىس تابۋعا بولادى؟ تالداپ كورەيىك.

دەپوزيتتە ەڭ نەگىزگى ەكى ۇعىم بار: اي سايىنعى نومينالدى مولشەرلەمە جانە جىلدىق ءتيىمدى مولشەرلەمە. وسى جەردە بىزگە ءبىرىنشى كەرەگى - اي سايىنعى نومينالدى مولشەرلەمە. ياعني بانكتىڭ ءسىزدىڭ دەپوزيتتەگى اقشاڭىزعا اي سايىن تولەيتىن پايىزى. ءدال ءقازىر ەكىنشى دەڭگەيلى بانكتەردىڭ بارىندە تەڭگەلىك دەپوزيتتەردىڭ پايىزى - 13-17 پايىز ارالىعىندا. كوبىسىندە - 13-14 پايىز.

15-17 پايىزدىق دەپوزيتتەر از جانە ول بەلگىلى ءبىر ساناتتاعى ادامدارعا عانا ارنالعان. مىسالى جالاقىسىن بەلگىلى ءبىر بانكتەن الاتىن جاندار سول بانككە اقشا جيناسا نەمەسە قوماقتى قاراجاتتى جاقىن ارادا شەشپەيتىندەي، ۇزاق مەرزىمگە عانا سالسا عانا وسىنداي سىياقىنىڭ قىزىعىن كورە الادى. ءبىراق بۇل كوپشىلىككە ءتيىمسىز جانە بۇل دەپوزيتتەردە اي سايىن تولتىرىپ وتىرۋ مۇمكىندىگى جوق. ياعني جوعارى پايىزبەن جاقسى سىياقى الۋ ءۇشىن قوماقتى قاراجاتتى بىردەن سالۋىڭىز كەرەك. ال كوپشىلىكتىڭ قولىندا مۇنداي قاراجات جوق. دەپوزيت اشىپ، ۇستىنەن اي سايىن اقشا سالىپ، تولتىرىپ وتىراتىن، بىرتىندەپ جينايتىن دەپوزيت ءتۇرى كەرەك. ال ونداي دەپوزيتتەردىڭ پايىزدىق مولشەرلەمەسى 13-14 پايىز. سوندىقتان ءبىز وسى كوپشىلىككە ءتيىمدى 13-14 پايىزدىق دەپوزيتتەردى شولىپ شىقتىق.

ەلىمىزدەگى ەكىنشى دەڭگەيلى بانكتەردىڭ بارىندە كورسەتكىش - شامالاس.

Halyk bank ،Kaspi ،Eurasian bank ،Jusan bank ،Nurbank ،Bereke bank ،Forte bank-تە اي سايىنعى نومينالدى كورسەتكىش 12,8 پايىز 14,63 پايىز ارالىعىندا. ەڭ جوعارىسى، 14,63 پايىز - Bereke bank-تە. ودان كەيىنگىسى Forte bank-تە - 13,8 پايىز. كورىپ وتىرعاندارىڭىزداي، ايىرماشىلىق كوپ ەمەس. بۇل جەردە تەك وزىڭىزگە قولايلىسىن تاڭداي بەرەسىز.

جالاقىنى قاي بانكتەن الاسىز، قاي بانكتە بۇرىن اشىلعان شوتىڭىز بار، قاي بانكتىڭ كارتاسى بار، قاي بانككە اقشانى جىلدام اۋدارا الاسىز نەمەسە قاي بانكتىڭ فيليالى سىزگە جاقىن دەگەندەي. دەپوزيت ءتۇرىن دە قالاۋىڭىزعا قاراي تاڭدايسىز. اشىپ، اي سايىن تولىقتىرىپ وتىرۋعا بولاتىن، قاجەت كەزىندە شەشىپ الۋ مۇمكىندىگى بار دەپوزيتتى تاڭدايسىز با، جوق الدە بەلگىلى ءبىر ۋاقىتقا دەيىن شەشە المايتىن دەپوزيت ءتۇرىن تاڭدايسىز با، ەركىڭىز. ىڭعايىڭىزعا قاراي دەپوزيت ءتۇرى دە كوپ.

