قانداسىمىز كاراتەدەن قارا بەلبەۋدىڭ ءۇشىنشى دان دارەجەسىن قورعادى - شەتەلدەگى قازاق باسپا ءسوزى
«KAZINFORM» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قوي تەرىسىنە سالىنعان كوشپەندىلەردىڭ ەستەلىكتەرى - «حالىق گازەتى»
جەكسەنالى قۇدايبەرگەن ۇلى - تەرى سۋرەتشىسى، 1992-جىلى شىڭجاڭنىڭ كۇنەس اۋدانىندا دۇنيەگە كەلگەن. 2016-جىلى شىڭجاڭ پەداگوگيكالىق ۋنيۆەرسيتەتىنىڭ بەينەلەۋ ونەرى اكادەمياسىن «بەينەلەۋ ونەرى» ماماندىعى بويىنشا ءبىتىردى. ونىڭ «جارتاستاعى كەسكىندەمە»، «التىن كۇز»، «كوكتەم»، «قوي تەرىسىندەگى سۋرەت، جىلقى اۋليەسى» جانە ت. ب. ەڭبەكتەرى بار.
بۇل تۋرالى قىتايلىق «حالىق گازەتى» باسىلىمى حابارلايدى.
سۋرەتشى جەكسەنالى قۇدايبەرگەن ۇلىنىڭ ايتۋىنشا، قازاقتار كوشپەلى حالىق بولعاندىقتان تەرىدەگى سۋرەتتەر ونەردى عانا ەمەس، كوشپەندىلەردىڭ شىنايى ءومىرىن ەسكە تۇسىرەدى.
«تاريحي تۇرعىدان قازاقتار كوشپەلى حالىق بولعان. كەڭ دالادا تاۋ اسىپ، تاس باسىپ، سۋدىڭ تۇنىعىن، ءشوپتىڭ سونىسىن ىزدەدى. مۇنداي كوشپەلى ءومىردىڭ وشىرۋگە بولمايتىن ەستەلىكتەرى تىم كوپ. ولار جايلاۋدان جايلاۋعا كوشىپ، مىڭعىرتىپ مالىن ايداعان ساتتەرىنىڭ ءوزى شىعارماشىلىق شابىتتىڭ قاينار كوزى. تەرىدەگى سۋرەتتەر ونەردى عانا ەمەس، كوشپەندىلەردىڭ شىنايى ءومىرىن ەسكە تۇسىرەدى»، - دەيدى سۋرەتشى جەكسەنالى قۇدايبەرگەن ۇلى.
وزبەكستان مەن قازاقستان جانۋارلار دۇنيەسىن بىرلەسىپ قورعايدى - «ءو ز ا»
سامارقاند قالاسىندا وتكەن «جابايى جانۋارلاردىڭ قونىس اۋداراتىن تۇرلەرىن ساقتاۋ» (CMSCOP14) كونۆەنتسياسىنا قاتىسۋشىلار كونفەرەنتسياسىنىڭ 14-وتىرىسى اياسىندا وزبەكستان مەن قازاقستان ءۇستىرت جازىعىنىڭ فاۋناسىن ساقتاۋ بويىنشا ىنتىماقتاستىق تۋرالى مەموراندۋمعا قول قويدى، - دەپ حابارلايدى «ءو ز ا» اقپارات اگەنتتىگى.
اتالعان باسىلىمنىڭ دەرەگىنشە، مەموراندۋمعا ءور ەكولوگيا، قورشاعان ورتانى قورعاۋ جانە كليماتتىڭ وزگەرۋى ءمينيسترى ازيز ابدۋحاكيموۆ پەن قر ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ قول قويعان.
قۇجات ورتالىق ازيا ەلدەرىنىڭ 2023-جىلى دۇنيەجۇزىلىك تابيعي مۇرا نىساندارىنىڭ تىزىمىنە ەنگىزىلگەن «تۇران قوڭىرجاي شولدەر» ترانسۇلتتىق دۇنيەجۇزىلىك تابيعي مۇرا وبەكتىسىن ساقتاۋ جونىندەگى مىندەتىن ورىنداۋعا قىزمەت ەتەدى.
