قانداي ماسەلەلەر بويىنشا پەتيتسيا بەرۋگە بولمايدى

مادەنيەت جانە اقپارات ۆيتسە-ءمينيسترى دانيار قادىروۆ تاياۋدا قابىلدانعان «قوعامدىق باقىلاۋ تۋرالى» زاڭ اياسىندا قانداي ماسەلەلەر بويىنشا پەتيتسيا بەرۋگە بولمايتىنىن ايتتى، دەپ حابارلايدى Kazinform.

«اكىمشىلىك-راسىمدىك كودەكستە پەتيتسيا بەرۋ جانە قاراۋدىڭ راسىمدەرى جەكە قوسىمشامەن رەتتەلەدى. رەسپۋبليكالىق باسقارۋ نىسانى، اكىمشىلىك-اۋماقتىق قۇرىلىم، شەكارالاردى وزگەرتۋ، سوت تورەلىگى، راقىمشىلىق، ۇلتتىق قاۋىپسىزدىك سياقتى ماسەلەلەر بويىنشا پەتيتسيا بەرۋ مۇمكىندىگى بولمايدى. تاقىرىپتار ءتىزىمى جاريالانعان زاڭدا بەرىلگەن، 17 تارماق بار. ەڭ باستى نوۆەللا پەتيتسيانى قاراستىرۋ شەگى ەگەر اۋداندىق جەردە قاراستىرىلاتىن بولسا، وندا 2,5 مىڭ اۋدان حالقىنىڭ قولداۋى قاجەت بولادى. ال ەگەر ۇكىمەت تاراپىنان قارالۋ ءۇشىن 50 مىڭنان استام قولداۋشى بولۋى كەرەك. پەتيتسيانى قاراۋ بارىسىندا مەملەكەتتىك ورگان ءبىرقاتار ءىس-شارا جۇرگىزەدى، جۇمىس توبىن قۇرادى. قوعامدىق تالقىلاۋ جۇرگىزەدى»، - دەدى ۆيتسە-مينيستر ورتالىق كوممۋنكاتسيالار قىزمەتىندەگى بريفينگتە.

ونىڭ اتاپ وتۋىنشە، پەتيتسيا بويىنشا شەشىمدى مەملەكەتتىك ورگاننىڭ ءبىرىنشى باسشىسى عانا بەرە الادى.

«شەكتى مانگە جەتپەگەن پەتيتسيالار ۇندەۋ رەتىندە اكىمشىلىك-راسىمدىك كودەكس بويىنشا قاراستىرىلادى»، - دەدى دانيار قادىروۆ.

ۆيتسە-ءمينيستردىڭ ايتۋىنشا، زاڭ العاشقى رەسمي جاريالانعان كۇنىنەن 6 اي وتكەندە كۇشىنە ەنەدى، ياعني 2024-جىلعى 4- ساۋىردەن باستاپ ازاماتتار «ە- ءوتىنىش» اقپارات جۇيەسى ارقىلى ونلاين پەتيتسيا بەرە الادى.

ينتەرنەتى جوق قازاقستاندىقتاردىڭ مەملەكەت پەن ازاماتتىق قوعامنىڭ ءوزارا ءىس-قيمىلى سالاسىنداعى ۋاكىلەتتى ورگانعا جازباشا ارىز جازىپ، جۇگىنۋىنە مۇمكىندىك بار.