بۇل جەردە ەسكەرەتىن ءبىر دۇنيە بار. تەڭگەدەگى دەپوزيتتى ءبىر جىل مەرزىمگە اشقان ءتيىمدى. ءبىر جىلدان كەيىن پرولونگاتسيا جاسالىپ، تاعى ءبىر جىلعا ۇزارا بەرەدى. سەبەبى ءبىر جىلدان از مەرزىمدى تاڭداساڭىز كوپ دەپوزيتتە تولتىرۋ نەمەسە شەشىپ الۋ مۇمكىندىگى جوق. ال ءبىر جىلدان ۇزاق مەرزىمدى تاڭداساڭىز پايىزدىق سىياقى مولشەرلەمەسى ازايىپ كەتەدى. ەڭ ءتيىمدى مەرزىم - 1 جىلدىق دەپوزيت. جىل سايىن تاعى ءبىر جىلعا پرولونگاتسيا ارقىلى سوزىلىپ وتىرادى.

دەپوزيت اشقاندا ەسكەرەتىن ەڭ ماڭىزدى دۇنيە - كاپيتاليزاتسيا. جالپى دەپوزيتتەردىڭ ەكى ءتۇرى بار: كاپيتاليزاتسيامەن جانە كاپيتاليزاتسياسىز.

كاپيتاليزاتسيالى دەپوزيت - اي سايىن تۇسكەن سىياقى اقشاسى ءسىزدىڭ نەگىزگى سالىمىڭىزعا قوسىلىپ، كەلەسى ايدا وعان دا پايىز تۇسەدى. ياعني بانك ءبىرىنشى ايدا سىياقى رەتىندە بەرگەن ءوز پايىزىنا كەلەسى ايدا تاعى پايىز تولەيدى.

مىسالى ءسىز العاشقىدا دەپوزيتكە 1 ميلليون تەڭگە سالدىڭىز دەيىك. 14 پايىزبەن ەسەپتەسەك ءبىر ايدا سىزگە 11000 تەڭگە تۇسەدى. 11000 تەڭگە نەگىزگى سالىم - 1 ميلليون تەڭگەگە قوسىلادى. ياعني 1011000 تەڭگە بولادى. كەلەسى ايدا پايىز سىزگە باستاپقى 1 ميلليون تەڭگەگە ەمەس، 1011000 تەڭگەگە ەسەپتەلەدى.

ياعني بانك بەرگەن اي سايىنعى پايىزدار ءسىزدىڭ نەگىزگى سالىمىڭىزعا قوسىلىپ، بانك ءوزى پايىز رەتىندە بەرگەن اقشاعا كەلەسى ايدا تاعى پايىز تولەيدى. ياعني اي سايىنعى پايىزدار ەسەبىنەن ءسىزدىڭ نەگىزگى كاپيتالىڭىز كوبەيە بەرەدى.

ال كاپيتاليزاتسياسىز دەپوزيت - تۇتىنۋشى ءۇشىن وتە ءتيىمسىز. ءسىز باستاپقىدا 1 ميلليون سالساڭىز، ءبىر جىل بويى تەك سول 1 ميلليون تەڭگەگە عانا پايىز تۇسەدى. اي سايىن تۇسكەن سىياقىلارعا پايىز ەسەپتەلمەيدى.

ەندى وسى جەردە باسىندا توقتالىپ وتكەن جىلدىق ءتيىمدى مولشەرلەمەگە ورالايىق.

اي سايىنعى نومينالدى مولشەرلەمە + كاپيتاليزاتسيا سوماسى = جىلدىق ءتيىمدى مولشەرلەمە.

ءسىز باستاپقىدا 13,2 پايىز اي سايىنعى نومينالدى پايىزبەن دەپوزيت اشساڭىز، 12 ايداعى كاپيتاليزاتسيا اقشاسىن قوسقاندا جىلدىق ءتيىمدى مولشەرلەمە 14 پايىز بولىپ شىعادى. ءبىراق دەپوزيت ءتۇرىن تاڭداعاندا اي سايىنعى نومينالدى مولشەرلەمەگە جانە دەپوزيتتىڭ كاپيتاليزاتسيالى بولۋىنا باسا ءمان بەرەمىز.

تاعى ءبىر ەسكەرەتىن جايت - ءبىر دەپوزيتتە 20 ميلليون تەڭگەدەن ارتىق ساقتاماڭىز. سەبەبى دەپوزيتتەردى ساقتاندىرۋ قورى 20 ميلليون تەڭگەگە دەيىنگى دەپوزيتتەردى ساقتاندىرادى. بانك بانكروت بولعان جاعدايدا، قور سىزگە 20 ميلليون تەڭگەنى قايتارادى. جيعان اقشاڭىز 20 ميلليون تەڭگەدەن كوپ بولسا، وندا ەكى بانكتەن دەپوزيت اشىپ ساقتاعان دۇرىس.

turkystan.kz