قانداسىمىز كاراتەدەن قارا بەلبەۋدىڭ ءۇشىنشى دان دارەجەسىن قورعادى - Janadauir.com
جەرلەسىمىز سەرىكبول سەزحان ۇلى يندونەزيادا كاراتەدەن قارا بەلبەۋدىڭ ءۇشىنشى دان اتاعىن ابىرويمەن قورعاپ كەلدى، - دەپ حابارلايدى موڭعوليالىق «Janadauir» باسىلىمى.
اتالعان ب ا ق- تىڭ دەرەگىنشە، موڭعوليادا كاراتە شينكيوكۋشينكاي مىقتى دامىپ كەلە جاتقان جەكپە-جەك ونەرىنىڭ ءبىرى. سەرىكبول سەزحان ۇلى وسى جەكپە-جەك ونەرىن بايان-ولگەي ايماعىندا، ءتىپتى موڭعوليادا دامىتىپ، جاستارعا ۇيرەتىپ جۇرگەن كاراتە شەبەرىنىڭ ءبىرى. ول ەڭ العاش وسى جەكپە-جەك ونەرىن قازاقستان ەلىنەن ۇيرەنىپ كەلىپ، بايان-ولگەي ايماعىندا 2013-جىلدان باستاپ كلۋب اشىپ دامىتا باستاعان. سەرىكبول بۇگىنگە دەيىن موڭعوليانىڭ كاراتە شينكيوكۋشينكاي فەدەراتسيامەن بىرىگىپ، اتالعان ايماقتا جاتتىقتىرۋشى بولىپ جۇمىستاپ كەلەدى ەكەن.
«Janadauir» باسىلىمى وسى اپتادا بايان-ولگەي ايماعىنىڭ «تارلان» كلۋبىنىڭ جەتەكشىسى، حالىقارالىق دارەجەدەگى سپورت شەبەرى، قارا بەلبەۋدىڭ 3-دان يەگەرى سەرىكبول سەزحان ۇلىمەن سۇحباتتاسقان ەكەن.
ول بۇل سۇحباتىندا موڭعوليا ەلىنەن 2 ادام يندونەزيا ەلىنە ازيا كاراتە سەمينارىنا قاتىسىپ، سوندا وتكەن دان تەست، ياعني ماستەرلار اراسىندا قارا بەلبەۋ قورعاۋ شاراسىنا بارعانىن ايتادى.
اتاپ ايتقاندا، س. سەزحان ۇلى 2024-جىلى قاڭتار ايىنىڭ 26-28 ءى ارالىعىندا يندونەزيا ەلىنىڭ باتۋ قالاسى مالانگ دەمالىس جەرىندە 2024-جىلعى ازيا كاراتە سەمينارىنا جەرلەسى مونگونشاگاي ەكەۋى موڭعول ەلى اتىنان ابىرويمەن قاتىسىپ، كاراتەدەن 3-دان دارەجەسىن قورعاعانىن تىلگە تيەك ەتكەن. كاراتەيست بۇل سۇحباتىندا ءتىلشىنىڭ باسقا دا بىرنەشە سۇراقتارىنا جاۋاپ بەرگەن.
سونداي-اق وسى اپتادا «جاڭا ءداۋىر» سايتىندا «ايماعىمىزداعى تاەكۆوندا سپورتىن دامىتقان جاتتىقتىرۋشى» دەگەن تاقىرىپتاعى سۇحبات جارىق كوردى.
