قانداستار اتاجۇرتتان جۇلدەمەن قايتتى

استانا. KAZINFORM - ەلوردادا ءبي سپورتى فەدەراتسياسىنىڭ ۇيىمداستىرۋىمەن «قازاقستان گۇلدەرى - 2024» اتتى حالىقارالىق ءبي بايقاۋى ءوتتى.

تالانتتى بالالاردىڭ باسىن قوسقان تارتىستى دوداعا 20 مەملەكەتتەن بارلىعى 800 گە جۋىق وقۋشى كەلىپ قاتىسقان. سونىڭ ىشىندە موڭعوليانىڭ بايان-ولگەي ايماعىنان 39 قازاق بالاسى ءتورت توپتىق دارەجەدە ونەر كورسەتتى. وسى 800 قاتىسۋشى اراسىنان توپ جارىپ شىققان موڭعوليادان كەلگەن ءبيشى بالالار قانجىعالارىنا ءتورت بىردەي «باس جۇلدەنى» بايلاپ، قازاقتىڭ مەرەيىن ءبىر كوتەرىپ تاستادى دەسەك بولادى. ۇزدىك ونەر كورسەتىپ، قازىلار القاسىنىڭ كوڭىلىنەن شىققان ءتورت توپقا ءبي سپورتى فەدەراتسياسىنىڭ العىسحاتتارى مەن ەستەلىك مەدالدارى تابىس ەتىلدى.

استاناعا كەلگەن ونەرپاز بالالاردى اتاجۇرتتاعى العاشقى جەڭىسىمەن قۇتتىقتاعان «وتانداستار» قورى بولىپ وتىر. كىل قازاق بالالارىنان قۇرالعان 39 ءبيشى وقۋشىنى قور پرەزيدەنتى ابزال ساپاربەك ۇلى ارنايى قۇتتىقتاپ، ەستەلىككە بالالارعا ارنالعان كىتاپتار مەن كوك بايراقتى تارتۋ ەتتى.

«ءبىز ءبي سايىسىنىڭ بولاتىنىن كەش بىلدىك. «بالالار كەلدى» دەگەندى ەستي سالىسىمەن قاستارىنان تابىلىپ، بارىنشا قولداۋ كورسەتتىك. ونەرلەرىن دە تاماشالادىق. ايتارى جوق، وتە جوعارى دەڭگەيدە دايىندالىپتى. سول ءۇشىن جەتەكشىلەرىنە العىسىمىزدى بىلدىرەمىز. بايانولگەيلىك بالالاردىڭ اتاجۇرتى ەستەرىندە ءجۇرسىن دەگەن نيەتپەن 1 كۇن بويى استانانىڭ كورىكتى جەرلەرىن ارالاتىپ، مۇراجايلارعا اپاردىق. ءبىزدىڭ بار ماقساتىمىز - شەتتەگى قانداستاردى قولداۋ»، - دەيدى ابزال ساپاربەك ۇلى.

بىلتىرعى جىلدىڭ جەلتوقسان ايىندا استانادا بولاتىن بالالار اراسىنداعى حالىقارالىق ءبي بايقاۋى تۋرالى ارنايى حاتتى العان كۇننەن باستاپ، ايماقتىڭ بارلىق اۋىلىنداعى ءبي توپتارىمەن جۇمىس جۇرگىزگەنىن ايتتى بايانولگەيلىك ءبيشى بالالار توبىنىڭ جەتەكشىسى اينۇر يۋرا.

«بايان-ولگەي قالاسىندا ءبي ونەرى بويىنشا جاستاردى تاربيەلەپ كەلە جاتقانىما 40 جىلدان اسىپتى. بار ارمانىم - بالالارىمدى بيىكتەن كورۋ. قالادا عانا ەمەس، اۋىلدارعا دا ۇنەمى بارىپ بىلگەنىمدى ۇيرەتىپ وتىرامىن. ايماق ورتالىعىنان بولەك سۇمىندارداعى ءبي توپتارىن دا قولداۋىمىز كەرەك. ونسىز شارۋانىڭ رەتى بولمايدى. تەك ورتالىقتاعى ونەرلى بالالاردى عانا قولداي بەرسەك، شالعاي اۋىلدارداعى بالالار الدىندا ادىلەتسىزدىك بولار ەدى. وسى جولى ادەيىلەپ اۋىلدارداعى قازاق مەكتەپتەرىنىڭ بالالارىن جينادىق. بايقاۋعا 2 كىشى، 2 ەرەسەك توپ بولىپ كەلدىك. ءبيشى بالالارىمىز ءۇمىتىمىزدى اقتاپ جۇلدەلى ورىننان كورىنىپ وتىر. قۋانىشىمىزدا شەك جوق. اتامەكەنگە العاش بولىپ تابان تىرەگەن بالالار ەرەكشە تولعانىس ۇستىندە ءجۇر. ءبىر تۇسىنگەنىم، بالالارىمىزدى بارىنشا اتاجۇرتپەن تانىستىرىپ، ولاردىڭ كوكىرەكتەرىنە ەلگە دەگەن سۇيىسپەنشىلىكتى ۇيالاتا بەرۋ كەرەك ەكەن»، - دەيدى اينۇر يۋرا.

«مەن 5-سىنىپتا وقيمىن. مۇنداي ۇلكەن قالاعا ءبىرىنشى رەت كەلىپ وتىرمىن. ونەر كورسەتۋگە كەلگەن ءوزىم قاتارلى بالالار دا كوپ بولدى. دوستار تاپتىم. باس جۇلدە العانىمىزعا اتا-انام دا قۋانىپ حابارلاستى. مەكتەپتە دوستارىم دا اسىعا كۇتىپ وتىر. ماعان ءبارى ۇنادى. قازاق ەلىنە تاعى دا كەلگىم كەلەدى. ول ءۇشىن بۇدان دا جاقسى بولۋىمىز كەرەك ەكەن. ەندى سوعان تىرىسامىن»، - دەيدى كىشى توپ ونەرپازى گاۋھار ەرنازار.

 

بەردىبەك قاباي

 

aikyn.kz