اتالعان باسىلىمنىڭ مالىمەتىنشە، 2023-جىلدىڭ سوڭىندا ۇزدىكتەردى قورتىندىلاۋدا جىلدىڭ تاڭداۋلى جاتتىقتىرۋشىسى اتاعى بايان- ولگەي ايماقتىق سپورت باسقارماسىنىڭ تاەكۆوندا سالاسىنىڭ جاتتىقتىرۋشىسى ەرۇلان شولەن ۇلىنا بۇيىرعان. ەرۇلان ايماقتىق سپورت سونىڭ ىشىندە تاەكۆوندا سالاسىنا قوماقتى ۇلەس قوسقان.
ونىڭ شاكىرتتەرى قازىرگى تاڭدا ۇلتتىق تاەكۆوندا قۇرامىندا حالىقارالىق دارەجەدە ونەر كورسەتىپ ءجۇر ەكەن.
«جاڭا ءداۋىر» سايتىنىڭ سۇحبات ايدارىنا قارا بەلبەۋ ءتورتىنشى دان، حالىقارالىق سپورت شەبەرى ەرۇلان شولەن ۇلىن شاقىرىپ، سۇحبات العان.
قازاقستان مەن وزبەكستان 2023-جىلى الەمدە التىندى ەڭ كوپ ساتقان ەلدەر بولدى - «Parstoday»
وتكەن جىلى الەمدە التىننىڭ نەگىزگى ساتۋشىسى 50 تونناعا جۋىق التىن ساتقان قازاقستاننىڭ ورتالىق بانكى بولدى. وزبەكستاننىڭ تازا التىن ساۋداسى شامامەن 25 توننانى قۇرادى جانە ول الەمدەگى التىن ساتاتىن ەكىنشى ەل.
بۇل تۋرالى وسى اپتادا يراننىڭ «Parstoday» اقپارات اگەنتتىگى حابارلايدى.
اتالعان اقپارات اگەنتتىگىنىڭ حابارلاۋىنشا، دۇنيەجۇزىلىك التىن كەڭەسى (WGC) 2023-جىلدىڭ قورىتىندىسى بويىنشا التىن ساتۋ كولەمى بويىنشا وزبەكستان ەكىنشى ورىندى جەڭىپ الدى جانە ءبىرىنشى ورىندى قازاقستانعا بەرگەن.
«2023-جىلى قىتاي 230 توننا التىن ساتىپ الىپ، الەم ەلدەرى اراسىندا ءبىرىنشى ورىنعا شىقتى. ودان كەيىن پولشا، سينگاپۋر، ليۆيا جانە چەحيا. جەلتوقساندا الەمدىك ورتالىق بانكتەردىڭ التىن-ۆاليۋتا قورى 28 تونناعا ءوستى، بۇل باعالى مەتالداردى ساتىپ الۋ ۇدەرىسىنىڭ جالعاسۋىن بىلدىرەدى. تۇركيا 18 توننا التىنمەن نەگىزگى ساتىپ الۋشى بولدى»، - دەپ جازدى يراندىق ب ا ق.
وزبەكستان تۇرعىندارىندا قانشا جەڭىل كولىگى بار ەكەنى بەلگىلى بولدى - Uza.uz
وزبەكستاندىق ستاتيستيكا اگەنتتىگىنىڭ حابارلاۋىنشا، 2024-جىلدىڭ 1- قاڭتارىنداعى جاعداي بويىنشا وزبەكستاندا جەكە تۇلعالاردىڭ مەنشىگىندەگى اۆتوكولىكتەر سانى 4020744 بولعان. بۇل سان ەكى جىل بۇرىن 3268470 ەدى. وزبەكستان حالقىنىڭ كەيىنگى ەكى جىلدا كولىك سانى 700 مىڭعا كوبەيگەن.
بۇل تۋرالى وسى اپتادا «Uza.uz» اقپاراتتىق اگەنتتىگى حابارلادى.
اتالعان ب ا ق- تا تۇرعىنداردىڭ مەنشىگىندەگى اۆتوكولىكتەردىڭ جالپى سانى سانى دا جاريالانعان. اتاپ ايتقاندا، جەڭىل اۆتوكولىكتەر – 3759045، جۇك كولىكتەرى – 240917، اۆتوبۋستار – 6297، شاعىن اۆتوبۋستار – 9102، ارنايى كولىكتەر - 5383.
سونداي-اق وسى اپتادا وزبەكستاندىق «Uza.uz» باسىلىمىندا، «وزبەكستاندا جولاۋشىلار اۆتوبۋستارىن ايەلدەردىڭ جۇرگىزۋىنە رۇقسات بەرلىدى» دەگەن تاقىرىپتاعى اقپارات جاريالاندى.
باسىلىمنىڭ مالىمەتىنشە، وزبەكستاندا ايەلدەر اۆتوبۋس جۇرگىزۋ قۇقىعىنا يە بولعان. مينيسترلەر كابينەتىنىڭ 2024-جىلعى 12--اقپانداعى ءتيىستى شەشىمىنە سايكەس ۇكىمەتتىڭ 2018-جىلعى 31-مامىرداعى 408 قاۋلىسىنىڭ 2-قوسىمشاسىنىڭ 27-تارماعىنىڭ جانە 3-قوسىمشانىڭ 5-تارماعىنىڭ كۇشى جويىلعان.
وزبەكستاندىق ب ا ق- تىڭ دەرەگىنشە، جوعارىداعى نورمالاردا ايەلدەردى «ۆس» جانە «د» ساناتتارى بويىنشا وقىتۋدى ۇيىمداستىرۋ كەزىندە جۇك كولىكتەرىنىڭ جۇك كوتەرگىشتىگى 2,5 توننادان، ال جولاۋشىلاردى تاسىمالداۋعا رۇقسات ەتىلگەن اۆتوبۋستاردىڭ سانى 14 ادامنان اسپاۋى كەرەكتىگى بەلگىلەنگەن بولاتىن.
ەندى ايەلدەردىڭ جۇك كوتەرىمدىلىگى 2,5 توننادان اساتىن جۇك كولىكتەرىن جۇرگىزۋ جانە 14 تەن استام جولاۋشىسى بار اۆتوبۋستاردى جۇرگىزۋ بويىنشا جۇمىس ىستەۋىنە قۇقىقتىق نەگىز جاسالعان.
ستامبۋلعا بىلتىر كەلگەن شەتەلدىك قوناقتار سانى رەكوردقا جەتتى - TRT
ادام ەڭ كوپ كەلەتىن قالالاردىڭ باسىندا كەلەتىن ستامبۋلعا بىلتىر 17 ميلليون 370 مىڭ 30 شەتەلدىك قوناق كەلدى. بۇل - رەكورد، - دەپ حابارلادى تۇركيا راديو تەلەۆيزيا پورتالى.
اتالعان ب ا ق- تىڭ دەرەگىنشە، مادەنيەت جانە تۋريزم مينيسترلىگىنىڭ دەرەكتەرىنە قاراعاندا، ستامبۋلعا كەلگەن شەتەلدىك قوناق سانى الدىنعى جىلمەن سالىستىرعاندا 8,44 پايىز ارتقان. بىلتىر 17 ميلليون 370 مىڭ 30 شەتەلدىك قوناقتى كۇتىپ العان ستامبۋلدا ەڭ كوپ تۋريستى رەسەي فەدەراتسياسى جىبەرگەن. اتاپ ايتقاندا، رەسەيدەن ستامبۋلعا 1 ميلليون 990 مىڭ 226 ادام كەلگەن.
«گەرمانيادان 1 ميلليون 286 مىڭ 504 ادام، يراننان 1 ميلليون 53 مىڭ 638 ادام، امەريكا قۇراما شتاتتارىنان 853 مىڭ 766 تۋريست كەلەدى. بەسىنشى ورىندا ۇلى بريتانيا، التىنشى ورىندا ساۋد ارابياسى جانە جەتىنشى ورىندا فرانسيا تۇر»، - دەپ جازادى «TRT».
اۆتور بەيسەن سۇلتان